China Vs Trump: ట్రంపుకు ఇచ్చిపడేసిన చైనా.. వాణిజ్య యుద్ధం స్టార్ట్, ఇండియాపై ప్రభావం ఇదే..

Trump Tariffs News: ట్రంప్ అమెరికా అధ్యక్షుడిగా అడుగు పెట్టి రెండు వారాలు కూడా కాకుండానే పరిస్థితులు పూర్తిగా మారిపోతున్నాయి. అందరూ ఊహించినట్లు ట్రంప్ చైనా, మెక్సికో, కెనడాలపై టారిఫ్స్ ప్రకటించిన సంగతి తెలిసిందే. అయితే కెనడా, మెక్సికోలపై ప్రకటించిన పన్నులను కొన్ని గంటల్లోనే వెనక్కి తీసుకోగా చైనా విషయంలో మాత్రం తగ్గేదే లే అన్నట్లుగా ముందుకు సాగుతున్నారు.

కొన్ని గంటల కిందట అమెరికా అధ్యక్షుడి డొనాల్డ్ ట్రంప్ చైనా నుంచి చేసుకునే దిగుమతులపై 10 శాతం వాణిజ్య పన్ను విధిస్తున్నట్లు వెల్లడించారు. వాస్తవానికి ఇలాంటి పరిస్థితిని ముందుగానే ఊహించి సిద్ధంగా ఉన్నట్లు కనిపిస్తోంది. ట్రంప్ ప్రకటన తర్వాత అమెరికా నుంచి బొగ్గు, ఎల్ఎన్జీ ఉత్పత్తులపై 15 శాతం దిగుమతి సుంకం విధిస్తున్నట్లు ప్రకటించింది. దీంతో రెండు దేశాల మధ్య వాణిజ్య యుద్ధం స్టార్ట్ కావటం ప్రపంచ దేశాలను కూడా ఆందోళనలకు గురిచేస్తోంది.

ఇదే క్రమంలో అమెరికా నుంచి దిగుమతి చేసుకునే ముడి చమురు, వ్యవసాయ పరికరాలు, పికప్ ట్రక్కులు, పెద్ద ఇంజిన్ స్పోర్ట్స్ కార్ల వంటి అధిక పనితీరు గల ఆటోమొబైల్స్ ఉత్పత్తులపై కూడా 10% సుంకాలను విధించే ప్లాన్‌లో ఉన్నట్లు చైనా ఆర్థిక మంత్రిత్వ శాఖ వెల్లడించింది. అమెరికా ఏకపక్షంగా సుంకాలను పెంచటం వల్లే తాము కూడా పన్నులు పెంచాల్సిన పరిస్థితి ఏర్పడిందని చైనా ప్రస్తుత పరిస్థితులపై తన అభిప్రాయాన్ని వ్యక్తం చేసింది. పెంచబడిన టారిఫ్స్ సోమవారం నుంచి అధికారంలోకి వస్తాయని చైనా వెల్లడించింది.

అమెరికా ఏకపక్షంగా సుంకాలను పెంచటం వరల్డ్ ట్రేడ్ ఆర్గనైజేషన్ నిబంధనలను అతిక్రమించటమేనని చైనా ఆర్థిక మంత్రిత్వ శాఖ పేర్కొంది. ఇది సమస్యల పరిష్కారానికి విరుద్ధంగా మారి అమెరికా చైనాల మధ్య ఆర్థిక వ్యాపార సహకారాన్ని దెబ్బతీస్తుందని పేర్కొంది. ఇదే క్రమంలో చైనా.. అనుమానిత యాంటీట్రస్ట్ నేరాలకు సంబంధించి అమెరికా టెక్ దిగ్గజం గూగుల్‌పై దర్యాప్తు చేస్తుందని బ్లూమ్‌బెర్గ్ నివేదించింది. గూగుల్ కన్జూమర్ సెర్చ్, ఇంటర్నెట్ సేవలను 2010లోనే ముగించినప్పటిక.. అడ్వర్టైజింగ్ రంగంలో మాత్రం ఇప్పటికీ ఉనికిని కలిగి ఉన్న సంగతి తెలిసిందే.

యూఎస్ అధ్యక్షుడు ట్రంప్ కెనడా, మెక్సికోలపై ప్రకటించిన 25 శాతం టారిఫ్ రేట్లను మరో 30 రోజుల పాటు వాయిదా వేస్తున్నట్లు నేడు ప్రకటించటం ఆ దేశాలకు కొంత ఊరటను కలిగిస్తోంది. కెనడా ప్రధాని జస్టిన్ ట్రూడో వలసలను పరిష్కరించడానికి, ప్రమాదకరమైన డ్రగ్ ఫెంటానిల్ అమెరికాలోకి అక్రమంగా తరలించటాన్ని అరికట్టడానికి చర్యలు తీసుకుని దేశ సరిహద్దును బలోపేతం చేస్తానని అంగీకరించటంతో టారిఫ్స్ వాయిదా పడ్డాయి. ఇదే క్రమంలో చైనా వరల్డ్ ట్రేడ్ ఆర్గనైజేషన్ వద్ద ట్రంప్ తాజా టారిఫ్ రేట్లపై ఫిర్యాదు చేసింది. వాటిని దురుద్దేశ పూర్వకంగా డ్రాగన్ దేశం పేర్కొంది.

అమెరికా నుంచి టారిఫ్ బెదిరింపులు అందుకున్న వాటిలో ఇండియా కూడా ఉన్న సంగతి తెలిసిందే. అయితే ట్రంపు ప్రభుత్వంతో ఇండియా ఎలా ఈ విషయంలో ముందుకు సాగుతుందనేదాని ప్రకారం సుంకాలు ఉంటాయా ఉండవా అనేది తెలుస్తుంది. రానున్న రోజుల్లో దీనిపై మరింత స్పష్టత వచ్చే అవకాశం ఉందని నిపుణులు చెబుతున్నారు.