Gold: చైనాలో ఎగబడి మరీ బంగారం కొంటున్న జనం! కారణం ఇదే!

ప్రస్తుతం చైనాలో 'గోల్డ్ రష్' నడుస్తోంది. తొమ్మిది రోజుల పాటు జరిగిన స్ప్రింగ్ ఫెస్టివల్ సెలవుల్లో అక్కడి ప్రజలు బంగారం కొనుగోలు చేయడానికి ఎగబడ్డారు. పండుగలు, పెళ్లిళ్లు, కానుకల సీజన్ కావడంతో చైనా మార్కెట్లు పసిడి కళతో కళకళలాడుతున్నాయి. గ్లోబల్ మార్కెట్‌ లో బంగారం ధర ఒక ఔన్సుకు $5,100 (దాదాపు 4.25 లక్షల రూపాయలు) దాటినప్పటికీ.. డిమాండ్ మాత్రం తగ్గకపోవడం విశేషం.

భారీ డిస్కౌంట్లతో ఊరిస్తున్న కంపెనీలు

కస్టమర్లను ఆకర్షించడానికి చైనాలోని ప్రముఖ జ్యువెలరీ బ్రాండ్లు భారీ ఆఫర్లను ప్రకటించాయి. 'చౌ తాయ్ ఫూక్' వంటి దిగ్గజ సంస్థలు ప్రతి గ్రాముపై భారీ తగ్గింపులు ఇవ్వగా మరికొన్ని స్టోర్లు మేకింగ్ ఛార్జీలపై రాయితీలు కల్పించాయి. కొన్ని చోట్ల గ్రాముకు 247 యువాన్ల వరకు ధర తగ్గించడంతో సామాన్యులు కూడా బంగారం కొనడానికి ఆసక్తి చూపారు. ముఖ్యంగా ఫిబ్రవరి 28 నుంచి ధరలు పెరగబోతున్నాయనే ప్రకటనతో కొనుగోలుదారులు మరింత వేగంగా షాపింగ్‌ ను ముగించే పనిలో పడ్డారు.

పెళ్లిళ్ల మార్కెట్ కీలకం

చైనాలో ప్రస్తుతం బంగారం కొనుగోలుకు ప్రధాన కారణం పెళ్లిళ్లు. అక్కడ పెళ్లి సమయంలో పూర్తి స్థాయిలో బంగారం (gold) సెట్ కొనడం ఒక ఆచారంగా మారింది. ఒక్కో పెళ్లి షాపింగ్ సగటు విలువ 1,00,000 యువాన్ల (సుమారు 11.5 లక్షల రూపాయలు) పైనే ఉంటోందని విక్రయదారులు చెబుతున్నారు. ప్రస్తుతం చైనా డొమెస్టిక్ మార్కెట్‌ లో గ్రాము బంగారం ధర 1,500 యువాన్లకు చేరుకుంది. గతేడాది స్ప్రింగ్ ఫెస్టివల్ ధరలతో పోలిస్తే ఇది దాదాపు రెట్టింపు కావడం గమనార్హం.

ధరలు ఎందుకు పెరుగుతున్నాయి?

బంగారం ధరలు ఆకాశాన్ని తాకడానికి ప్రధానంగా రెండు కారణాలు కనిపిస్తున్నాయి.
1. డాలర్ విలువపై ఆందోళన: అంతర్జాతీయంగా అమెరికా డాలర్ పరపతి పట్ల నమ్మకం తగ్గుతుండటంతో, ఇన్వెస్టర్లు సురక్షితమైన పెట్టుబడిగా బంగారాన్ని ఎంచుకుంటున్నారు.
2. భూభౌగోళిక ఉద్రిక్తతలు: 2026 ప్రారంభం నుండి అమెరికా , ఇరాన్ మధ్య ఘర్షణ వాతావరణం నెలకొంది. యుద్ధ మేఘాలు కమ్ముకున్నప్పుడల్లా 'హార్డ్ కరెన్సీ' అయిన gold కు డిమాండ్ పెరుగుతుంది.

సెంట్రల్ బ్యాంకుల బంగారు వేట

కేవలం సామాన్యులే కాదు, ప్రపంచవ్యాప్తంగా ఉన్న కేంద్ర బ్యాంకులు కూడా తమ గోల్డ్ రిజర్వ్‌లను పెంచుకుంటున్నాయి. వరల్డ్ గోల్డ్ కౌన్సిల్ నివేదిక ప్రకారం.. 2025 లో ప్రపంచవ్యాప్త బంగారానికి డిమాండ్ 5,000 టన్నులకు చేరి కొత్త రికార్డు సృష్టించింది. చైనా సెంట్రల్ బ్యాంక్ వరుసగా 15వ నెలలో కూడా తన నిల్వలను పెంచుకుంది. జనవరి నాటికి చైనా వద్ద 74.19 మిలియన్ ఔన్సుల బంగారం నిల్వలు ఉన్నాయి.

గ్లోబల్ టెన్షన్లు తగ్గే సూచనలు లేకపోవడంతో బంగారం ధరలు త్వరగా తగ్గే అవకాశం లేదని విశ్లేషకులు భావిస్తున్నారు. అయితే ధరలు ఇప్పటికే గరిష్ట స్థాయిలో ఉన్నందున పెట్టుబడి పెట్టేటప్పుడు కొంత అప్రమత్తంగా ఉండటం మంచిది.