ఏపీకి కేంద్రం గుడ్ న్యూస్, 4 లేన్ల బద్వేల్-నెల్లూరు కారిడార్ ప్రాజెక్టుకు ఆమోదం, పూర్తి వివరాలు ఇవే..

ఆంధ్రప్రదేశ్ రాష్ట్రానికి ప్రధాని నరేంద్రమోదీ నేత‌ృత్వంలోని ఎన్డీఏ సర్కారు శుభవార్తను అందించింది. ప్రధానమంత్రి నరేంద్రమోదీ అధ్యక్షతన జరిగిన ఆర్థిక వ్యవహారాల క్యాబినెట్ కమిటీ దక్షిణ రాష్ట్రంలోని జాతీయ రహదారి (NH) 67పై రూ.3,653 కోట్ల వ్యయంతో 109 కి.మీ.లకు పైగా పొడవునా 4 లేన్ల బద్వేల్-నెల్లూరు కారిడార్ నిర్మాణానికి ఆమోదం తెలిపింది.ఈ విషయాన్ని ప్రధాని నరేంద్ర మోదీ ఎక్స్ వేదికగా తెలిపారు. ఇది డిజైన్-బిల్డ్-ఫైనాన్స్-ఆపరేట్-ట్రాన్స్‌ఫర్ (DBFOT) మోడ్‌లో ఉందని PIB విడుదల తెలిపింది.

బద్వేల్-నెల్లూరు కారిడార్ ఆంధ్రప్రదేశ్‌లోని మూడు పారిశ్రామిక కారిడార్లలో ముఖ్యమైన నోడ్‌లను కలుపుతుంది - విశాఖపట్నం-చెన్నై పారిశ్రామిక కారిడార్‌లోని కొప్పర్తి, హైదరాబాద్-బెంగళూరు పారిశ్రామిక కారిడార్‌లోని ఓర్వకల్, చెన్నై-బెంగళూరు పారిశ్రామిక కారిడార్ (CBIC)లోని కృష్ణపట్నం మార్గాలను ఈ లేన్ కలుపుతుంది. ఇది దేశంలోని 'లాజిస్టిక్ పనితీరు సూచిక'పై సానుకూల ప్రభావాన్ని చూపుతుందని కేంద్రం తెలిపింది.

బద్వేల్-నెల్లూరు కారిడార్ YSR కడప జిల్లాలోని NH-67లోని గోపవరం గ్రామంలో ప్రారంభమై ఆంధ్రప్రదేశ్‌లోని SPSR నెల్లూరు జిల్లాలోని NH-16 (చెన్నై-కోల్‌కతా)లోని కృష్ణపట్నం పోర్ట్ జంక్షన్ వద్ద ముగుస్తుంది. ఇది CBIC కింద ప్రాధాన్యతా నోడ్‌గా గుర్తించబడిన కృష్ణపట్నం పోర్టుకు వ్యూహాత్మక కనెక్టివిటీని అందిస్తుంది.

ప్రతిపాదిత కారిడార్ కృష్ణపట్నం పోర్టుకు దూరాన్ని 34 కి.మీ తగ్గిస్తుంది, ఇది ప్రస్తుత బద్వేల్-నెల్లూరు రహదారితో పోలిస్తే 142 కి.మీ నుండి 108 కి.మీకి తగ్గుతుంది. ఇది ప్రయాణ సమయాన్ని గంట తగ్గిస్తుంది. ఇంధన వినియోగాన్ని గణనీయంగా తగ్గిస్తుంది. తద్వారా కార్బన్ పాదముద్ర, వాహన నిర్వహణ ఖర్చును తగ్గిస్తుంది. ఈ ప్రాజెక్టు ద్వారా ప్రత్యక్షంగా, పరోక్షంగా వేలమందికి ఉపాధి లభిస్తుంది. ప్రతిపాదిత కారిడార్ వెంబడి ఆర్థిక కార్యకలాపాలు పెరగడం వల్ల అదనపు ఉపాధి అవకాశాలు కూడా లభిస్తాయి.

కేబినెట్ ఆమోదం పొందిన 4 లేన్ల బద్వేల్-నెల్లూరు కారిడార్ ఆంధ్రప్రదేశ్ అభివృద్ధి ప్రయాణానికి ప్రయోజనం చేకూరుస్తుంది మరియు రాష్ట్ర యువతకు పలు అవకాశాలను సృష్టిస్తుందని ప్రధాని మోదీ ఎక్స్ వేదికగా తెలిపారు. బద్వేల్-నెల్లూరు కారిడార్ ప్రాజెక్టుకు ఆమోదం తెలిపినందుకు ఆంధ్రప్రదేశ్ ముఖ్యమంత్రి ఎన్ చంద్రబాబు నాయుడు బుధవారం ప్రధానమంత్రి నరేంద్ర మోడీ, కేంద్ర మంత్రి నితిన్ గడ్కరీలకు కృతజ్ఞతలు తెలిపారు.

కేబినెట్ ఆమోదం పొందిన 4 లేన్ల బద్వేల్-నెల్లూరు కారిడార్ ఆంధ్రప్రదేశ్ అభివృద్ధి ప్రయాణానికి ప్రయోజనం చేకూరుస్తుంది మరియు రాష్ట్ర యువతకు పలు అవకాశాలను సృష్టిస్తుంది.https://t.co/kM2N1D3vMN

— Narendra Modi (@narendramodi) May 28, 2025

వీటితో పాటుగా రైల్వే ప్రాజెక్టులు లైన్ సామర్థ్యాన్ని పెంచడానికి, ప్రయాణీకులు, వస్తువులు రెండింటినీ సజావుగా, వేగంగా రవాణా చేయడానికి భారత రైల్వేల యొక్క రెండు మల్టీట్రాకింగ్ ప్రాజెక్టులను ఆర్థిక వ్యవహారాల క్యాబినెట్ కమిటీ ఆమోదించింది. ఇవి రత్లాం-నాగ్డా మార్గంలో 3వ మరియు 4వ లైన్ మరియు వార్ధా-బల్హర్షా మార్గంలో 4వ లైన్. మహారాష్ట్ర, మధ్యప్రదేశ్‌లోని నాలుగు జిల్లాలను కవర్ చేసే ఈ ప్రాజెక్టులు.

ప్రస్తుత రైల్వే నెట్‌వర్క్‌ను దాదాపు 176 కి.మీ.పెంచుతాయి. ఇవి 2029-30 నాటికి పూర్తవుతాయి. కేంద్ర రైల్వే మంత్రి అశ్విని వైష్ణవ్ మాట్లాడుతూ, దీనివల్ల సంవత్సరానికి 18.40 మిలియన్ టన్నుల అదనపు సరుకు రవాణా జరుగుతుందని అన్నారు. "రత్లాం-నాగ్డా, వార్ధా-బల్హర్షా మార్గాల్లో అడ్డంకులు తొలగిపోతాయి. ఫలితంగా ట్రాక్ లభ్యత పెరుగుతుంది కాబట్టి ఎక్కువ ప్రయాణీకుల కదలిక కూడా జరుగుతుంది" అని వైష్ణవ్ అన్నారు.