Gold: నగలు కొనేముందు ఇది చూడండి! పోయిన బంగారానికి పైసా ఖర్చు లేకుండా రీప్లేస్‌మెంట్?

బంగారం ధరలు ప్రస్తుతం 10 గ్రాములకు రూ. 1.5 లక్షల మార్కును తాకడం కేవలం వార్తలకే పరిమితం కాలేదు.. ప్రతి గ్రాము బంగారం (Gold) వెనుక ఉన్న ఆర్థిక రిస్క్‌ను కూడా భారీగా పెంచేసింది. అంతర్జాతీయ అనిశ్చితి, కరెన్సీ ఒడిదుడుకుల వల్ల ధరలు రూ. 1.6 లక్షల వరకు వెళ్తున్న తరుణంలో, సామాన్యుల నుంచి నగల వ్యాపారుల వరకు అందరూ ఒకే ప్రశ్న వేసుకుంటున్నారు: "ఇంత ఖరీదైన బంగారానికి భద్రత ఉందా?"

ప్రస్తుతం భారతీయులు భారీగా బంగారాన్ని పోగుచేస్తున్నప్పటికీ, దానికి తగిన ఇన్సూరెన్స్ (భీమా) కవరేజీ లేకపోవడం ఒక పెద్ద లోపంగా కనిపిస్తోంది. దొంగతనం లేదా నష్టం జరిగినప్పుడు అది కోలుకోలేని దెబ్బ తీసే అవకాశం ఉంది.

పెరిగిన ధరలు = పెరిగిన నష్ట భయం

బంగారం ధర పెరిగే కొద్దీ, మన దగ్గర ఉన్న నగలకు ఉండే ద్రవ్య విలువ కూడా పెరుగుతుంది. దీనివల్ల రెండు రకాల రిస్కులు ఉన్నాయి..

• వినియోగదారులకు: ఇంట్లో లేదా లాకర్లలో ఉంచే నగలు దొంగతనానికి గురైనా, లేదా పొరపాటున పోగొట్టుకున్నా వాటిని తిరిగి కొనడం ఇప్పుడు తలకు మించిన భారం.
• వ్యాపారులకు: జ్యువెలరీ షాపుల యజమానులకు ఇన్వెంటరీ ఖర్చు పెరిగింది. ప్రదర్శనలో ఉన్నప్పుడు లేదా రవాణాలో (Transit) ఉన్నప్పుడు జరిగే నష్టం వారి వ్యాపారాన్ని దెబ్బతీస్తుంది.

నిపుణుల అభిప్రాయం ప్రకారం, ముఖ్యంగా టైర్ 2 , టైర్ 3 నగరాల్లోని చిన్న, మధ్యతరహా వ్యాపారులు అసలు ఇన్సూరెన్స్ చేయించుకోవడమే లేదని తెలుస్తోంది.

జ్యువెలరీ ఇన్సూరెన్స్ దేనికి రక్షణ ఇస్తుంది?

వ్యాపారుల కోసం 'జ్యువెలర్స్ బ్లాక్ ఇన్సూరెన్స్' (Jewellers Block Insurance) అనే సమగ్ర పాలసీ అందుబాటులో ఉంది. ఇది కింది వాటికి రక్షణ కల్పిస్తుంది..

1. దొంగతనం , దోపిడీ: అత్యంత సాధారణమైన రిస్క్ ఇది.
2. అగ్ని ప్రమాదాలు: అగ్ని ప్రమాదం లేదా ప్రకృతి వైపరీత్యాల వల్ల నగలు దెబ్బతింటే పరిహారం లభిస్తుంది.
3. నమ్మకద్రోహం (Employee Dishonesty): నగల వ్యాపారం చేసే చోట సిబ్బంది వల్ల జరిగే మోసాలకు కూడా ఇందులో కవరేజీ ఉంటుంది.
4. రవాణా రిస్క్: నగలను ఒక చోటు నుండి మరొక చోటుకు తరలించేటప్పుడు జరిగే నష్టానికి రక్షణ ఉంటుంది.

వినియోగదారుల విషయానికి వస్తే, వ్యక్తిగత జ్యువెలరీ ఇన్సూరెన్స్ అనేది భావోద్వేగంతో కూడిన ఆభరణాలకు ఆర్థిక భద్రతను ఇస్తుంది. పొరపాటున నగలు దెబ్బతిన్నా లేదా దొంగతనానికి గురైనా, ఆ మొత్తం ఆర్థిక భారాన్ని ఇన్సూరెన్స్ కంపెనీ భరిస్తుంది.

ముఖ్య గమనిక: భారతదేశంలో జ్యువెలరీ పరిశ్రమ విలువ సుమారు రూ. 4.7 లక్షల కోట్లు అయితే, అందులో ఇన్సూరెన్స్ మార్కెట్ కేవలం రూ. 250-500 కోట్లు మాత్రమే. అంటే మనం ఇంకా భద్రత విషయంలో చాలా వెనుకబడి ఉన్నామని ఇది స్పష్టం చేస్తోంది. బంగారం ధరలు రికార్డు స్థాయికి చేరుకున్న తరుణంలో, ఇన్సూరెన్స్‌ను ఖర్చుగా కాకుండా ఒక పెట్టుబడిగా చూడటం అవసరం. బంగారం (Gold) కొనేటప్పుడు దాని భద్రత కోసం కూడా కొంత కేటాయించడం తెలివైన నిర్ణయం.