పంక్చర్ సేఫ్ టైర్‌కు అంబాసిడర్‌గా రానా దగ్గుబాటి, పంక్చర్ ఐనా గాలి పోదు..

ప్రముఖ టైర్ల కంపెనీ సియట్ తెలుగు నటుడు రానా దగ్గుబాటిని ప్రచారకర్తగా నియమించుకున్నది. పంక్చర్ సేఫ్ విభాగ బైక్ టైర్లకు దక్షిణాదిలో మరింత ప్రచారం కల్పించే ఉద్దేశ్యంతో రానాను నియమించినట్లు కంపెనీ తెలిపింది. ఈ కమర్షియల్ ప్రకటనతో తెలంగాణ, ఆంధ్రప్రదేశ్, తమిళనాడు, కర్ణాటక, కేరళ రాష్ట్రాల్లో ప్రచారం చేస్తుంది. ఈ ఐదు రాష్ట్రాల్లో సమగ్రమైన మార్కెటింగ్ క్యాంపెయిన్ కోసం రానాతో వాణిజ్య ప్రకటనను రూపొందించినట్లు సియట్ తెలిపింది.

ఇందులో భాగంగా పంక్చర్ సేఫ్ బైక్ టైర్లకు సంబంధించిన ప్రకటనలలో రానా కనిపించున్నారని సియట్ తెలిపింది. కొత్త టెక్నాలజీతో వచ్చిన ఈ టైర్లకు 2.5 ఎంఎం వ్యాసం వరకు పంక్చర్ పడినా ఏ సమస్య ఉండదు. టైర్ నుండి గాలి పోదు. అంతేకాదు, ఆ రంధ్రం కూడా తనంతట తానే మూసుకుపోతుంది. రానాతో ప్రచారం వల్ల బ్రాండ్ మరింత మందికి చేరుతుందని భావిస్తోంది.

దేశంలోని ప్రముఖ బ్రాండ్ ప్రకటనలో కనిపించడం ఆనందంగా ఉందని రానా తెలిపారు. రానా దగ్గుబాటితో కలిసి పని చేస్తోన్నందుకు ఆనందంగా ఉందని సియట్ చీఫ్ ఆపరేటింగ్ ఆఫీసర్ అర్నాబ్ బెనర్జీ తెలిపారు. టైర్‌కు పంక్చర్ అయినా ఆటోమేటిక్‌గా మూసుకుపోతుందని, దీంతో సమస్య ఉండదని తెలిపారు.