Budget 2026: సామాన్యుడి సొంతింటి కల నెరవేరుతుందా? రియల్ ఎస్టేట్ రంగానికి కేంద్రం ఇచ్చే బూస్ట్ ఏంటి?

కేంద్ర బడ్జెట్ 2026 సమయం దగ్గరపడుతుండటంతో అన్ని రంగాల చూపు ఆర్థిక మంత్రిపైనే ఉంది. ముఖ్యంగా దేశ ఆర్థిక వ్యవస్థలో కీలక పాత్ర పోషించే రియల్ ఎస్టేట్ రంగం ఈసారి ప్రభుత్వం నుంచి భారీ వరాలను ఆశిస్తోంది. పెరుగుతున్న భూముల ధరలు, నిర్మాణ సామాగ్రి ఖర్చులు అలాగే పాతబడిపోయిన పన్ను పరిమితుల వల్ల హౌసింగ్ ప్రాజెక్టులు భారంగా మారుతున్నాయని డెవలపర్లు వాపోతున్నారు. ఈ నేపథ్యంలో బడ్జెట్ 2026 (Budget 2026) రియల్ ఎస్టేట్ రంగానికి కొత్త ఊపిరి పోస్తుందా అనేది ఇప్పుడు ఆసక్తికరంగా మారింది.

అఫర్డబుల్ హౌసింగ్ పరిమితి పెంచాలి!

ప్రస్తుతం ప్రభుత్వం రూ. 45 లక్షల లోపు ఉన్న ఇళ్లను 'అఫర్డబుల్ హౌసింగ్' (సరసమైన ధర గల ఇళ్లు) గా పరిగణిస్తూ 1% GST ప్రయోజనం కల్పిస్తోంది. అయితే నేటి రోజుల్లో మెట్రో నగరాల్లో ఈ ధరకు ఇల్లు దొరకడం అసాధ్యమని బిల్డర్లు అంటున్నారు.

• డిమాండ్: ఈ లిమిట్‌ను రూ. 45 లక్షల నుండి రూ. 80-90 లక్షల వరకు పెంచాలని ఫోర్టెసియా రియాల్టీ డైరెక్టర్ శివ్ గార్గ్ వంటి ప్రముఖులు కోరుతున్నారు.
• GST తగ్గింపు: వర్క్ కాంట్రాక్టులపై GSTని 18% నుండి 12% కి తగ్గించడం ద్వారా ఆగిపోయిన ప్రాజెక్టులను మళ్లీ పట్టాలెక్కించవచ్చని వారు సూచిస్తున్నారు.

మధ్యతరగతికి ఊరట లభించేనా?

తొలిసారి ఇల్లు కొనేవారికి.. ముఖ్యంగా మిడ్-ఇన్‌కమ్ గ్రూపు వారికి మరిన్ని ఇన్సెంటివ్‌లు అవసరమని పరిశ్రమ వర్గాలు భావిస్తున్నాయి. సెక్షన్ 80EEA కింద అదనపు వడ్డీ మినహాయింపును మళ్ళీ పునరుద్ధరిస్తే.. హోమ్ లోన్ EMIల భారం తగ్గి మధ్యతరగతి వారికి పెద్ద ఊరట లభిస్తుంది. దీనివల్ల ముఖ్యంగా ఎన్సీఆర్ (NCR), బెంగళూరు(Bengaluru), హైదరాబాద్(Hyderabad) వంటి అభివృద్ధి చెందుతున్న ప్రాంతాల్లో ఇళ్ల అమ్మకాలు పెరుగుతాయని ఆర్‌పీఎస్ గ్రూప్ డైరెక్టర్ అమన్ గుప్తా అభిప్రాయపడ్డారు.

హౌసింగ్‌ను 'ఇన్ఫ్రాస్ట్రక్చర్' గా గుర్తించాలి

రియల్ ఎస్టేట్ రంగాన్ని కేవలం ఒక ఆస్తిగా కాకుండా, దేశ మౌలిక సదుపాయాల (Infrastructure) లో భాగంగా గుర్తించాలని నిపుణులు డిమాండ్ చేస్తున్నారు.

• PMAY-Urban 2.0: ఈ పథకం ద్వారా ప్రభుత్వం ఇళ్లను నిర్మిస్తున్నప్పటికీ.. టైర్-1.5, టైర్-2 నగరాల్లో ఉపాధి అవకాశాలు పెరుగుతున్నందున అక్కడ గృహ నిర్మాణానికి ప్రత్యేక ప్రోత్సాహకాలు అవసరం.
• సింగిల్ విండో క్లియరెన్స్: ప్రాజెక్టుల అనుమతులు త్వరగా లభిస్తే నిర్మాణ వ్యయం తగ్గి ఇళ్లు తక్కువ ధరకు అందుబాటులోకి వస్తాయి.

పెట్టుబడిదారులకు భరోసా

నిర్మాణంలో ఉన్న ఇళ్లపై GST హేతుబద్ధీకరణ అలాగే పారదర్శకమైన విధానాలు ఉంటే పెట్టుబడులు పెరిగే అవకాశం ఉంది. బడ్జెట్ 2026 (Budget 2026) లో ప్రభుత్వం స్థిరమైన విధానాలను ప్రకటిస్తే.. గ్రీన్ బిల్డింగ్స్, సస్టైనబుల్ హౌసింగ్ ప్రాజెక్టులపై బిల్డర్లు దృష్టి సారించే అవకాశం ఉంది.

మొత్తంగా ఈ సారి రాబోయే బడ్జెట్.. సామాన్యుడి సొంతింటి కలను ఎంతోకొంత ప్రభావితం చేస్తుంది. ఆర్థిక మంత్రి ప్రవేశపెట్టే ఈ బడ్జెట్ రియల్ ఎస్టేట్ రంగానికి 'బూస్ట్' ఇస్తుందో లేదో చూడాలి. సామాన్యుడికి తక్కువ ధరకే ఇల్లు దొరకడంతో పాటు, బిల్డర్లకు ఈజ్ ఆఫ్ డూయింగ్ బిజినెస్ (Ease of Doing Business) లభిస్తేనే ఈ రంగం నిలకడగా వృద్ధి చెందుతుంది.