Budget app: బడ్జెట్‌ కోసం కేంద్రం ప్రత్యేక యాప్.. పద్దు పత్రాలను ఇలా యాక్సెస్ చేయొచ్చు

Budget 2024: మరికొన్ని రోజుల్లో దేశ వ్యాప్తంగా సార్వత్రిక ఎన్నికలు జరగనుండగా.. కేంద్ర ప్రభుత్వం ఈ దఫా చివరి మధ్యంతర బడ్జెట్‌ను ప్రవేశపెట్టింది. ఎలక్షన్స్ అనంతరం ఏర్పడబోయే కొత్త గవర్నమెంట్ పూర్తిస్థాయి బడ్జెట్‌ సమర్పించాల్సి ఉంటుంది. అయితే గత ప్రభుత్వాల మాదిరిగా కాకుండా మోదీ సర్కారు గ్రీన్ బడ్జెట్ కు ప్రాముఖ్యత ఇచ్చింది.

ఆర్థిక మంత్రి నిర్మలా సీతారామన్ ఇవాళ మరోసారి పేపర్‌లెస్ ఫార్మాట్‌లో మధ్యంతర బడ్జెట్‌ను సమర్పించారు. వరుసగా నాల్గవ సంవత్సరం ఈ పద్ధతిలో బడ్జెట్ ప్రవేశపెట్టారు. పర్యావరణ అనుకూల ఎంపికలను ప్రోత్సహించడానికి కేంద్ర ప్రభుత్వం 2021 నుంచి డిజిటల్‌గా పద్దు సమర్పిస్తూ వస్తోంది. పార్లమెంట్‌లో మంత్రి నిర్మలా సీతారామన్ ప్రసంగం పూర్తైన తర్వాత బడ్జెట్ పత్రాలను ఆన్‌లైన్లో ఉంచుతారు.

డిపార్ట్‌మెంట్ ఆఫ్ ఎకనామిక్ అఫైర్స్ (DEA) ఆధ్వర్యంలో ఇవి ప్రజలకు అందుబాటులో ఉంటాయి. ఇందుకోసం 'యూనియన్ బడ్జెట్' పేరిట iOS మరియు అండ్రాయిడ్ ఆపరేటింగ్ సిస్టమ్స్ ఆధారిత యాప్‌ని నేషనల్ ఇన్ఫర్మేటిక్స్ సెంటర్ (NIC) రూపొందించింది. ప్రజలు మరియు పార్లమెంటు సభ్యులు బడ్జెట్ పత్రాలను యాక్సెస్ చేయడానికి ఈ యాప్స్ అనుమతిస్తుంది.

రాజ్యాంగబద్ధంగా నిర్దేశించబడిన వార్షిక ఆర్థిక నివేదికలు (AFS), డిమాండ్స్ ఫర్ గ్రాంట్స్ (DG), ఫైనాన్షియల్ బిల్లులు, ఫిస్కల్ రెస్పాన్సిబిలిటీ బడ్జెట్ మేనేజ్‌మెంట్ యాక్ట్ (FRBM) చట్టం కింద తప్పనిసరి చేసిన స్టేట్‌మెంట్‌లతో సహా 14 యూనియన్ బడ్జెట్ పత్రాలను ఈ యాప్ ద్వారా వీక్షించవచ్చు. 2021లో కేంద్ర బడ్జెట్ ముందు హల్వా వేడుకలో ఆర్థిక మంత్రి నిర్మలా సీతారామన్ ఈ మొబైల్ యాప్‌ను ప్రవేశపెట్టారు.