Budget 2022: ఒమిక్రాన్ ఎఫెక్ట్, నిర్మలమ్మకు సవాలే

కరోనా కొత్త వేరియంట్ ఒమిక్రాన్ ప్రభావం ప్రపంచం పైన, భారత్ పైన పడుతోంది. ప్రస్తుత ఒమిక్రాన్ నేపథ్యంలో ఆర్థికమంత్రి నిర్మలా సీతారామన్‌కు నాలుగో బడ్జెట్ మరింత సవాలుగా మారవచ్చు. ప్రస్తుత క్లిష్ట పరిస్థితుల్లో ఆర్థిక పునరుద్ధరణ కోసం ఉద్దీపన అందించేందుకు ప్రభుత్వ వద్ద ఆదాయం తక్కువగా ఉందని, ఈ నేపథ్యంలో ఎదురుగాలికి అవకాశం ఉందని చెబుతున్నారు. ఇప్పటికే ద్రవ్యలోటు పెరిగింది. వచ్చే నెలలో బడ్జెట్‌ను ప్రవేశపెట్టే సమయంలో నిర్మల్మకు ఇది సవాల్ అంటున్నారు.

నిర్మలమ్మకు సవాల్

గత త్రైమాసికం పండుగ సమయంలో షార్ప్ రికవరీ కనిపించింది. అయితే ఒమిక్రాన్ ప్రభావంతో ఆ తర్వాత మందగించింది. ఇప్పటికే పలు రాష్ట్రాలు రాత్రి కర్ఫ్యూ వంటి ఆంక్షలు విధిస్తున్నాయి. ఈ నేపథ్యంలో వృద్ధి రేటు తగ్గుతుందని వివిధ రేటింగ్ ఏజెన్సీలు అంచనా వేస్తున్నాయి. 2019-19 ఆర్థిక సంవత్సరంలో వృద్ధి రేటు 6.5 శాతం, 2019-20 ఆర్థిక సంవత్సరంలో 4 శాతంగా నమోదయింది. కరోనా కారణంగా 20220-21 ఆర్థిక సంవత్సరంలో మైనస్ 7.4 శాతానికి పడిపోయింది.

అదే సమయంలో 2021-22 ఆర్థిక సంవత్సరంలో వృద్ధి రేటు 9.5 శాతంగా ఉంటుందని అంచనా వేస్తున్నారు. వచ్చే ఆర్థిక సంవత్సరం మొదటి త్రైమాసికంలో 13.7 శాతం, రెండో అర్ధ సంవత్సరంలో 5.6 శాతంగా ఉంటుందని అంచనా.

ద్రవ్యోల్భణం

ద్రవ్యోల్భణం గత ఏడాది కాలంగా పెరుగుతూ వస్తోంది. 2021 మార్చిలో WPI ద్రవ్యోల్భణం 7.89 శాతంగా ఉండగా, మే నెలలో 13.11 శాతానికి పెరిగింది. ఆ తర్వాత తగ్గినప్పటికీ డబుల్ డిజిట్‌లో ఉంది. అక్టోబర్ నెలలో 12.54 శాతం, నవంబర్ నెలలో 14.23 శాతంగా నమోదయింది. ఇక CPI ద్రవ్యోల్భణం గత ఏడాది మార్చిలో 5.52 శాతంగా నమోదయింది. జూన్ నెలలో 6.26 శాతానికి చేరుకుంది. జూలై నుండి క్రమంగా తగ్గింది. నవంబర్ నెలలో 4.91 శాతంగా నమోదయింది.

ఇలా చేయాలి..

వరుసగా గత కొన్ని నెలలుగా జీఎస్టీ కలెక్షన్స్ పెరుగుతున్నాయి. ఒమిక్రాన్ ప్రభావం మరోసారి ఆర్థిక మందగమనానికి కారణం కావొచ్చు. ఇందుకు ప్రయివేటీకరణ దూకుడును కొనసాగించడం ఓ మార్గంగా భావిస్తున్నారు.

అసెట్ మానిటైజేషన్ బడ్జెట్ పైన భారం పడకుండా క్యాపెక్స్‌కు మద్దతు ఇస్తుంది. ఆస్తి మానిటైజేషన్‌ను అనుమతించడానికి పన్ను విధానాలను క్లియర్ చేయాలి.