Budget 2026: చిన్న పరిశ్రమలు మూతపడకుండా ఆదుకోండి.. రూ. కోటి ఫ్రీ రుణం ఇవ్వాలని కేంద్రాన్ని కోరిన FACSI

ఈ నెల చివరి నుంచి బడ్జెడ్ సమావేశాలు ప్రారంభం కానున్నాయి. ఈ నేపథ్యంలో చిన్న పరిశ్రమలకు ఉపశమనం ఇవ్వాలని FACSI కేంద్రాన్ని కోరుతోంది. 2026-27 ఆర్థిక సంవత్సరానికి సంబంధించిన కేంద్ర బడ్జెట్‌లో సూక్ష్మ, చిన్న పరిశ్రమలకు (MSEలు) పన్ను, రుణాలు, నియంత్రణల విషయంలో విస్తృత ఉపశమన చర్యలు తీసుకోవాలని కుటీర, చిన్న పరిశ్రమల సమాఖ్య (FACSI) కేంద్ర ప్రభుత్వాన్ని కోరింది.

దేశ ఆర్థిక వృద్ధికి కీలకంగా మారిన ఈ రంగం ప్రస్తుతం ఖర్చుల పెరుగుదల, క్రెడిట్ కొరత, నియంత్రణ భారం వంటి సమస్యలను ఎదుర్కొంటోందని, వీటికి budget ద్వారా పరిష్కారాలు చూపాల్సిన అవసరం ఉందని FACSI స్పష్టం చేసింది.ఈ మేరకు FACSI అధ్యక్షుడు హెచ్‌కే గుహ ఆర్థిక మంత్రి నిర్మలా సీతారామన్‌కు బడ్జెట్‌కు ముందు ఒక లేఖ రాశారు. దేశవ్యాప్తంగా ఉన్న వివిధ వ్యాపారవేత్తలు, సూక్ష్మ-చిన్న పరిశ్రమల సంఘాలతో సంప్రదింపుల అనంతరం ఈ సిఫార్సులు రూపొందించామని ఆయన తెలిపారు. పారిశ్రామిక పర్యావరణ వ్యవస్థలో MSEల పాత్రను బలోపేతం చేయడమే ఈ ప్రతిపాదనల ప్రధాన లక్ష్యమని FACSI పేర్కొంది.

FACSI ప్రధాన డిమాండ్లలో ఒకటి MSME మంత్రిత్వ శాఖ పరిధిలో సూక్ష్మ, చిన్న పరిశ్రమల కోసం ప్రత్యేక మండలిని ఏర్పాటు చేయడం. ఇది విధాన నిర్ణయాలు తీసుకోవడంలో, సమస్యలను నేరుగా ప్రభుత్వ దృష్టికి తీసుకురావడంలో సహకరిస్తుందని సమాఖ్య అభిప్రాయపడింది. అలాగే GST వ్యవస్థలో చిన్న యూనిట్లకు ఊరట కల్పించేందుకు మినహాయింపు పరిమితిని పెంచాలని, చిన్న సంస్థలకు ఒకే సరళీకృత GST రిటర్న్‌ను ప్రవేశపెట్టాలని కోరింది.

ఆర్థిక ఒత్తిడి సమయంలో రుణ ప్రాప్యత కీలకమని పేర్కొన్న FACSI, MSEలకు వడ్డీ రాయితీతో కూడిన చట్టబద్ధమైన కొలేటరల్-రహిత రుణాన్ని రూ.1 కోటి వరకు అందించాలని డిమాండ్ చేసింది. ఈ రుణాలకు వడ్డీ రేటును 6 నుంచి 7 శాతం మధ్య పరిమితం చేయాలని సూచించింది. అంతేకాదు, బ్యాంకింగ్ నిబంధనలకు అనుగుణంగా ఉన్న యూనిట్లకు వర్కింగ్ క్యాపిటల్ పరిమితులను స్వయంచాలకంగా పునరుద్ధరించే విధానాన్ని అమలు చేయాలని కోరింది.

నగదు సమస్యలపై కూడా FACSI తీవ్ర ఆందోళన వ్యక్తం చేసింది. ప్రభుత్వ శాఖల జాప్యాల వల్ల నిలిచిపోయిన GST రిఫండ్‌లను 15 రోజుల్లోపు చెల్లించాలని, ఆలస్యానికి చట్టబద్ధమైన వడ్డీ కూడా చెల్లించే విధానం ఉండాలని సూచించింది. అలాగే GST రిటర్నులు, కార్మిక చట్టాలు, స్థానిక నిబంధనలకు సంబంధించిన విధానపరమైన లోపాలను పూర్తిగా నేరరహితం చేయాలని సమాఖ్య డిమాండ్ చేసింది.

ఎగుమతులపై ఆధారపడిన చిన్న యూనిట్ల కోసం ప్రత్యేక చర్యలు అవసరమని FACSI పేర్కొంది. SIDBIతో పాటు ప్రభుత్వ రంగ బ్యాంకులు MSEలకు రుణ లక్ష్యాలను పెంచాలని, ఆకస్మిక సుంకాల పెంపు వల్ల నష్టపోయిన చిన్న ఎగుమతిదారులకు పరిహారం చెల్లించేందుకు 'ఎగుమతి రిస్క్ ఈక్వలైజేషన్ ఫండ్' ఏర్పాటు చేయాలని ప్రతిపాదించింది.

GeM పోర్టల్ ద్వారా టెండర్లలో పాల్గొనే MSEలపై ఉన్న రుసుములను తగ్గించాలని, ఆలస్య చెల్లింపుల కేసులను వేగంగా పరిష్కరించేందుకు రాష్ట్ర ఫెసిలిటేషన్ కౌన్సిల్‌ల పనితీరును మరింత బలోపేతం చేయాలని FACSI కోరింది. ఇందుకోసం MSMED చట్టం, 2006లో కొన్ని సవరణలు అవసరమని కూడా పేర్కొంది. పునరుత్పాదక ఇంధన సంస్థాపనలు, విద్యుత్ ఛార్జీలు, స్థానిక లెవీలపై సబ్సిడీలను విస్తరించడంలో రాష్ట్ర ప్రభుత్వాలతో కేంద్రం సన్నిహితంగా పనిచేయాలని FACSI సూచించింది.

అలాగే రాష్ట్ర అభివృద్ధి సంస్థలు నిర్వహించే పారిశ్రామిక ఎస్టేట్‌లలో ఉన్న యూనిట్లకు ప్రత్యేక సౌకర్యాలు కల్పించాల్సిన అవసరం ఉందని పేర్కొంది. ఈ ప్రతిపాదనలు అమలులోకి వస్తే భారతదేశంలో సూక్ష్మ, చిన్న పరిశ్రమల వృద్ధికి గణనీయమైన ఊతం లభిస్తుందని, ఉపాధి అవకాశాలు మరింత పెరుగుతాయని FACSI అధ్యక్షుడు హెచ్‌కే గుహ ఆశాభావం వ్యక్తం చేశారు.