Vedanta: అనిల్ అగర్వాల్ కంపెనీకి ట్యాక్స్ నోటీస్.. అప్పిలేట్ అథారిటీలో ఛాలెంజ్‌కు రెడీ

Vedanta: కోర్డు ఆదేశాల ప్రకారం 2021-22 అసెస్‌ మెంట్ ఏడాదికిగాను వేదాంత లిమిటెడ్‌ కు వడ్డీతో సహా 190 కోట్ల ట్యాక్స్ రిఫండ్ ఇచ్చేందుకు ఆదాయపు పన్ను శాఖ ఇటీవల అంగీకరించింది. అయితే తాజాగా దాని అనుబంధ సంస్థకు మరో ట్యాక్స్ నోటీసు షాక్ ఇచ్చింది.

అనిల్ అగర్వాల్‌ కు చెందిన వేదాంత అనుబంధ సంస్థ హిందుస్థాన్ జింక్‌ కు వస్తు, సేవల పన్ను(GST) విభాగం ట్యాక్స్ నోటీసు జారీ చేసింది. 1.81 కోట్ల మేర జరిమానా విధించినట్లు వేదాంత తన ఎక్స్ఛేంజ్ ఫైలింగ్‌ లో పేర్కొంది. అక్టోబర్ 8న తమకు నోటీసు అందినట్లు తెలిపింది.

"CGST చట్టం 2017లోని సెక్షన్ 74(9) ప్రకారం 1.81 కోట్ల జరిమానా విధిస్తూ.. DV-A, సెంట్రల్ GST ఆడిట్ సర్కిల్, CGST, ఉదయపూర్ నుంచి కంపెనీకి నోటీస్ వచ్చింది. జూలై 2017 నుంచి మార్చి 2018 మధ్య కాలానికి ఈ నోటీస్ పంపినట్లు అందులో పేర్కొనబడింది" అని వేదాంత లిమిటెడ్ వెల్లడించింది.

"కంపెనీ ఇన్‌పుట్ ట్యాక్స్ క్రెడిట్‌ను తప్పుగా పొందిందన్న ఆరోపణలపై ఈ నోటీస్ వచ్చింది" అని వేదాంత పేర్కొంది. అప్పీలేట్ అథారిటీ వద్ద దీన్ని ఛాలెంజ్ చేయనున్నట్లు తెలిపింది. అక్కడ అనుకూలమైన ఫలితం వస్తుందని ఆశిస్తున్నట్లు చెప్పింది. అయితే ఈ నోటీసులు కంపెనీపై ఎటువంటి ఆర్థిక ప్రభావాన్ని చూపవని ఆశిస్తున్నట్లు స్పష్టం చేసింది.