Budget 2024: కొత్త బడ్జెట్‌లో తీపికబురు.. గృహ రుణాలపై ఆ లిమిట్ 150% పెంపు..? నిర్మలమ్మ దయ..

Budget news: సామాన్యులకు పన్ను ప్రయోజనాలు అందిస్తూనే పెద్ద మొత్తంలో ట్యాక్స్ వసూలు చేసేందుకు కేంద్రం ప్రయత్నిస్తోంది. త్వరలో సార్వత్రిక ఎన్నికలు జరగనుండగా.. ఈ ఫిబ్రవరిలో ప్రవేశపెట్టే బడ్జెట్ మోదీ 2.0 ప్రభుత్వానికి చివరిది కానుంది. దీంతో ఇందులో పలు తాయిలాలు ప్రకటించవచ్చని అంచనాలు ఉన్నాయి.

గృహ రుణాలపై ఇప్పటి వరకు ఇస్తున్న ఆదాయపు పన్ను మినహాయింపును పెంచాలని ట్యాక్స్ పేయర్స్ ఎప్పటినుంచో డిమాండ్ చేస్తున్నారు. 2024-25 కేంద్ర బడ్జెట్‌లో దీనిపై సానుకూల నిర్ణయం వెలువడుతుందని విశ్లేషకులు భావిస్తున్నారు. వడ్డీ చెల్లింపు పరిమితిని ప్రస్తుతమున్న 2 లక్షల నుంచి 5 లక్షల మేరకు పెంచవచ్చని చెబుతున్నారు.

ఇళ్ల కొనుగోలుకు సంబంధించి ట్యాక్స్ మినహాయింపును గణనీయంగా పెంచాలని కాన్ఫెడరేషన్ ఆఫ్ రియల్ ఎస్టేట్ డెవలపర్స్ అసోసియేషన్ ఆఫ్ ఇండియా (CREDAI) ఒత్తిడి చేస్తోంది. తద్వారా రియల్ ఎస్టేట్ రంగంలోనూ మంచి బూమ్ వస్తుందని సూచిస్తోంది. పెరిగిన గృహ రుణం వడ్డీ రేట్లు వినియోగదారులకు సవాలుగా మారినట్లు తెలిపింది. ఈ కారణంగా EMIలపై అధిక ప్రభావం పడుతోందని వాదిస్తోంది.

2024 రెండవ త్రైమాసికం వరకు రెపో రేటు తగ్గకపోవచ్చని క్రెడాయ్ అంచనా వేసింది. ప్రస్తుతం వడ్డీ రేట్లు భారీ స్థాయిలో ఉండటంతో కొనుగోలుదార్ల నుంచి డిమాండ్ తగ్గినట్లు CREDAI వాదిస్తోంది. స్థిరమైన వృద్ధిని సాధించాలంటే డిమాండ్ పెరగాలని, ఇందుకోసం పన్ను చెల్లింపుదారులకు ఆకర్షణీయమైన ట్యాక్స్ ప్రయోజనాలను అందించాలని క్రెడాయ్ ఛైర్మన్ మనోజ్ గౌర్ అభిప్రాయపడ్డారు.