మరో బ్యాంకు మోసం: 14 బ్యాంకులకు రూ.3,600 కోట్లు ఎగవేత

ఇటీవల బ్యాంకు మోసాలు వరుసగా వెలుగు చూస్తున్నాయి. వివిధ బ్యాంకుల నుంచి అప్పులు తీసుకున్న విజయ్ మాల్యా వాటిని చెల్లించకుండా విదేశాల్లో తలదాచుకున్నాడు. నీరవ్ మోడీ పంజాబ్ నేషనల్ బ్యాంకుకు వేల కోట్లు ఎగ్గొట్టాడు. తాజాగా మరో బ్యాంకు మోసం వెలుగుచూసింది. బ్యాంకులకు రూ.3,600 కోట్లు ముంచిన కార్పోరేట్ చీటర్స్‌పై సీబీఐ కేసును నమోదు చేసింది.

కేసు నమోదు

ఫ్రోస్ట్ ఇంటర్నేషనల్, దాని డైరెక్టర్ల పైన సీబీఐ ఈ కేసు నమోదు చేసింది. బ్యాంక్ ఆఫ్‌ ఇండియా కాన్పూర్ జోనల్‌ ఆఫీస్‌ ఫిర్యాదుతో ముంబైకి చెందిన ఫ్రోస్ట్ ఇంటర్నేషనల్‌, దాని డైరెక్టర్లు ఉదయ్‌ దేశాయ్, సుజయ్ దేశాయ్, మరో 11 మంది పైన చీటింగ్, నేరపూరిత కుట్ర, ఫోర్జరీ అభియోగాల్ని నమోదు చేసింది. ఇందులో కాన్పూర్‌కు చెందిన ఆర్కే బిల్డర్స్, గ్లోబిజ్ ఎగ్జిమ్ ప్రయివేట్ లిమిటెడ్, నిర్మన్‌ ప్రైవేట్ లిమిటెడ్ ఉన్నాయి. ఈ కంపెనీలు ఫ్రోస్ట్ ఇంటర్నేషనల్‌కు కార్పోరేట్ గ్యారంటీర్లుగా ఉన్నాయి.

నకిలీ పత్రాలతో మోసం

తప్పుడుధ్రువపత్రాలు, నకిలీ సెక్యూరిటీలను చూపి బ్యాంక్ ఆఫ్ ఇండియా నేతృత్వంలోని 14 బ్యాంకులను రూ.3,592.48 కోట్లు మోసం చేశారని సీబీఐ పేర్కొంది. రుణాలు తీసుకుని వాటిని తిరిగి చెల్లించడంలో విఫలమైనట్లు తెలిపింది. నిందితులపై లుకౌట్ నోటీసులను జారీ చేశామని, వీరు దేశం విడిచి వెళ్లిపోకుండా చర్యలు తీసుకుంటున్నామని సీబీఐ తెలిపింది.

సోదాలు

ఈ కేసు విచారణలో భాగంగా మంగళవారం 13 చోట్ల సీబీఐ తనిఖీలు నిర్వహించింది. ముంబై, ఢిల్లీ, కాన్పూర్‌లలో సోదాలు జరిగాయి. కంపెనీలో అలాగే ఉదయ్ దేశాయ్, సంజయ్ దేశాయ్, తదితరుల ఇళ్లలో సోదాలు నిర్వహించింది.