Bike Taxi: బైక్ ట్యాక్సీ సేవలపై కేంద్రం కీలక నిర్ణయం.. ఓలా, ర్యాపిడో, ఉబర్‌లకు ఇక పండగే..

Ride sharing: బైక్ ట్యాక్సీ సేవలు నిరుద్యోగులకు ఓ వరంలా మారాయి అనడంలో సందేహం లేదు. ఎటువంటి అనుభవం, నైపుణ్యాలు లేకపోయినా కేవలం బైక్ రైడింగ్ వస్తే చాలు ఎంతోకొంత సంపాదించుకునే మార్గం చూపించాయి. అయితే ఇటీవల వీటిపై ఆయా రాష్ట్ర ప్రభుత్వాలు నిషేధం విధిస్తుండటంతో తీవ్ర ఆందోళన నెలకొంది.

రోడ్డు రవాణా మరియు రహదారుల మంత్రిత్వ శాఖ (MoRTH) బైక్ ట్యాక్సీ సేవలపై కీలక నిర్ణయం తీసుకుంది. మోటారు వాహనాల (MV) చట్టం ప్రకారం మోటార్‌సైకిళ్లను కాంట్రాక్ట్ క్యారేజీలుగా వర్గీకరించడాన్ని హైలైట్ చేసింది. దీంతో ఢిల్లీ మరియు మహారాష్ట్ర వంటి మెట్రో నగరాల్లో ఈ సేవలపై ప్రస్తుతం ఉన్న నిషేధాన్ని ఎత్తివేయడానికి మార్గం సుగమం చేసింది.

సరైన వాణిజ్య లైసెన్స్ లేకుండా బైక్ ట్యాక్సీలను నడపడం చట్టాన్ని ఉల్లంఘించడమేనని ఢిల్లీ ప్రభుత్వం ఇటీవల హెచ్చరించింది. ఇందుకుగాను వెయ్యి వరకు జరిమానా సహా 3 సంవత్సరాల పాటు లైసెన్స్ సస్పెండ్ చేస్తామని ప్రకటించింది. బైక్ టాక్సీ సేవలు మహారాష్ట్ర మరియు ఢిల్లీలో నిషేధాన్ని ఎదుర్కొన్నప్పటికీ.. గోవా, రాజస్థాన్ మరియు ఉత్తరప్రదేశ్ వంటి రాష్ట్రాలు ఈ కార్యకలాపాలను అనుమతించాయి.

MoRTH కొత్త మార్గదర్శకాల ప్రకారం.. అన్ని రాష్ట్రాలు మరియు కేంద్ర పాలిత ప్రాంతాలు MV చట్టంలోని నిబంధనలు అనుసరించాలని కేంద్రం ఆదేశించింది. మోటార్ సైకిళ్ల కాంట్రాక్ట్ క్యారేజ్ పర్మిట్‌ల కోసం దరఖాస్తులను ఆమోదించాలని, వాటిని ప్రాసెస్ చేయాలని సూచించింది. ఈ నిర్ణయం ద్వారా ఉద్యోగ అవకాశాలతో పాటు ప్రయాణీకులకు ప్రత్యామ్నాయ రవాణా విధానాన్ని అందిస్తుందని నిపుణులు భావిస్తున్నారు.