బంగారం, వెండిపై ప్రభుత్వం కీలక ప్రకటన.. సరఫరా పెరిగి ధరలు భారీగా తగ్గే ఛాన్స్..

భారత బంగారం, వెండి మార్కెట్‌లో నెలకొన్న అనిశ్చితికి తెరదించుతూ కేంద్ర ప్రభుత్వం ఒక వ్యూహాత్మక నిర్ణయాన్ని తీసుకుంది. గత కొంతకాలంగా దేశీయంగా బంగారం సరఫరాలో ఏర్పడిన అంతరాయాలు, కస్టమ్స్ క్లియరెన్స్‌లో జాప్యం కారణంగా మార్కెట్‌లో ఒక రకమైన ఆందోళన నెలకొంది. దిగుమతి ఆర్డర్లు నిలిచిపోవడంతో సరఫరా తగ్గి, ధరలపై తీవ్ర ఒత్తిడి పడుతున్న తరుణంలో డైరెక్టరేట్ జనరల్ ఆఫ్ ఫారిన్ ట్రేడ్ (DGFT) విడుదల చేసిన తాజా నోటిఫికేషన్ వ్యాపారులకు, సామాన్యులకు పెద్ద ఊరటనిచ్చింది. విదేశీ వాణిజ్య విధానం 2023లో భాగంగా Gold, వెండి దిగుమతులకు సంబంధించి ప్రభుత్వం మొత్తం 17 బ్యాంకులకు అధికారిక అనుమతులు మంజూరు చేస్తూ జాబితాను ప్రకటించింది.

ఈ కీలక నిర్ణయం ప్రకారం దేశంలోని ప్రముఖ ప్రభుత్వ, ప్రైవేట్ రంగ బ్యాంకులు ఇప్పుడు నేరుగా విదేశాల నుండి బంగారం, వెండిని దిగుమతి చేసుకునే వీలు కలుగుతుంది. ఈ జాబితాలో స్టేట్ బ్యాంక్ ఆఫ్ ఇండియా, పంజాబ్ నేషనల్ బ్యాంక్, బ్యాంక్ ఆఫ్ ఇండియా వంటి ప్రభుత్వ బ్యాంకులు మాత్రమే కాకుండా.. హెచ్‌డిఎఫ్‌సి, ఐసిఐసిఐ, యాక్సిస్, కోటక్ మహీంద్రా, ఇండస్‌ఇండ్, యెస్ బ్యాంక్ వంటి దిగ్గజ ప్రైవేట్ బ్యాంకులు కూడా ఉన్నాయి.

మొత్తం 17 బ్యాంకుల్లో, 15 బ్యాంకులకు బంగారం, వెండి రెండింటినీ దిగుమతి చేసుకునే వెసులుబాటు కల్పించగా, యూనియన్ బ్యాంక్ ఆఫ్ ఇండియా, ఎస్‌బిఐకి చెందిన ఒక విభాగం కేవలం బంగారాన్ని మాత్రమే దిగుమతి చేసుకునేలా ప్రత్యేక అనుమతులు లభించాయి. ఈ కొత్త విధానం ఏప్రిల్ 1, 2026 నుండి అమల్లోకి వచ్చింది.

ప్రభుత్వం తీసుకున్న ఈ నిర్ణయం వెనుక ప్రధానంగా మూడు ఏళ్ల సుదీర్ఘ ప్రణాళిక కనిపిస్తోంది. ఈ దిగుమతి అనుమతులు మార్చి 31, 2029 వరకు అంటే మరో మూడేళ్ల పాటు చెల్లుబాటులో ఉంటాయి. దీనివల్ల మార్కెట్‌లో బంగారం, వెండి సరఫరాలో ఎటువంటి ఆకస్మిక అంతరాయాలు కలగకుండా ఒక స్థిరమైన వ్యవస్థ ఏర్పడుతుంది. సాధారణంగా పండుగలు, వివాహాల సీజన్‌లో ఉండే భారీ డిమాండ్‌కు అనుగుణంగా బ్యాంకులు ముందస్తుగా దిగుమతులు చేసుకునే అవకాశం ఉంటుంది. సరఫరా క్రమబద్ధీకరించబడటం వల్ల కృత్రిమ కొరత ఏర్పడదు, తద్వారా ధరలు అదుపులో ఉండి సామాన్య వినియోగదారుడికి మేలు జరుగుతుంది.

బంగారం వద్దు వెండి ముద్దు.. భారీగా కొనేందుకు ఎగబడుతున్న ఇన్వెస్టర్లు.. ధరలు ఆకాశానికి ఇక..

నిజానికి గత కొద్ది రోజులుగా మార్కెట్‌లో చోటుచేసుకున్న పరిణామాలు ఇన్వెస్టర్లను ఇబ్బందికి గురిచేశాయి. దిగుమతి చేసుకున్న బంగారం కస్టమ్స్ వద్ద నిలిచిపోవడం వల్ల దేశీయంగా ధరలు అంతర్జాతీయ ధరల కంటే ఎక్కువగా ఉండే పరిస్థితి తలెత్తింది. అయితే ఇప్పుడు ఈ 17 బ్యాంకుల ద్వారా దిగుమతుల పరిధిని విస్తరించడం వల్ల మార్కెట్‌లో పోటీ పెరగడమే కాకుండా, పారదర్శకత కూడా మెరుగుపడుతుంది.

విదేశీ వాణిజ్య నిబంధనలను సవరించడం ద్వారా ప్రభుత్వం ఈ రంగంలో ఒక వ్యవస్థీకృత మార్పును తీసుకువచ్చింది. ఇది కేవలం తక్షణ పరిష్కారంగా కాకుండా, రాబోయే మూడేళ్ల పాటు మార్కెట్ ధోరణులను ప్రభావితం చేసేలా ఉండటం విశేషం. వెరసి, ప్రభుత్వ తాజా నవీకరణతో బంగారం, వెండి మార్కెట్‌లో మళ్లీ కొత్త జోష్ నెలకొనబోతోందని చెప్పవచ్చు.