చైనాలో రహస్యపు బంగారు గనులు.. నికెల్, రేనియంతో సహా 17 ఖనిజాల భారీ నిధి వెలుగులోకి..

China's Mineral, gold Reassessment: గ్లోబల్ టెక్నాలజీ, మైనింగ్, మౌలిక వసతుల రంగంలో తన ఆధిపత్యాన్ని మరింత బలోపేతం చేసుకునే దిశగా చైనా భారీ విజయాన్ని సాధించింది. దేశవ్యాప్తంగా ఏడాది పొడవునా కొనసాగిన సమగ్ర భూగర్భ సర్వేల అనంతరం బంగారం, నికెల్, రేనియం, జిర్కాన్ వంటి అత్యంత కీలకమైన అరుదైన ఖనిజాల నిల్వలు ఊహించని రీతిలో పెరిగినట్లు చైనా ప్రభుత్వ అధికారిక వార్తా సంస్థ 'జిన్హువా' నివేదించింది. చైనా సహజ వనరుల మంత్రిత్వ శాఖ విడుదల చేసిన వివరాల ప్రకారం.. ఈ నూతన ఆవిష్కరణలతో దేశీయ సరఫరా వ్యవస్థ మరింత బలోపేతం కానుంది.

తాజా నివేదిక ప్రకారం.. ఈ సర్వేలో అత్యంత ముఖ్యమైన పురోగతి రేనియం (Rhenium) ఖనిజ నిల్వలలో నమోదైంది. రేనియం వనరులు ఏకంగా 200 శాతానికి పైగా పెరిగాయి. రేనియం అనేది అత్యంత అరుదైన లోహం. అధిక ఉష్ణోగ్రతలను తట్టుకునే శక్తి దీనికి ఉండటంతో జెట్ ఇంజిన్‌ల తయారీ, మిలిటరీ ఏరోస్పేస్, రాకెట్ టెక్నాలజీ మిశ్రమలోహాలలో దీనిని విస్తృతంగా ఉపయోగిస్తారు. దీనితో పాటు కొత్తగా గుర్తించిన బంగారం, నికెల్ వనరులు వరుసగా 50 మరియు 30 ప్రధాన భారీ గనుల నిల్వలకు సమానమని అధికారులు వెల్లడించారు. అలాగే గాలియం, ఇండియం, టాంటలం, వెనేడియం వంటి కీలక సాంకేతిక లోహాల కొత్త వనరులు కూడా గణనీయంగా పెరిగాయి.

ఈ ప్రాజెక్ట్‌లో భాగంగా చైనా వాయువ్య ప్రాంతమైన జిన్‌జియాంగ్‌లోని బైచెంగ్ ప్రాంతంలో దేశంలోనే మొట్టమొదటి ప్లేసర్ జిర్కాన్ (Zircon) నిల్వలను కనుగొంది. పురాతన నదులు, సరస్సుల నిక్షేపాల వల్ల ఏర్పడిన ఈ నిధి, చైనాకు తీవ్ర ఊరటనివ్వనుంది. ఇప్పటివరకు చైనా జిర్కాన్ అవసరాల కోసం ఇతర దేశాల దిగుమతులపైనే పూర్తిగా ఆధారపడుతుండేది. జిర్కాన్ నుండి సేకరించే జిర్కోనియంను అణు రియాక్టర్లలోని రేడియోయాక్టివ్ ఇంధన కడ్డీల (Nuclear Fuel Rods) బయటి రక్షణ పొర తయారీలోనూ, అంతరిక్ష వ్యోమనౌకల భాగాలలోనూ ఉపయోగిస్తారు.

Also Read

బంగారం కావాలంటే చైనాకు పోవాల్సిందే.. ఒక్క వ్యూహంతో లండన్, న్యూయార్క్ మార్కెట్లను కుప్పకూల్చబోతున్న బీజింగ్..

గతంలో తక్కువ నాణ్యత కలిగినవిగా లేదా వెలికితీత కష్టమని భావించి విడిచిపెట్టిన గనులను ఆధునిక సాంకేతికతతో మళ్లీ తనిఖీ చేయడం ద్వారా ఈ నిల్వలను పునరుద్ధరించారు. మొత్తం 17 కీలక ఖనిజాలపై దృష్టి సారించి, చైనా వ్యాప్తంగా ఉన్న 27 ప్రావిన్సులు, స్వయంప్రతిపత్తి ప్రాంతాలు, మునిసిపాలిటీలలో ఈ సర్వే సాగింది. సుమారు 1,800 కి పైగా నడుస్తున్న గనులు, పెద్ద, మధ్య తరహా మైనింగ్ ప్రాంతాలలో నిర్వహించిన ఈ పరిశోధనల్లో 100 కంటే ఎక్కువ సంస్థలు, 2,000 మందికి పైగా సర్వేయర్లు పాల్గొన్నారు. తాజా ఆవిష్కరణలతో చైనా కీలక రక్షణ, ఏరోస్పేస్, క్లీన్ ఎనర్జీ రంగాలు విదేశీ సరఫరాలపై ఆధారపడే పరిస్థితి గణనీయంగా తగ్గుతుందని విశ్లేషకులు భావిస్తున్నారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.