దావోస్‌లో ఏపీ సీఎం మాస్టర్ ప్లాన్! ఏపీకి 40 కంపెనీలు.. ఫుల్ డీటెయిల్స్ ఇవే!

ప్రపంచ ఆర్థిక వేదిక (WEF) 2026 వేదికగా ఆంధ్రప్రదేశ్ రాష్ట్రం అంతర్జాతీయ పారిశ్రామిక రంగంలో తన ముద్రను బలంగా వేస్తోంది. ముఖ్యమంత్రి చంద్రబాబు నాయుడు (Chandrababu Naidu), యూఏఈ ఆర్థిక శాఖ మంత్రి అబ్దుల్లా బిన్ తౌక్ అల్ మర్రి మధ్య జరిగిన చర్చలు ఏపీ పారిశ్రామిక భవిష్యత్తును మలుపు తిప్పేలా సాగాయి. ఈ భేటీలో సుమారు 40 యూఏఈ కంపెనీలు ఆంధ్రప్రదేశ్‌లో తమ బిజినెస్ యూనిట్లను ఏర్పాటు చేసేందుకు ఆసక్తి కనబరచడం ఒక కీలక పరిణామం.

మల్టీ-సెక్టార్ పెట్టుబడులు: ఏపీకి చేకూరే ఆర్థిక ప్రయోజనాలు

ఈ భేటీలో ప్రధానంగా లాజిస్టిక్స్, ఎనర్జీ, ఫుడ్ ప్రాసెసింగ్, రిటైల్ రంగాలపై దృష్టి సారించారు. ఇందులో ముఖ్యమైన బిజినెస్ డీల్స్ ఇవే..

• లాజిస్టిక్స్ & పోర్ట్స్: గ్లోబల్ లాజిస్టిక్స్ లీడర్ 'డిపి వరల్డ్' (DP World) ఏపీలోని పోర్టుల అభివృద్ధి, అంతర్జాతీయ స్థాయి పోర్ట్ టెర్మినల్స్ నిర్మాణంలో భాగస్వామి కానుంది. అలాగే, 'షరాఫ్ గ్రూప్' (Sharaf Group) ఒక మల్టీ-మోడల్ లాజిస్టిక్స్ పార్కును ఏర్పాటు చేసేందుకు ప్రతిపాదించింది. దీనివల్ల రాష్ట్రం నుండి ఎగుమతులు, దిగుమతుల సామర్థ్యం గణనీయంగా పెరుగుతుంది.
• ఫుడ్ ప్రాసెసింగ్ ఎకోసిస్టమ్: యూఏఈ ప్రభుత్వం ఏపీలోని ఫుడ్ ప్రాసెసింగ్ రంగానికి పూర్తి సహకారం అందించనుంది. దుబాయ్ ఫుడ్ క్లస్టర్‌ తో అనుసంధానం కావడం వల్ల ఏపీ వ్యవసాయ ఉత్పత్తులకు గ్లోబల్ సప్లై చైన్‌ లో ప్రాధాన్యత లభిస్తుంది.
• ఇంధన రంగం (Energy Sector): అబుదాబి నేషనల్ ఆయిల్ కంపెనీ (ADNOC) రాష్ట్రంలో ఫ్లోటింగ్ స్టోరేజ్, రీగ్యాసిఫికేషన్ యూనిట్‌ ను ఏర్పాటు చేయడానికి సిద్ధమైంది. ఇది రాష్ట్ర పారిశ్రామిక అవసరాలకు అవసరమైన సహజ వాయువు సరఫరాను సులభతరం చేస్తుంది.
• రిటైల్ & కన్‌స్ట్రక్షన్: రిటైల్ రంగంలో దిగ్గజ సంస్థ 'లూలూ గ్రూప్' విశాఖపట్నంలో మెగా షాపింగ్ మాల్‌ ను ప్రారంభించనుంది. మరోవైపు, రాజధాని అమరావతిలో 'లైట్ గేజ్ స్టీల్ ఫ్రేమింగ్' టెక్నాలజీతో కూడిన ఆధునిక కన్‌స్ట్రక్షన్ యూనిట్ రానుంది.

బజినెస్ ఫ్రెండ్లీ ఏపీ

ఏపీలో ఉన్న సుదీర్ఘ తీర ప్రాంతం, పోర్ట్-ఆధారిత పరిశ్రమలకు ఉన్న అవకాశాలు, రవాణా సౌకర్యాలను సీఎం చంద్రబాబు నాయుడు (Chandrababu Naidu) బిజినెస్ కోణంలో వివరించారు. ముఖ్యంగా ఫుడ్ సేఫ్టీ, రిన్యూవబుల్ ఎనర్జీ, అర్బన్ డెవలప్‌మెంట్ రంగాలలో ఉన్న విస్తృత అవకాశాలను యూఏఈ ప్రతినిధి బృందం సానుకూలంగా పరిగణించింది.

ఆర్థిక వృద్ధి.. ఉపాధి..

ఈ వ్యూహాత్మక భాగస్వామ్యం కేవలం పెట్టుబడులకే పరిమితం కాకుండా, భారీ స్థాయిలో ప్రత్యక్ష మరియు పరోక్ష ఉపాధిని కల్పించనుంది. అంతర్జాతీయ సంస్థల రాకతో రాష్ట్రంలోని స్థానిక పరిశ్రమలకు కూడా గ్లోబల్ టెక్నాలజీతో పాటు మార్కెట్ యాక్సెస్ లభిస్తుంది. 2026 'భారత్-ఫ్రాన్స్ ఇన్నోవేషన్ ఇయర్' తరహాలోనే, ఏపీ-యూఏఈ భాగస్వామ్యం కూడా రాష్ట్ర ఆర్థిక వ్యవస్థకు ఒక కొత్త ఇంజిన్‌లా పనిచేయనుంది.