GST రిజిస్ట్రేషన్ మోసాలకు కేంద్రం చెక్.. రిస్క్ రేటింగ్ విధానం తీసుకొచ్చిన CBIC

GST Registrations: కేంద్రంలోని మోడీ సర్కారు తీసుకొచ్చిన ఆర్థిక సంస్కరణల్లో ప్రధానంగా చెప్పుకోదగ్గది వస్తు, సేవల పన్ను(GST). పలు రకాల పన్నులు అన్నింటినీ రద్దుచేసి, ఒకే పన్ను విధానంలోకి చేర్చింది. అయితే అడ్డదారిలో దీని ఫలాలను అందుకునేందుకు మోసగాళ్లు సిద్ధమయ్యారు. నకిలీ రిజిస్ట్రేషన్స్‌ ద్వారా GST లక్ష్యాన్ని దెబ్బతీస్తున్నారు. దీనికి చెక్ పెట్టేందుకు CBIC ఇప్పుడు సిద్ధమైంది.

నకిలీ GST రిజిస్ట్రేషన్లను తనిఖీ చేయడానికి అన్ని అప్లికేషన్‌లకు సెంట్రల్ బోర్డ్ ఆఫ్ ఇన్‌డైరెక్ట్ టాక్సెస్ మరియు కస్టమ్స్(CBIC) రిస్క్ రేటింగ్‌ను కేటాయించనుంది. ఈ పద్ధతిలో దరఖాస్తుదారులు సమర్పించిన పత్రాలను పురపాలక శాఖ రికార్డులతో పన్ను అధికారులు క్రాస్ వెరిఫై చేస్తారు. GST రిజిస్ట్రేషన్‌లు పొందేందుకు పలువురు వ్యక్తుల పాన్ మరియు ఆధార్ నంబర్‌లను మోసగాళ్లు దుర్వినియోగం చేసినట్లు తేలడంతో CBIC ఈ చర్యలు చేపట్టింది.

రెండు నెలల స్పెషల్ డ్రైవ్‌ ద్వారా ఈ మోసాలు వెలుగులోకి రావడంతో.. క్షేత్రస్థాయిలో కార్యాలయాలకు CBIC ఈ మేరకు ఆదేశాలు జారీ చేసింది. దీనికి తోడు కొనసాగుతున్న అఖిల భారత డ్రైవ్‌లో.. కేంద్ర మరియు రాష్ట్ర GST అధికారులు 15 వేల నకిలీ రిజిస్ట్రేషన్‌లను గుర్తించారు. నేరస్థులపై చర్యలు తీసుకోవడం ప్రారంభించారు. దీని వెనుక సూత్రధారి ఎవరు, నిజమైన లబ్ధిదారులు ఎవరు అనే విషయాలను ఆరా తీస్తున్నారు.

డైరక్టరేట్ జనరల్ ఆఫ్ అనలిటిక్స్ అండ్ రిస్క్ మేనేజ్‌మెంట్ మరియు GST నెట్‌వర్క్ డేటా అనలిటిక్స్ సూచనల ప్రకారం.. రిస్క్ పెరామీటర్స్ ఆధారంగా రిజిస్ట్రేషన్ కోసం ప్రతి అప్లికేషన్‌కు అధిక, మధ్యస్థ లేదా తక్కువ రిస్క్ రేటింగ్ ఇవ్వబడుతుంది. ఈ విధానం రిజిస్ట్రేషన్ దరఖాస్తుల ధృవీకరణ మరియు ప్రాసెసింగ్‌ను సులభతరం చేస్తుంది. అధిక రిస్క్ రేటింగ్ కేటాయించబడిన కేసులపై ప్రత్యేక శ్రద్ధ వహించాల్సిన అవసరం ఉందని CBIC పేర్కొంది.

"ప్రధాన, అదనపు వ్యాపార స్థలాల చిరునామా వివరాలు మరియు సంబంధిత పత్రాల ఖచ్చితత్వాన్ని ధృవీకరించడానికి నిశితంగా పరిశీలించబడతాయి. ఈ పత్రాల ప్రామాణికతను సంబంధిత అధికారులు వెబ్‌సైట్‌లు, భూ రిజిస్ట్రీ, విద్యుత్ పంపిణీ సంస్థలు, మున్సిపాలిటీలు మొదలైన స్థానిక సంస్థలకు సంబంధించి పబ్లిక్‌గా అందుబాటులో ఉన్న మూలాల నుంచి క్రాస్ వెరిఫై చేయబడతాయి" అని CBIC వెల్లడించింది.