PSU Insurance Companies: ఆ ఇన్సూరెన్స్ కంపెనీలకు శుభవార్త.. !

నష్టాల్లో ఉన్న ప్రభుత్వ బీమా కంపెనీలకు త్వరలో ఉపశమనం లభించే అవకాశం ఉంది. నష్టాల్లో ఉన్న ప్రభుత్వ బీమా కంపెనీలను ఆదుకునేందుకు ప్రభుత్వం సిద్ధమవుతున్నట్లు సమాచారం. మూడు ప్రభుత్వ బీమా కంపెనీలు ప్రస్తుత ఆర్థిక సంవత్సరంలో అంటే 2023-24లో ప్రభుత్వం నుంచే నిధులు పొందే అవకాశం ఉంది. ఈ నిధులతో మూడు ప్రభుత్వ సంస్థలు మెరుగవడానికి అవకాశం ఉంది. ఆర్థిక మంత్రిత్వ శాఖ ప్రస్తుత ఆర్థిక సంవత్సరంలో నష్టాల్లో ఉన్న మూడు ప్రభుత్వ బీమా కంపెనీలకు రూ. 3,000 కోట్ల అదనపు మూలధనాన్ని సమకూర్చే ప్రణాళికపై కసరత్తు చేస్తోంది.

నష్టాల్లో ఉన్న మూడు ప్రభుత్వ బీమా కంపెనీలు తమ పరిస్థితిని మెరుగుపరచుకోవడానికి ఈ మూలధనం ఉపయోగపడనుంది. 2021-22 ఆర్థిక సంవత్సరంలో కూడా ఈ మూడు బీమా కంపెనీలకు ప్రభుత్వం రూ. 5,000 కోట్ల మూలధనాన్ని ఇచ్చింది. కోల్‌కతా ప్రధాన కార్యాలయం నేషనల్ ఇన్సూరెన్స్ కంపెనీ లిమిటెడ్, ఢిల్లీ ప్రధాన కార్యాలయం ఓరియంటల్ ఇన్సూరెన్స్ కంపెనీ లిమిటెడ్, చెన్నై ప్రధాన కార్యాలయం యునైటెడ్ ఇండియా ఇన్సూరెన్స్ కంపెనీకి ప్రభుత్వం మూలధన సాయం చేయనుంది. ఇప్పటి వరకు నేషనల్ ఇన్సూరెన్స్ కంపెనీ లిమిటెడ్‌కు గరిష్టంగా రూ. 3,700 కోట్లు ఇచ్చారు.

ఓరియంటల్ ఇన్సూరెన్స్ కంపెనీ లిమిటెడ్‌కు రూ.1,200 కోట్లు, యునైటెడ్ ఇండియా ఇన్సూరెన్స్ కంపెనీకి రూ.100 కోట్లు ఇచ్చారు. ఆర్థిక మంత్రిత్వ శాఖ ఈ కంపెనీలను తమ సాల్వెన్సీ నిష్పత్తిని మెరుగుపరచాలని నిర్ణియించినట్లు తెలుస్తోంది. సాల్వెన్సీ నిష్పత్తి అనేది ఒక నిర్దిష్ట కంపెనీకి ఎంత మూలధనం అందుబాటులో ఉందో తెలుసుకోవడం. అధిక ఈ నిష్పత్తి కంపెనీ మెరుగైన ఆర్థిక స్థితిని సూచిస్తుంది, అంటే సంబంధిత బీమా కంపెనీ క్లెయిమ్‌లను చెల్లించడానికి మెరుగైన స్థితిలో ఉందని అర్థం. న్యూ ఇండియా అస్యూరెన్స్ మినహా, ఇతర బీమా కంపెనీల సాల్వెన్సీ రేషియో రెగ్యులేటరీ అవసరాలు 150 శాతం కంటే చాలా తక్కువగా ఉంది.

2021-22 ఆర్థిక సంవత్సరంలో, నేషనల్ ఇన్సూరెన్స్ సాల్వెన్సీ రేషియో 63 శాతం, ఓరియంటల్ ఇన్సూరెన్స్ 15 శాతం, యునైటెడ్ ఇండియా 51 శాతంగా ఉంది. ఈ బీమా కంపెనీలన్నీ లాభాల బాట పట్టాలని ప్రభుత్వం నిధులు మంజూరు చేయనుంది. ప్రభుత్వం నుంచి వచ్చే అదనపు మూలధనంలో ఈ కంపెనీలు ఎంత వాటా పొందుతాయన్నది వాటి పనితీరుపై ఆధారపడి ఉంటుంది. ఈ బీమా కంపెనీలు వృద్ధి చెందడానికి ప్రభుత్వం సహాయం చేస్తూనే ఉంది.