Budget 2026: బడ్జెట్‌లో రాబోతున్న ఈ భారీ మార్పుతో.. మీ క్రెడిట్ స్కోర్ ఈజీగా పెంచుకోవచ్చు!

నగరాల్లో నివసించే మధ్యతరగతి ఉద్యోగులకు లేదా సామాన్యులకు నెలకు అయ్యే ఖర్చుల్లో అన్నిటికంటే పెద్దది 'ఇంటి అద్దె' (House Rent). నెలకు రూ.10,000 నుండి రూ.40,000 వరకు అద్దె చెల్లిస్తూ.. ఏటా లక్షల రూపాయలు ఖర్చు చేస్తున్న వారు కోకొల్లలు. అయితే విచిత్రం ఏమిటంటే.. ఇంత కచ్చితంగా అద్దె కట్టే వ్యక్తి బ్యాంక్‌కు వెళ్లి లోన్ అడిగితే, "మీకు క్రెడిట్ స్కోర్ (Credit score) లేదు" అనో లేదా "మీ క్రెడిట్ హిస్టరీ బలహీనంగా ఉంది" అనో బ్యాంకులు తిరస్కరిస్తుంటాయి. ఈ సమస్యకు పరిష్కారంగా 'బడ్జెట్ 2026'లో ఒక కీలక మార్పు రాబోతోంది.

ఏమిటీ డిమాండ్? అద్దెకు క్రెడిట్ స్కోర్‌కు లింక్!

ప్రస్తుతం మన దేశంలో ఒక వ్యక్తికి అప్పు ఇవ్వాలా? వద్దా? అనేది సిబిల్ (CIBIL) లేదా ఇతర క్రెడిట్ బ్యూరోల స్కోర్‌ పై ఆధారపడి ఉంటుంది. ఈ స్కోర్ కేవలం మీరు గతంలో తీసుకున్న లోన్లు లేదా క్రెడిట్ కార్డ్ బిల్లులు కడితేనే పెరుగుతుంది. కానీ, అద్దె చెల్లింపులను ఇందులో పరిగణనలోకి తీసుకోవడం లేదు.

రెంటెన్‌పే (RentenPe) కో-ఫౌండర్, సీఈఓ సారికా శెట్టి చెప్పినట్లుగా, "అద్దె అనేది అతిపెద్ద క్రమబద్ధమైన ఖర్చు. డిజిటల్ అద్దె చెల్లింపులను క్రెడిట్ బ్యూరోలతో లింక్ చేస్తే, ప్రభుత్వంపై ఎలాంటి అదనపు భారం పడకుండానే లక్షలాది మందికి మొదటిసారి అధికారికంగా లోన్లు పొందే అవకాశం లభిస్తుంది."

ప్రస్తుత నిబంధనలు ఎలా ఉన్నాయి?

ప్రస్తుతానికి మీ క్రెడిట్ స్కోర్ (Credit score) ఈ క్రింది అంశాల ఆధారంగా లెక్కించబడుతుంది:

• లోన్ ఈఎంఐలు (EMIs) సకాలంలో కడుతున్నారా?
• క్రెడిట్ కార్డ్ వాడకం ఎలా ఉంది?
• మీరు ఎంత కాలంగా అప్పులు తీసుకుంటున్నారు?
• ఎప్పుడైనా లోన్ ఎగ్గొట్టారా?

అంటే మీరు ఐదేళ్లుగా ప్రతినెలా ఒకటో తేదీనే అద్దె కడుతున్నా.. అది మీ క్రెడిట్ డిసిప్లిన్ కిందకు రాదు. ఈ విధానాన్ని మార్చాలని నిపుణులు కోరుతున్నారు.

ఎవరికి లాభం?

ఈ కొత్త నిబంధన అమల్లోకి వస్తే ప్రధానంగా నగరాల్లో ఉండేవారికి చాలా మేలు జరుగుతుంది..

1. మొదటి ఉద్యోగం చేస్తున్న వారు: వీరికి ఎలాంటి లోన్ హిస్టరీ ఉండదు.
2. గిగ్ వర్కర్స్ & ఫ్రీలాన్సర్లు: వీరికి స్థిరమైన జీతం స్లిప్పులు ఉండవు కాబట్టి లోన్ రావడం కష్టం.
3. కొత్త నగరాలకు మారిన వారు: వీరికి క్రెడిట్ కార్డ్ ఉండకపోవచ్చు, కానీ రెంట్ మాత్రం కడుతుంటారు.

వీరంతా డిజిటల్ పద్ధతుల్లో (UPI/Net Banking) రెంట్ కడుతున్నా, బ్యాంకుల దృష్టిలో వీరు ఇప్పటికీ 'హై రిస్క్ (High Risk)' కేటగిరీలోనే ఉన్నారు.

బడ్జెట్ 2026 లో ఏం మారవచ్చు?

పరిశ్రమ నిపుణుల అంచనాల ప్రకారం.. ప్రభుత్వం బడ్జెట్ 2026లో ఈ క్రింది ప్రతిపాదనలను పరిశీలించే అవకాశం ఉంది..

• డిజిటల్ రెంట్ సిగ్నల్: యూపీఐ లేదా బ్యాంక్ ద్వారా కట్టే అద్దెను ఒక అధికారిక క్రెడిట్ సిగ్నల్‌ గా గుర్తించడం.
• బ్యూరోలతో అనుసంధానం: అద్దె చెల్లింపుల డేటాను CIBIL వంటి సంస్థలకు చేరవేయడం. దీనివల్ల సకాలంలో అద్దె కట్టే వారి స్కోర్ పెరుగుతుంది, ఆలస్యం చేసే వారిపై నెగటివ్ ఇంపాక్ట్ ఉంటుంది.
• డిజిటల్ ఎకానమీకి బూస్ట్: నగదు రూపంలో కాకుండా డిజిటల్ రూపంలో అద్దె కట్టే వారిని ప్రోత్సహించడం.

దీనివల్ల ప్రభుత్వానికి కొత్తగా పైసా ఖర్చు ఉండదు. కానీ, ఉన్న డిజిటల్ మౌలిక సదుపాయాలను వాడుకుని సామాన్యులకు మేలు చేయవచ్చు. ఒకవేళ ఈ నిర్ణయం అమల్లోకి వస్తే మీరు కట్టే ప్రతి నెలా అద్దె మీ భవిష్యత్తు లోన్లకు హామీగా మారుతుంది!