Budget 2026: డిగ్రీలు వస్తున్నాయి.. కానీ, ఉద్యోగాలు రావడం లేదు? విద్యా రంగం కోరుకుంటున్న మార్పులివే!

భారతదేశం ప్రస్తుతం యువతతో కళకళలాడుతోంది. మన దేశ ఆర్థిక వృద్ధికి ఈ యువశక్తే అసలైన ఇంజిన్. అయితే కేవలం డిగ్రీలు ఉంటే సరిపోదు, చేతిలో నైపుణ్యం (Skill) కూడా ఉండాలి. అందుకే రాబోయే బడ్జెట్ (Budget 2026) పై విద్యా రంగం బోలెడన్ని ఆశలు పెట్టుకుంది. కేవలం కొత్త కాలేజీ భవనాలు కట్టడం, అడ్మిషన్లు పెంచడం మాత్రమే కాదు.. ఈసారి బడ్జెట్‌ లో నాణ్యమైన విద్య, శిక్షణ పొందిన టీచర్లు.. నేరుగా ఉద్యోగం వచ్చేలా స్కిల్ డెవలప్‌మెంట్‌ పై ఫోకస్ పెట్టాలని నిపుణులు కోరుతున్నారు.

క్వాంటిటీ కాదు.. క్వాలిటీ ముఖ్యం!

'ది సర్కిల్' వ్యవస్థాపకులు సందీప్ రాయ్ అభిప్రాయం ప్రకారం.. బడ్జెట్ (Budget 2026) ని ఒక ఖర్చులా కాకుండా దేశ భవిష్యత్తు కోసం చేసే పెట్టుబడిలా చూడాలి. ఇప్పటివరకు మనం ఎంతమంది స్టూడెంట్స్ స్కూల్లో జాయిన్ అయ్యారు? ఎన్ని బిల్డింగ్‌లు కట్టాం? అనే దానిపైనే దృష్టి పెట్టాం. కానీ, ఇప్పుడు ఆ పద్ధతి మారాలి.

• టీచర్ల శిక్షణ: నాణ్యమైన విద్య అందాలంటే ముందుగా ఉపాధ్యాయులకు ఆధునిక పద్ధతుల్లో శిక్షణ ఇవ్వాలి.
• మోడల్ స్కూల్స్: ప్రభుత్వ, ప్రైవేట్ భాగస్వామ్యం (PPP) ద్వారా ఆదర్శ పాఠశాలలను నిర్మించాలి.
• పరిశ్రమలతో సంబంధాలు: స్కూల్ స్థాయి నుంచే పరిశ్రమలకు కావాల్సిన నైపుణ్యాలను నేర్పించడం ప్రారంభించాలి.

చిన్న పట్టణాల్లో AI ల్యాబ్‌ లు.. రూ. 10 వేల కోట్ల నిధులు?

సెంచూరియన్ యూనివర్సిటీ వైస్ ఛాన్సలర్ సుప్రియ పట్టానాయక్ ఒక కీలక ప్రతిపాదనను ముందుకు తెచ్చారు. భారతదేశాన్ని గ్లోబల్ స్కిల్ క్యాపిటల్‌ గా మార్చాలంటే బడ్జెట్ (Budget 2026) లో కనీసం 20 శాతం నిధులు పెంచాలని ఆమె కోరారు. ముఖ్యంగా..

• టయర్-2, టయర్-3 నగరాల్లోని సుమారు 500 విద్యా సంస్థల్లో AI (ఆర్టిఫిషియల్ ఇంటెలిజెన్స్) ఆధారిత ల్యాబ్‌లను ఏర్పాటు చేయాలి.
• దీనికోసం కనీసం రూ. 10,000 కోట్ల నిధులు కేటాయించాలి.
• దీనివల్ల క్లైమేట్ అగ్రికల్చర్, హెల్త్ సైన్స్ వంటి రంగాల్లో విద్యార్థులకు ప్రాక్టికల్ నాలెడ్జ్ లభిస్తుంది.

సామాన్యుడికి చదువు అందుబాటులో ఉండాలి!

సన్‌స్టోన్ సీఈఓ ఆశిష్ ముంజాల్ ప్రకారం.. నేటి కాలంలో చదువు అనేది చాలా ఖరీదైనదిగా మారుతోంది. ముఖ్యంగా మధ్యతరగతి విద్యార్థులకు ఇది పెద్ద భారంగా మారుతోంది.

1. వడ్డీ లేని రుణాలు: విద్యార్థుల కోసం వడ్డీ లేని లేదా తక్కువ వడ్డీతో కూడిన ఎడ్యుకేషన్ లోన్స్ ఇవ్వాలి.
2. డిజిటల్ లెర్నింగ్: మారుమూల గ్రామాల్లో ఉండే విద్యార్థులకు కూడా హై-క్వాలిటీ డిజిటల్ లెర్నింగ్ ప్లాట్‌ఫారమ్స్ అందుబాటులోకి రావాలి.
3. లెర్నింగ్ క్రెడిట్స్: ఉద్యోగులకు కంపెనీల ద్వారా హెల్త్ ఇన్సూరెన్స్ ఇచ్చినట్లుగానే.. కొత్త నైపుణ్యాలు నేర్చుకోవడానికి 'లెర్నింగ్ క్రెడిట్స్' ఇచ్చేలా ప్రోత్సాహకాలు ఉండాలి.

మొత్తానికి ఈ సారి బడ్జెట్ (Budget 2026) లో ప్రభుత్వం కేవలం అంకెలకు పరిమితం కాకుండా యువతను ఉద్యోగాలకు సిద్ధం చేసేలా (Job-ready) చర్యలు తీసుకోవాలని విద్యా రంగం ఆశిస్తోంది. మరి ఆర్థిక మంత్రి నిర్మలా సీతారామన్ విద్యా రంగానికి ఎలాంటి బూస్ట్ ఇస్తారో వేచి చూడాలి!