Layoffs News: వేలాదిమందికి నెట్‌వర్కింగ్ దిగ్గజం లేఆఫ్స్.. ఈ ఏడాదిలో రెండోసారి.. ఇదీ రీజన్

Cisco layoffs: జీతాల పెంపు, ప్రమోషన్లు అంటూ ఎన్నో ఆశలు పెట్టుకున్న టెక్కీల పరిస్థితి నానాటికీ ఇబ్బందికరంగా మారుతోంది. స్టార్టప్‌ల నుంచి మల్టీ నేషనల్ కంపెనీల వరకు ఎప్పుడు లేఆఫ్ ఇస్తాయో తెలియని సందిగ్ధం నెలకొంది. రోజులు గడుస్తున్నా ఈ విషయంలో మాత్రం ఎటువంటి మార్పు కనిపించడం లేదు. ఖర్చులు తగ్గింపు, AI వంటి ఇతర టెక్నాలజీల్లో పెట్టుబడుల సాకుతో ఆయా సంస్థలు ఉద్యోగులపై వేటు వేస్తున్నాయి. ఈ పోకడ కాస్తా కొత్తగా IT రంగంలోకి రావాలనుకునే వారిలో భయాందోళన కలిగిస్తోంది.

నెట్‌వర్కింగ్ దిగ్గజం సిస్కో తన గ్లోబల్ వర్క్ ఫోర్స్‌లో 7 శాతం మందిని తొలగించనున్నట్లు ప్రకటించి షాక్ ఇచ్చింది. సైబర్ సెక్యూరిటీ, ఆర్టిఫిషియల్ ఇంటెలిజెన్స్ వంటి టెక్నాలజీలపై దృష్టి సారించడమే ఇందుకు కారణమని తెలిపింది. ఆ రంగాలలో అధిక వృద్ధిని సాధించవచ్చు అని తాము భావిస్తున్నట్లు పేర్కొంది. ఇప్పటికే ఓసారి ఉద్యోగులపై వేటు వేయగా ఈ ఏడాదిలో ఇది రెండోసారి కావడం గమనార్హం.

తొలగించనున్న ఉద్యోగుల సంఖ్యను సిస్కో అధికారికంగా వెల్లడించలేదు. అయితే కంపెనీకి ప్రపంచవ్యాప్తంగా 84 వేల 900 మంది సిబ్బంది ఉన్నారు. వారిలో 7 శాతం అంటే దాదాపు 6 వేల మందిపై దీని ప్రభావం ఉండనుంది. గతంలో ఫిబ్రవరిలోనూ 4 వేల మందికి కంపెనీ వీడ్కోలు పలికింది. సంస్థ త్రైమాసిక ఆదాయం కూడా 10 శాతం మేర క్షీణించడంతో ఈ నిర్ణయం తీసుకోక తప్పలేదని కంపెనీ వర్గాలు తెలిపాయి.

AI స్టార్టప్స్‌ లో పెట్టుబడులు పెట్టడానికి జూన్ లో ఇప్పటికే 1 బిలియన్ డాలర్లను సిస్కో కేటాయించింది. సైబర్ సెక్యూరిటీ సంస్థ ప్లంక్‌ను 28 బిలియన్ డాలర్లకు ఇటీవలే కొనుగోలు చేసింది. పునర్ నిర్మాణంలో భాగంగా తన సెక్యూరిటీ, నెట్‌వర్కింగ్, కొలాబరేషన్ విభాగాలను కలిపి ఒకే సంస్థగా మార్చాలని భావిస్తోంది. ఈ మేరకు తన ప్రణాళికలను SEC ఫైలింగ్ లో వెల్లడించింది. ఈ విషయం తెలుసుకున్న ఉద్యోగుల్లో ఆందోళన నెలకొంది.