పొగాకు ఉత్పత్తులపై కేంద్రం కీలక నిర్ణయం.. వాటిపై GST సెస్ కు పరిమితి విధింపు

ప్రభుత్వాలకు పెద్ద మొత్తంలో ఆదాయం తెచ్చిపెట్టే సాధనాల్లో పొగాకు ఉత్పత్తులు ఒకటి. సాధారణంగా బడ్జెట్ ప్రవేశపెడుతున్నారంటే వీటి పెంపు గురించి సర్కారు ఆలోచిస్తూ ఉంటుంది. అంత ప్రాధాన్యమున్న వీటిపై ప్రభుత్వం ఓ ప్రకటన చేసింది. తాజాగా ప్రవేశపెట్టిన ఆర్థిక బిల్లు, 2023లో ఈమేరకు సవరణలు చేసింది.

పాన్ మసాలా, సిగరెట్లు, ఇతర పొగాకు ఉత్పత్తులపై విధించే GST పరిహారం సెస్ గరిష్ఠ రేటును ప్రభుత్వం పరిమితం చేసింది. వాటి రిటైల్ విక్రయ ధరపై అత్యధిక రేటును నిర్ణయించింది. ఫైనాన్స్ బిల్లు, 2023కి సవరణల్లో దీనిని చేర్చడంతో గత శుక్రవారం లోక్‌సభ ఆమోదం పొందింది. GST పరిహార సెస్ చట్టం షెడ్యూల్-Iలో సవరణకు అవసరమైన మార్పులు చేసింది.

తాజా సవరణ ప్రకారం.. పాన్ మసాలాపై GST పరిహారం సెస్ రేటు గరిష్ఠంగా రిటైల్ విక్రయ ధరలో 51 శాతం ఉంటుంది. ప్రస్తుతం ప్రకటన విలువపై 135 శాతం వసూలు చేయబడుతోంది. పొగాపై పరిమితిని సైతం వెయ్యి స్టిక్స్ కు గాను రూ.4,170తో పాటు 290 శాతం ప్రకటన విలువగా లేదా యూనిట్ రిటైల్ ధరలో 100 శాతంగా నిర్ణయించారు. తద్వారా అత్యధిక GST శ్లాబు 28 శాతాన్ని ఈ సెస్ అధిగమించింది.