నిర్మలమ్మ షెడ్యూల్ ఇదీ: కేంద్ర కేబినెట్ భేటీలో: ప్రయారిటీస్ ఇవేనా?

న్యూఢిల్లీ: కేంద్ర ఆర్థికమంత్రి నిర్మల సీతారామన్ ఇంకాస్సేపట్లో లోక్‌సభలో బడ్జెట్ ప్రతిపాదనలను ప్రవేశపెట్టనున్నారు. ఈ ఉదయం 11 గంటలకు బడ్జెట్ ప్రసంగం ప్రారంభం కానుంది. సుమారు రెండు గంటల పాటు కొనసాగే అవకాశాలు ఉన్నాయి. రైల్వే బడ్జెట్‌ను కూడా నిర్మల సీతారామనే ప్రవేశపెడతారు. ఇదివరకు సార్వత్రిక బడ్జెట్, రైల్వే బడ్జెట్ వేర్వేరుగా కొనసాగాయి. భారతీయ జనతా పార్టీ సంకీర్ణ కూటమి ఏర్పాటైన తరువాత ఈ రెండింటినీ విలీనం చేసింది.

బడ్జెట్ ప్రతిపాదనలను దృష్టిలో పెట్టుకుని కేంద్ర మంత్రివర్గం ఈ ఉదయం సమావేశం కానుంది. ప్రధానమంత్రి నరేంద్ర మోడీ దీనికి అధ్యక్షత వహిస్తారు. బడ్జెట్ ప్రతిపాదనలను ఆమోదంచడం కోసమే కేబినెట్‌ను సమావేశపరిచారు. బడ్జెట్ ప్రతిపాదనలకు సంబంధించిన హైలైట్స్‌ను ఆర్థికమంత్రిత్వ శాఖ కార్యాలయం ఇప్పటికే ప్రధానమంత్రి కార్యాలయం, ఇతర మంత్రులకు సర్కులేట్ చేసింది. బడ్జెట్ హైలైట్స్‌కు సంబంధించిన వివరాలను మంత్రివర్గ సమావేశంలో నిర్మల సీతారామన్ ప్రస్తావిస్తారు. క్లుప్తంగా వాటి గురించి వివరిస్తారు.

మంత్రివర్గ ఆమోదం పొందిన వెంటనే ఆమె పార్లమెంట్‌ భవనానికి బయలుదేరి వెళ్తారు. సరిగ్గా 11 గంటలకు లోక్‌సభలో తన బడ్జెట్ ప్రసంగాన్ని ప్రారంభిస్తారు. అంతకుముందు- ఆమె ఈ ఉదయం 8:45 నిమిషాలకు గంటలకు నార్త్‌ బ్లాక్‌లోని ఆర్థిక మంత్రిత్వ శాఖ కార్యాలయానికి చేరుకుంటారు. 9 గంటలకు బహీఖాతాను తీసుకుని మంత్రివర్గ సమావేశానికి బయలుదేరి వెళ్తారు. ఆమె వెంట ఆర్థిక శాఖ సహాయమంత్రులు, ఇతర అధికారులు ఉంటారు.

ఈ దఫా కూడా నిర్మల సీతారామన్ పేపర్‌లెస్ బడ్జెట్‌ను ప్రవేశపెట్టనున్న విషయం తెలిసిందే. పేపర్‌లెస్ బడ్జెట్‌ను ప్రవేశపెట్టడం వరుసగా ఇది రెండోసారి. గత ఏడాది కూడా డిజిటల్ రూపంలోనే బడ్జెట్ ప్రతిపాదనలను ఆమె సభలో ప్రవేశపెట్టారు. కరోనా వైరస్ వ్యాప్తి చెందుతున్న ప్రస్తుత పరిస్థితులను దృష్టిలో ఉంచుకుని ఈ నిర్ణయం తీసుకున్నారు. డిజిటల్ ఫార్మట్‌లోనే బడ్జెట్ కాపీలను చదివి వినిపిస్తారు.

దీనికోసం ప్రత్యేకంగా ఓ యాప్‌ను కూడా అందుబాటులోకి తీసుకొచ్చారు. యూనియన్ బడ్జెట్ మొబైల్ యాప్ పేరుతో రూపొందించిన ఈ యాప్‌లో బడ్జెట్ ప్రతిపాదనలన్నింటినీ ఉంచనున్నారు. ఉపాధి కల్పన, వ్యవసాయం, సూక్ష్మ, చిన్న, మధ్య తరహా పరిశ్రమలపై ప్రధానంగా దృష్టి సారించినట్లు తెలుస్తోంది. మధ్య తరగతికి పన్నుల్లో కోత ఉండొచ్చని సమాచారం. హెల్త్‌కేర్ సెగ్మెంట్‌కూ ప్రాధాన్యత ఇచ్చారని ప్రచారం ఉంది. వచ్చే ఆర్థిక సంవత్సరంలో వృద్ధి రేటు 8 నుంచి 8.5 శాతం వరకు అంచనా వేసిన విషయం తెలిసిందే.