బర్గర్ కింగ్ సెక్సీయెస్ట్ వుమెన్స్ డే పోస్ట్, డిలీట్ చేసి క్షమాపణ

అంతర్జాతీయ మహిళా దినోత్సవం సందర్భంగా రెస్టారెంట్ పరిశ్రమలో లింగ అసమానతపై ట్వీట్ చేసిన అనంతరం బర్గర్ కింగ్ యూకేకు భారీ షాక్ తగిలింది. ఫాస్ట్ ఫుడ్ దిగ్గజం ట్వీట్ పట్ల నెటిజన్లు విమర్శలు గుప్పించారు. సెటైర్లు వేశారు. అయితే ఈ సెక్సీయెస్ట్ ట్వీట్ పట్ల బర్గర్ కింగ్ ఆ తర్వాత క్షమాపణలు చెప్పింది. వుమెన్ బిలాంగ్ ఇన్ ది కిచెన్ అంటూ చేసిన ట్వీట్ పైన నెటిజన్ల విమర్శలకు తావిచ్చింది. అనంతరం మొదటి ట్వీట్‌ను తొలగించి, తర్వాత క్షమాపణలు చెబుతూ మరో ట్వీట్ చేసింది.

అంతకుముందు చేసిన ట్వీట్‌లో పొరపాటు దొర్లిందని, దీనికి మీరు మమ్మల్ని క్షమించాలని బర్గర్ కింగ్ రెండో ట్వీట్‌లో పేర్కొంది. యూకే కిచెన్‌లో 20 శాతం ప్రొఫెషనల్స్ ఉన్నారని చెప్పడం తమ ఉద్దేశ్యమని పేర్కొంది. అయితే బర్గర్ కింగ్ తొలి ట్వీట్ పైన విమర్శలు వెల్లువెత్తాయి.

'ఇలాంటి ట్వీట్ ఏమాత్రం హర్షణీయం కాదని, పైగా మహిళా దినోత్సవం సందర్భంగా సరికాదని' ఓ నెటిజన్ పేర్కొన్నారు. ఈ ట్వీట్‌కు పెద్ద ఎత్తున డిస్-లైక్స్ కూడా వచ్చాయి. మీ సోషల్ మీడియా టీంలో లేదా మీ మార్కెటింగ్ టీంలో మహిళలు ఉండాలని, అప్పుడు ఇలాంటి ట్వీట్స్ కనిపించవని మరికొందరు విమర్శలు గుప్పించారు.