వ్యాక్సీన్ ప్రైసింగ్ సమర్థనీయమే: ప్రకటించిన సీరమ్ ఇనిస్టిట్యూట్

గ్లోబల్ వ్యాక్సీన్ తయారీ సంస్థ సీరమ్ ఇనిస్టిట్యూట్ ఆఫ్ ఇండియా (SII) తమ కరోనా వ్యాక్సీన్ విక్రయ ధరల విధానాన్ని సమర్థించుకున్నది. అడ్వాన్స్ ఫండింగ్ ద్వారా తొలుత నిర్ణయించిన ధర కంటే 1.5 రెట్లు పెంచింది సీరమ్. దీనిపై విపక్షాలు భగ్గుమన్నాయి. శనివారం సీరమ్ సంస్థ తమ నిర్ణయం సమర్థనీయమేనని పేర్కొంది.

ఇప్పుడు వ్యాక్సీన్ల ఉత్పాదక సామర్థ్యం పెంచేందుకు పెట్టుబడులు పెట్టనుంది సీరమ్. ఆస్ట్రా జెనికా, ఆక్స్‌ఫర్డ్ యూనివర్సిటీతో కలిసి కొవిషీల్డ్ వ్యాక్సిన్‌ను డెవలప్ చేసింది సీరం ఇనిస్టిట్యూట్ ఆఫ్ ఇండియా. సీరంకు పుణెలో ఉత్పాదక యూనిట్ ఉంది.

ప్రయివేటు దవాఖానాలకు రూ.600, రాష్ట్ర ప్రభుత్వాలకు రూ.400, కేంద్రానికి సరఫరా చేసే వ్యాక్సీన్లపై రూ.150 వసూలు చేయనున్నట్లు ఈ వారం ప్రారంభంలో ప్రకటించింది. అంతర్జాతీయ ధరలతో పోలిస్తే సీరం వ్యాక్సీన్ ధర సరిగా లేదని అంటున్నారు. మార్కెట్‌లో చౌక ధరకు లభిస్తున్న వ్యాక్సీన్ కొవిషీల్డ్ అని సీరం పేర్కొంది.

ఇదిలా ఉండగా, కోవిడ్ వ్యాక్సీన్ ధరలను కాస్త తగ్గించాలని సీరమ్ ఇనిస్టిట్యూట్, భారత్ బయోటెక్‌లకు కేంద్ర ప్రభుత్వం సూచించింది. పలు రాష్ట్రాల నుండి విమర్శల నేపథ్యంలో కేంద్ర ప్రభుత్వం ఆదేశాలు జారీ చేసింది.