మార్కెట్ ఆర్డర్లపై BSE కొత్త రూల్.. ట్రేడర్స్‌లో ఫుల్ ఖుష్.. ఇకపై అలా చేయడం కుదరదు

Stock Market news: స్టాక్ మార్కెట్ లో ట్రేడర్స్ మరియు ఇన్వెస్టర్స్ కు స్టాప్ లాస్ ఎంతో ముఖ్యం. ఇది లేకుండా ఎవరూ అమ్మడం లేదా కొనడం వంటివి దాదాపు చేయరు. అంతటి ప్రాముఖ్యత కలిగిన స్టాప్ లాస్‌ కు BSE చరమగీతం పాడనుంది.

అక్టోబర్ 9 నుంచి స్టాప్ లాస్ మార్కెట్(SL-M) ఆర్డర్లను నిలిపివేస్తున్నట్లు బాంబే స్టాక్ ఎక్స్ఛేంజ్(BSE) ప్రకటించింది. ఇటీవల వెలుగుచూసిన 'ఫ్రీక్ ట్రేడ్'కి సంబంధించి మార్కెట్ వర్గాల్లో ఆందోళన నెలకొనడంతో.. ఈ నిర్ణయం తీసుకున్నట్లు పేర్కొంది.

ఈక్విటీ, ఈక్విటీ డెరివేటివ్‌లు, కరెన్సీ డెరివేటివ్‌లు, కమోడిటీ డెరివేటివ్‌లు సహా పలు ఇతర మార్కెట్ విభాగాల్లోనూ SL-M ఆర్డర్‌లను నిలిపివేయాలని BSE నిర్ణయించింది. అయితే ఇదే స్టాప్ లాస్ ను మార్కెట్ ఆర్డర్ తో కలిపి కాకుండా లిమిట్ ఆర్డర్ ద్వారా ప్లేస్ చేసే అవకాశం కల్పించింది. నేషనల్ స్టాక్ ఎక్స్ఛేంజ్(NSE) దీన్ని సెప్టెంబరు 2021 నుంచి అమలు చేస్తుండగా.. ఇప్పుడు BSE సైతం అదే బాటలో నడవనుంది.

ఆర్డర్ ప్లేస్ చేయడంలో లిమిట్ ఆర్డర్స్ ఎక్కువ నియంత్రణతో పాటు ఖచ్చితత్వాన్ని అందిస్తాయని BSE భావిస్తోంది. తద్వారా మాన్యువల్ లేదా అల్గారిథమిక్ ట్రేడింగ్స్ లో తప్పుడు ఆర్డర్ ప్లేస్‌మెంట్లను నిరోధించడమే తమ లక్ష్యమని వెల్లడించింది.