China: పొరుగుదేశం చైనాకు దెబ్బమీద దెబ్బ.. ప్రతి ద్రవ్యోల్బణంతో సతమతం

China: ప్రపంచ కర్మాగారంగా పేరొందిన చైనా పేరు ప్రఖ్యాతులు, ఆర్థిక స్థితిగతులు మసకబారుతున్నాయి. కొవిడ్ సంక్షోభం వల్ల తీవ్ర ఇబ్బందులు ఎదుర్కోగా, దేశీయ సమస్యలు సైతం డ్రాగన్ కంట్రీని వేధిస్తున్నాయి. దేశవ్యాప్తంగా డిమాండ్ బలహీనపడటంతో ప్రతి ద్రవ్యోల్బణాన్ని(deflation) ఎదుర్కొంటోంది. ఇటీవల బ్రోకరేజ్ సంస్థ మోర్గాన్ స్టాన్లీ కూడా చైనా రేటింగ్‌ ను తగ్గిచడం గమనార్హం.

2021 తర్వాత చైనాలో మరోసారి కన్స్యూమర్, ప్రొడ్యూసర్ ప్రైసెస్ రెండూ క్షీణించాయి. ప్రపంచంలోని రెండవ అతిపెద్ద ఆర్థిక వ్యవస్థలో ఇలా డిమాండ్ బలహీనపడటం తీవ్ర ప్రతి ద్రవ్యోల్బణానికి సంకేతమని భావిస్తున్నారు. ప్రొడ్యూసర్ ప్రైస్ ఇండెక్స్ 4.1 శాతం మేర పడిపోతుందని ఆర్థికవేత్తలు అంచనా వేశారు. అయితే వాటిని తలక్రిందులు చేస్తూ 4.4 శాతం మేర క్షీణించి షాక్ ఇచ్చింది.

నేషనల్ బ్యూరో ఆఫ్ స్టాటిస్టిక్స్ (NBS) ప్రకారం.. గతేడాది ఇదే కాలంతో పోలిస్తే జూలైలో కన్స్యూమర్ ప్రైస్ ఇండెక్స్ 0.3 శాతం పడిపోయింది. బ్లూమ్‌బెర్గ్ 0.4 శాతం మేర క్షీణతను అంచనా వేసినప్పటికీ.. దేశీయంగా వ్యయం మందగించడంతో దాని ప్రభావం కొవిడ్ అనంతర ఆర్థిక పునరుద్ధరణపై పడినట్లు విశ్లేషకులు అంచనా వేస్తున్నారు.

గత నెలలో బీజింగ్ ఎగుమతులు 3 ఏళ్లతో పోలిస్తే మెరుపు వేగంతో పడిపోయాయని NBS డేటా హెచ్చరిచింది. వినియోగదారులు స్పెండింగ్ ఎబిలిటీ తగ్గడంతో వరుసగా తొమ్మిదో నెల కూడా దిగుమతులు తగ్గాయి. డిమాండ్ పడిపోవడంతో కంపెనీలు ఉత్పత్తిని, ఆయా వస్తువుల రేట్లను తగ్గించాల్సి వస్తోంది. ఇది కాస్తా ఉద్యోగుల తొలగింపు, నియామకాలు స్తంభించడానికి కారణమవుతోంది.