Go First: ఫ్రీజ్ అవుతున్న గో ఫస్ట్ బ్యాంక్ ఖాతాలు..! దివాలాపై కొనసాగుతున్న వాదనలు..

Go First: మే నెల ప్రారంభానికి ముందు వరకు గో ఫస్ట్ విమానయాన సంస్థ తన సేవలను విజయవంతంగా కొనసాగించింది. అయితే ఈ క్రమంలో కంపెనీ ఏప్రిల్ 30 వరకు అన్ని చెల్లింపులను పూర్తి చేసింది. కానీ అకస్మాత్తుగా డబ్బు కొరతతో విమానాలను నడపలేమంటూ దివాలాకు దాఖలు చేసింది.

కంపెనీకి ఉన్న మెుత్తం 54 విమానాల్లో 28 గ్రౌండెడ్ కాగా కేవలం 26 మాత్రమే సేవలను అందిస్తున్నాయి. అయితే కంపెనీ స్వచ్చంద దివాలాకు వెళ్లటంతో లీజర్లు చర్యలు ప్రారంభించారు. లీజు అగ్రమెంట్లను టర్మినేట్ చేయటంతో పాటు ఖాతాలను స్తంభింపజేస్తున్నారు. కంపెనీని తిరిగి కాపాడేందుకు అవకాశం ఉన్నందున మధ్యంతర తాత్కాలిక మారటోరియంను గో ఫస్ట్ కోరుతోంది.

ఈ క్రమంలో కంపెనీ NCLTలో మెుదటి విచారణకు వెళ్లింది. కంపెనీ ఏప్రిల్ నెలలో రూ.293 కోట్లను పంప్ చేసింది. ఈరోజు మధ్యంతర మారటోరియం విధించకపోతే విమానాలు సీజ్ చేయబడతాయని, లీజులు రద్దు చేయబడి, ఖాతాలు స్తంభిస్తాయని గో ఫస్ట్ కోర్టుకు వెల్లడించింది. గో ఫస్ట్ కుప్పకూలితే గుత్తాధిపత్యానికి కారణమౌతుందని కంపెనీ కోర్టుకు తెలిపింది.

ప్రస్తుతం గో ఫస్ట్‌కి ఇంధనం, జీతాలు, ఎయిర్‌పోర్ట్ ఖర్చులు మొదలైన వాటికి చెల్లించాల్సిన అవసరం ఉంది. ఇందుకోసం సింగపూర్ నుంచి ఆర్బిట్రేషన్ అవార్డును అమలు చేయాలని తాము ఆశిస్తున్నట్లు కంపెనీ కోర్టుకు తెలిపింది. డిసెంబరు వరకు ప్రతి నెలా 10 సర్వీస్‌డ్ ఇంజిన్‌లను సరఫరా చేయాలని SIAC ఆర్బిట్రేషన్ ప్రాట్ & విట్నీని ఆదేశించింది. ఈ క్రమంలో కంపెనీని పునరుద్ధరించేందుకు కంపెనీ అన్ని అవకాశాలను పరిశీలిస్తోంది.

కంపెనీలోని అనుభవజ్ఞులు కంపెనీని నడపలేని పరిస్థితుల్లో దివాలా నిపుణులు ఎలా నడపగలని కోర్టు గో ఫస్ట్ ను ప్రశ్నించింది. దీనికి ముందు నిన్న ఇండియన్ ఆయిల్ కార్పొరేషన్ తన బ్యాంక్ గ్యారెంటీని రద్దు చేసింది. దేశీయ విమానయానంలో 8 శాతం వాటా కలిగి ఉన్న సంస్థ ఆర్థిక ఇబ్బందులతో కోర్టు మెట్లు ఎక్కటం ఎలాంటి పరిస్థితులకు దారితీస్తుందోనని అందరూ ఆందోళన చెందుతున్నారు. ప్రస్తుతానికి కంపెనీ తరువాతి రూటేంటనేదానిపై గందరగోళం కొనసాగుతోంది.