బీటెక్‌లో CSE కి తగ్గుతున్న డిమాండ్! ఇప్పుడు టెక్ కంపెనీల చూపంతా ఈ బ్రాంచ్ మీదే!

సాధారణంగా టెక్ కంపెనీలో ఉద్యోగం కావాలంటే బీటెక్ కంప్యూటర్ సైన్స్ ఇంజనీరింగ్ (CSE) చదవాల్సిందేనని చాలామంది విద్యార్థులు నమ్ముతారు. కానీ ఇప్పుడు ట్రెండ్ వేగంగా మారుతోంది. గత కొన్ని సంవత్సరాలుగా అగ్రస్థానంలో ఉన్న సీఎస్ఈ (CSE) ఇప్పుడు పడిపోతోంది. టెక్ కంపెనీలు ఇప్పుడు మరో బ్రాంచ్‌ను తొలి ఎంపికగా చూస్తున్నాయి. అదేంటంటే..

మారుతున్న టెక్నాలజీని బట్టి స్కిల్స్ అవసరం కూడా మారుతుంటుంది. ప్రస్తుతం ప్రపంచానికి కంప్యూటర్స్ తో పాటు కమ్యూనికేషన్ ఎక్స్ పర్ట్స్ కూడా కావాలి. అందుకే ఇప్పుడు ఎలక్ట్రానిక్స్ అండ్ కమ్యూనికేషన్ ఇంజనీరింగ్ (ECE) కి డిమాండ్ పెరుగుతోంది. టెక్ ప్రపంచంలో వేగంగా వస్తున్న మార్పుల వల్ల ECE Demand అమాంతం పెరిగింది. నేటి కంపెనీలు కేవలం కోడింగ్ తెలిసిన ఇంజనీర్లను మాత్రమే కాకుండా హార్డ్‌వేర్, సాఫ్ట్‌వేర్ తో పాటు కమ్యూనికేషన్ టెక్నాలజీపై సంపూర్ణ అవగాహన ఉన్న ఇంజినీర్ల కోసం చూస్తున్నాయి. ఈ కారణంగానే ఈసీఈ (ECE) కొత్త ఎంపికగా దూసుకువస్తోంది.

ECE డిమాండ్‌కు కారణాలు ఏమిటి?

గత కొన్నేళ్లలో ఆర్టిఫిషియల్ ఇంటెలిజెన్స్ (AI), 5G టెక్నాలజీ, ఇంటర్నెట్ ఆఫ్ థింగ్స్ (IoT), రోబోటిక్స్, సెమీకండక్టర్ పరిశ్రమల్లో విపరీతమైన వృద్ధి కనిపించింది. ఇంత భారీ విస్తరణ కేవలం సాఫ్ట్‌వేర్‌తో సాధ్యం కాదు. దీనికి చిప్ డిజైన్, ఎలక్ట్రానిక్ సర్క్యూట్లు, బలమైన నెట్‌వర్క్ సిస్టమ్స్, కమ్యూనికేషన్ టెక్నాలజీపై పట్టు ఉన్న నిపుణులు అవసరం. ఈ కీలకమైన విభాగాలన్నింటికీ ఈసీఈ (ECE) విద్యార్థులే ఆధారం. హార్డ్‌వేర్, సాఫ్ట్‌వేర్ రంగాల్లో సంపూర్ణ పరిజ్ఞానం ఉండటం వల్ల ఈసీఈ విద్యార్థులు టెక్ కంపెనీలకు మరింత విలువైన ఆస్తిగా మారుతున్నారు.

ప్లేస్‌మెంట్ రికార్డులే నిదర్శనం

ఎన్ఐటీ జంషెడ్‌పూర్ (NIT Jamshedpur) 2024-25 ప్లేస్‌మెంట్ రికార్డులను పరిశీలిస్తే.. CSE ప్రాబల్యం తగ్గుతున్నట్లు స్పష్టమవుతోంది. కంప్యూటర్ సైన్స్ (CSE) బ్రాంచ్‌కు అత్యధికంగా రూ.82 లక్షల ప్యాకేజీ లభించగా, బీటెక్ ఈసీఈ (ECE) బ్రాంచ్ విద్యార్థికి కూడా అదే రూ.82 లక్షల ప్యాకేజీ లభించింది. అలాగే ఇంటర్న్‌షిప్‌ల విషయంలో 64 మంది సీఎస్ఈ విద్యార్థులు ఎంపిక కాగా, 73 మంది బీటెక్ ఈసీఈ విద్యార్థులు ఎంపికయ్యారు. ఈ సంఖ్య ఈసీఈ వైపు టెక్ కంపెనీల మొగ్గును సూచిస్తుంది.

మల్టీ స్కిల్స్ ముఖ్యం

నేటి టెక్ కంపెనీలకు కోడింగ్‌తో పాటు, హార్డ్‌వేర్, సాఫ్ట్‌వేర్ రెండింటిపై అవగాహన ఉన్న ఇంజనీర్లు అవసరం. ఈసీఈ విద్యార్థులకు ఈ ప్రత్యేక ప్రయోజనం ఉంది. వారికి కోడింగ్ మాత్రమే కాకుండా, ఎలక్ట్రానిక్ సిస్టమ్స్, చిప్స్ మరియు కమ్యూనికేషన్ నెట్‌వర్క్‌ల వంటి క్లిష్టమైన సాంకేతిక రంగాలలో లోతైన అవగాహన ఉంటుంది. సీఎస్ఈ ఇప్పటికీ బలమైన బ్రాంచ్ అయినప్పటికీ, కంపెనీల కొత్త ప్రాజెక్ట్‌లు, నియామకాల డేటా బట్టి చూస్తే.. రాబోయే 5-10 సంవత్సరాలలో ECE కి డిమాండ్ మరింత పెరిగి టెక్ రంగంలో ఇది అతిపెద్ద బ్రాంచ్‌గా ఉద్భవించే అవకాశాలు స్పష్టంగా కనిపిస్తున్నాయి.