ప్రపంచాన్ని కలవరపరుస్తున్న చైనా సీక్రెట్ గోల్డ్ గేమ్.. 10 ఏళ్లలో ఎన్నడూ లేనంతగా బంగారం కొనుగోలు..

China Gold Buying: ప్రపంచ విలువైన లోహాల మార్కెట్‌లో బంగారం వినియోగం, ఉత్పత్తి, నిల్వల మళ్లింపునకు సంబంధించి కీలక పరిణామాలు చోటుచేసుకుంటున్నాయి. ప్రముఖ విశ్లేషణ సంస్థ హెరేయస్ వెల్లడించిన గణాంకాల ప్రకారం 2026 సంవత్సరంలో చైనా బంగారం దిగుమతులు రికార్డు స్థాయిలో ఊపందుకున్నాయి. ఈ కొనుగోలు వేగం సంవత్సరం చివరి వరకు ఇలాగే కొనసాగితే, చైనా మొత్తం వార్షిక దిగుమతులు దాదాపు 1,700 టన్నులకు చేరుకోవచ్చని అంచనా వేస్తున్నారు.

ఇది గత ఒక దశాబ్ద కాలంలోనే అత్యధిక స్థాయి కావడం గమనార్హం. కేవలం ఆగస్టు నెలలోనే చైనా 142 టన్నుల బంగారాన్ని దిగుమతి చేసుకోగా.. 2026 మొదటి ఎనిమిది నెలల వ్యవధిలో మొత్తం దిగుమతులు 1,141 టన్నులకు చేరాయి. ఇది గత ఏడాది ఇదే కాలంలో నమోదైన 663 టన్నులతో పోలిస్తే 72 శాతం అధికం కావడం విశేషం. అంతేకాకుండా 2025 లెక్కింపుల ప్రకారం ఏడాది మొత్తంలో దిగుమతి అయిన 940 టన్నుల మార్కును ఎనిమిది నెలల్లోనే దాటేసింది.

అంతర్జాతీయంగా బంగారం ధరలు చారిత్రాత్మక గరిష్ఠాల వద్ద కొనసాగుతున్నప్పటికీ చైనాలో పెట్టుబడి రూపంలో డిమాండ్ బలంగా ఉండటమే దీనికి కారణం. అయితే అక్కడ ఆభరణాల డిమాండ్ మాత్రం మందగించింది. ఇవి ద్రవ్యేతర దిగుమతులు కాగా, చైనా సెంట్రల్ బ్యాంక్ తన అధికారిక నిల్వల కోసం ఆగస్టులో అదనంగా మరొక 20 టన్నుల బంగారాన్ని కొనుగోలు చేసింది.

మరోవైపు ఆస్ట్రేలియాలో బంగారం ఉత్పత్తి గణనీయంగా పుంజుకుంటోంది. జూన్‌తో ముగిసిన ఆర్థిక సంవత్సరంలో ఆస్ట్రేలియా 303 టన్నుల బంగారాన్ని ఉత్పత్తి చేసి తన దీర్ఘకాలిక ఉత్పత్తి లక్ష్యమైన 300 టన్నులకు అనుగుణంగా నిలిచింది. గ్లోబల్ మార్కెట్‌లో అధిక ధరలు లభించడంతో చిన్న తరహా మైనింగ్ సంస్థలు సైతం తమ కార్యకలాపాలను పునఃప్రారంభించాయి. 2025 నాటి ప్రపంచ మొత్తం బంగారు ఉత్పత్తి లక్ష్యమైన 3,822 టన్నులలో ఒక్క ఆస్ట్రేలియా వాటానే సుమారు 8 శాతంగా నమోదుకావడం విశేషం.

Also Read

అదను చూసి కొంపలు ముంచబోతున్న చైనా.. ప్రధాని మోదీ అందుకే బంగారంపై పిచ్చిని వదిలేయమన్నాడా..

ఇదే సమయంలో ఆసియాలోని మరొక దేశం ఇండోనేషియా తమ వద్ద ఉన్న ప్రైవేట్ బంగారాన్ని అధికారిక ఆర్థిక వ్యవస్థలోకి తీసుకురావడానికి కొత్త ప్రణాళికను సిద్ధం చేస్తోంది. ఇండోనేషియాలోని సాధారణ కుటుంబాల వద్ద సుమారు 1,800 టన్నుల బంగారం అన్-అఫీషియల్‌గా ఉందనేది ప్రభుత్వ అంచనా. ఇందులో దాదాపు 20 శాతం అంటే 360 టన్నుల బంగారాన్ని డిపాజిట్లు, పూచీకత్తు వంటి బ్యాంకింగ్ ఉత్పత్తులలోకి మళ్లించడం ద్వారా దేశీయ ఆర్థిక వ్యవస్థను మరింత బలోపేతం చేయాలని అక్కడ ప్రభుత్వం భావిస్తోంది.

ఇక భారతదేశం విషయానికి వస్తే.. బలహీనమైన రుతుపవనాల కారణంగా రాబోయే పండుగలు, పెళ్లిళ్ల సీజన్‌లో గ్రామీణ ప్రాంతాల్లో బంగారం డిమాండ్‌పై ప్రతికూల ప్రభావం పడే అవకాశాలు కనిపిస్తున్నాయి. సెప్టెంబర్ నెలాఖరు నాటికి నమోదైన వర్షపాతం దీర్ఘకాల సగటు కంటే 15 శాతం తక్కువగా ఉంది. తక్కువ వర్షపాతం వల్ల పంట దిగుబడులు తగ్గి గ్రామీణ ప్రజల ఆదాయం పడిపోయే ప్రమాదం ఉంది.

వరల్డ్ గోల్డ్ కౌన్సిల్ చారిత్రక విశ్లేషణ ప్రకారం సాధారణ వర్షపాతంలో ప్రతి 1 శాతం పెరుగుదల బంగారం డిమాండ్‌ను 0.2 శాతం పెంచుతుంది. కాబట్టి ఈ సారి కురిసిన తక్కువ వర్షపాతం వల్ల భారతీయ డిమాండ్ కొంత దెబ్బతినే అవకాశం ఉంది. కాగా 2025 గణాంకాల ప్రకారం భారతదేశ మొత్తం బంగారం డిమాండ్ 768 టన్నులుగా నమోదై, ప్రపంచవ్యాప్త డిమాండ్‌లో 15 శాతాన్ని ఆక్రమించింది.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.