Wheat Flour: గోధుమ పిండితో పాటు వీటిపై నిషేధం.. కేంద్రం కీలక నిర్ణయం.. ఎందుకంటే..

Wheat Flour Exports: మే నెలలో గోధుమ ఎగుమతులను నిషేధించిన తరువాత భారత్ తాజాగా మరో నిర్ణయం తీసుకుంది. పెరుగుతున్న ధరలను అరికట్టడానికి కేంద్ర ప్రభుత్వం శనివారం గోధుమ పిండి, మైదా, సెమోలినా, హోల్‌మీల్ ఆటా ఎగుమతులను నిషేధించింది. డైరెక్టరేట్ జనరల్ ఆఫ్ ఫారిన్ ట్రేడ్ (DGFT) దీనికి సంబంధించిన సమాచారాన్ని విడుదల చేసింది. కొన్ని సందర్భాల్లో భారత ప్రభుత్వ అనుమతికి లోబడి ఈ వస్తువుల ఎగుమతులు అనుమతించబడతాయని అందులో స్పష్టం చేసింది.

కేబినెట్ నిర్ణయం..

పెరుగుతున్న వస్తువుల ధరలను అరికట్టేందుకు గోధుమ పిండి ఎగుమతులపై ఆంక్షలు విధించాలని ఆగస్టు 25న ప్రభుత్వం నిర్ణయించింది. ఆర్థిక వ్యవహారాల కేబినెట్ కమిటీ (సీసీఈఏ) సమావేశంలో ఈ నిర్ణయం తీసుకున్నారు.

రష్యా-ఉక్రెయిన్..

రష్యా, ఉక్రెయిన్ దేశాలు ప్రపంచ వ్యాప్తంగా గోధుమల ప్రధాన ఎగుమతిదారులుగా ఉన్నాయి. ప్రపంచ గోధుమ వ్యాపారంలో నాలుగింట ఒక వంతు వాటా వీటి ఆధీనంలోనే ఉన్నాయి. అయితే.. రెండు దేశాల మధ్య యుద్ధం ప్రపంచ గోధుమ సరఫరా గొలుసు అంతరాయాలకు దారితీసింది. ఈ క్రమంలో భారతీయ గోధుమలకు డిమాండ్ పెరిగింది. దీంతో అధిక డిమాండ్ కారణంగా దేశీయ మార్కెట్‌లో గోధుమల ధర పెరిగింది.

పెరిగిన భారత ఎగుమతులు..

భారత్ నుంచి గోధుమ పిండి ఎగుమతులు 2022 ఏప్రిల్-జూలై మధ్య కాలంలో.. 2021తో పోల్చితే 200 శాతం వృద్ధి చెందాయి. దీని విలువ 128 మిలియన్ డాలర్లుగా ఉంది. విదేశాల్లో గోధుమ పిండికి పెరిగిన డిమాండ్ దేశీయ మార్కెట్‌లో వస్తువుల ధరలు గణనీయంగా పెరగడానికి దారితీసింది. దీనికి చెక్ పెట్టేందుకు కేంద్ర ప్రభుత్వం తాజాగా నిషేధాన్ని ప్రకటించింది.

పెరిగిన రిటైల్ ధరలు..

గత సంవత్సరం ఆగష్టుతో పోల్చితే గోధుమల రిటైల్ ధర 22 శాతం పెరిగి రూ.25.41 నుంచి రూ.31.04కి చేరుకుంది. ఇదే క్రమంలో గోధుమ పిండి ధర 17 శాతం పెరిగి రూ.35.17కి చేరుకుంది. దేశంలో గోధుమ ఉత్పత్తి 3 శాతం తగ్గటం కూడా ఈ రేట్ల ఒత్తిడి వెనుక కారణమని తెలుస్తోంది. ప్రధానంగా పంజాబ్, హర్యామాల్లో వేడిగాలుల కారణంగా ఉత్పత్తి భారీగా తగ్గినట్లు అంచనాలు చెబుతున్నాయి. గత కొన్ని రోజులుగా గోధుమ లభ్యత, ధరల పెరుగుదలపై ఇండస్ట్రీ బాడీ రోలర్ ఫ్లోర్ మిల్లర్స్ ఫెడరేషన్ ఆందోళన వ్యక్తం చేసింది. ఈ క్రమంలో ప్రభుత్వం చర్యలు చేపట్టింది.