Budget 2024: బడ్జెట్ తర్వాత గర్జించనున్న డిఫెన్స్ స్టాక్స్ ఇవే.. నిపుణులు ఏమంటున్నారంటే?

Defence Stocks: గడచిన కొన్ని నెలలుగా దేశీయ స్టాక్ మార్కెట్లలో డిఫెన్స్ రంగానికి చెందిన అనేక కంపెనీల షేర్లు భారీ ర్యాలీని నమోదు చేసిన సంగతి తెలిసిందే. వాస్తవానికి కేంద్రం దేశీయంగా కొనుగోళ్లతో పాటు ఎగుమతుల ప్రోత్సాహం వంటి చర్యలతో ఈ రంగంలోని కంపెనీలు లాభపడ్డాయి. అలాగే బడ్జెట్లో డిఫెన్స్ స్పెండింగ్ సైతం ఈ రంగాన్ని ప్రభావితం చేస్తాయి.

ప్రస్తుతం మోదీ సర్కార్ ముచ్చటగా మూడోసారి సైతం అధికారంలోకి రావటం డిఫెన్స్ స్టాక్ ఇన్వెస్టర్లకు లాభాలను తెచ్చిపెట్టవచ్చని అంచనాలు ఉన్నాయి. జూలై 23న ఆర్థిక మంత్రి నిర్మలా సీతారామన్ తొలి పూర్తి స్థాయి వార్షిక బడ్జెట్ ప్రవేశపెట్టనున్నారు. ఈ క్రమంలో ఆమె ప్రసంగం నుంచి అత్యధిక అంచనాలను కలిగి ఉన్న రంగాల జాబితాలో డిఫెన్స్ కూడా ఒకటి. ప్రస్తుత కేంద్ర ప్రభుత్వం రక్షణ రంగంలో పెద్ద ఎత్తున పెట్టుబడులు పెడుతోంది.

దీనికి ముందు ఫిబ్రవరిలో కేంద్రం ప్రవేశపెట్టిన మధ్యంతర బడ్జెట్ ప్రసంగం ప్రకారం కేంద్ర ఆర్థిక మంత్రి రక్షణ శాఖకు రూ.6.21 లక్షల కోట్లను కేటాయించిన సంగతి తెలిసిందే. వాస్తవానికి ఇది గత ఏడాది పూర్తి స్థాయి బడ్జెట్ కంటే 4.3 శాతం అధికం. అయితే ప్రస్తుతం ప్రవేశపెట్టనున్న పూర్తి బడ్జెట్‌లో మధ్యంతర బడ్జెట్ విస్తరణ ఉంటుందని నిపుణులు చెబుతున్నారు. బడ్జెట్ ప్రసంగం తర్వాతి నుంచి ఇప్పటి వరకు ఈ ఏడాది డిఫెన్స్ స్టాక్స్ తమ బుల్ ర్యాలీని నిరంతరాయంగా కొనసాగించాయి. ఈ క్రమంలో గత నెలలో ఏకంగా 56 శాతం పెరుగుదలను చూశాయి.

ముఖ్యంగా GRSE స్టాక్ 60 శాతం, మజ్‌గావ్ డాక్ షేర్లు 43 శాతం లాభపడి అత్యధిక పెరుగుదలను నమోదు చేశాయి. అలాగే పరాగ్ డిఫెన్స్ కంపెనీ షేర్లు గత నెలలో 22 శాతం పెరిగాయి. కొచ్చిన్ షిప్‌యార్డ్ స్టాక్ సైతం ఇన్వెస్టర్లకు అద్భుతమైన రాబడిని అందించింది. ఈ క్రమంలో బ్రోకరేజ్ సంస్థ షేర్‌ఖాన్ HAL, BEL, భారత్ ఫోర్జ్‌ షేర్లపై తన బులిష్ వ్యూహాన్ని వెల్లడించింది. అలాగే BEML, MDL, BDL, GRSE, డేటా ప్యాటర్న్, కొచ్చిన్ షిప్‌యార్డ్‌ షేర్లను వాచ్ లిస్ట్ లో ఉంచుకోవాలని సూచించింది. ఈ సారి బడ్జెట్ ప్రవేశపెట్టిన తర్వాత ఈ రంగాల షేర్లు పెరిగే అవకాశం ఉందని పేర్కొంది.