Go First: నేలకూలిన మరో విమానయాన సంస్థ.. డబ్బు లేక దివాలాకు దాఖలు..!

Go First: భారత గగనతంలో విమానాలు నడిపిన మరో సంస్థ తాజాగా కుప్పకూలింది. విమాన వ్యాపారాన్ని నడిపించేందుకు నగదు కొరత ఎదుర్కొంటున్న గో ఫస్ట్ ప్రస్థానం ముగియనుంది.

ఈ క్రమంలో స్వచ్ఛంద దివాలా పరిష్కార ప్రక్రియ కోసం నేషనల్ కంపెనీ లా ట్రిబ్యునల్‌ వద్ద దరఖాస్తును దాఖలు చేసిందని కంపెనీ సీఈఓ కౌశిక్ ఖోనా తెలియజేశారు. ఇంధన చెల్లింపులకు తగినన్ని నిధులు లేకపోవటంతో విమానాలను మే 3, 4 తేదీల్లో నిలిపివేసింది. 2022 ఆర్థిక సంవత్సరంలో ఎయిర్‌లైన్ తన అతిపెద్ద వార్షిక నష్టాన్ని నమోదు చేసింది.

సాధారణంగా విమానయాన సంస్థలకు అత్యంత పెద్ద వ్యయం ఇంధనం. వాడియా గ్రూప్ యాజమాన్యంలోని గోఫస్ట్ జెట్ ఇంధనాన్ని సరఫరా చేసే చమురు కంపెనీలకు బకాయి పడింది. దీనికి తోడు ఎయిర్ ఇండియా, స్పైస్‌జెట్, ఆకాశ ఎయిర్‌లైన్స్, ఇండిగో సంస్థలు మార్కెట్లో పోటీని ఎదుర్కొనేందుకు కొత్త విమానాలను ఆర్డర్ చేయటంతో పాటు కొత్త గమ్యస్థానాలకు విమాన సేవలను అందిస్తూ వృద్ధికోసం ప్రయత్నిస్తున్న తరుణంలో తాజా పరిణామం చోటుచేసుకుంది.

ఎయిర్‌బస్ A320 నియో ఎయిర్‌క్రాఫ్ట్‌కు శక్తినిచ్చే ప్రాట్ & విట్నీ ఇంజిన్‌ల నుంచి ఇంజిన్‌లను డెలివరీ కాకపోవటంతో పాటు ఇతర సమస్యలతో విమానాల ఫ్లీట్ సగానికి పైగా తగ్గింది. దీంతో ఎయిర్‌లైన్ నగదు ప్రవాహం తీవ్రంగా దెబ్బతింది. కంపెనీ కుప్పకూలటంతో దీనిలో పనిచేసే దాదాపు 5000 మంది ఉద్యోగులు అయోమయ పరిస్థితులను ఎదుర్కొంటున్నారు.