బీచ్‌లో సేద తీరుతానని చెప్పి, లక్షల కోట్ల కంపెనీ సీఈవో రాజీనామా

లక్షల కోట్ల పెట్టుబడి సంస్థకు సీఈవో అతను. అనూహ్యంగా అతను కీలక నిర్ణయం తీసుకున్నాడు. హఠాత్తుగా రాజీనామా నిర్ణయాన్ని ప్రకటించాడు. సాధారణంగా ఎవరైనా రాజీనామా చేస్తే కొత్త సంస్థ స్థాపనకు లేదా మరో సంస్థల ఉన్నత స్థానంలో చేరడానికి లేదా ఆరోగ్యపరమైన సమస్యలు తదితర కారణాలు ఉంటాయి. కానీ ఇతను రాజీనామా చేసింది మాత్రం కేవలం బీచ్‌లో సేద తీరడానికి. ఆశ్చర్యంగా అనిపించినా అతను చెబుతోంది మాత్రం ఇదే.

యూకే ప్రధాన కార్యాలయంగా ఉన్న ఫండింగ్ సంస్థ జుపిటర్ ఫండ్ మేనేజ్‌మెంట్ సీఈవో కమ్ డైరెక్టర్ ఆండ్రూ ఫార్మికా. అతని వయస్సు 51. తాజాగా, అతను రాజీనామా చేశాడని, అక్టోబర్ 1వ తేదీ నుండి అతను వైదొలుగుతున్నట్లు కంపెనీ ప్రకటించింది. ఈ సంస్థ బాధ్యతలు చేపట్టిన మూడేళ్లకే తప్పుకుంటున్నాడు. 2019లో అతను ఈ 68 బిలియన్ డాలర్లు లేదా రూ.5 లక్షల కోట్ల జుపిటర్ సంస్థ బాధ్యతలు తీసుకున్నాడు.

Image Credit: Twitter

అతను వ్యక్తిగత కారణాలతో సంస్థకు గుడ్ బై చెప్పినట్లుగా వార్తలు వస్తున్నాయి. కానీ అతను మాత్రం ఓ మీడియా సంస్థతో మాట్లాడుతూ... నేను బీచ్‌లో కూర్చొని ఏమీ చేయకుండా, కాలక్షేపం చేద్దామని భావిస్తున్నాను అని పేర్కొన్నారు. తాను ఎందులోను చేరాలని భావించడం లేదన్నారు.