Less Salaries: వివాహాల్లో వేతనాల కీ రోల్.. అంచనాలకు ఆమడ దూరంలో వరుళ్లు.. లక్షల్లో జీతాలున్నా..

Salary in Wedding: ప్రస్తుతం నెలకొన్న పరిస్థితుల్లో జీవన వ్యయం విపరీతంగా పెరిగిపోతోంది. దీనికితోడు దేశంలో నెలకొన్న నిరుద్యోగం, లేఆఫ్స్, నైపుణ్యాల లేమి వంటి సమస్యలు యువతను వేధిస్తున్నాయి. ఈ క్రమంలో సోషల్ మీడియాలో ఓ వ్యక్తి చేసిన పోస్ట్ ఇప్పుడు నెట్టింట వైరల్‌గా మారింది. దీన్ని చూసి పరిస్థితి తీవ్రత అర్థం చేసుకోవచ్చు.

ముఖ్యంగా వివాహం విషయంలో దేశీయ యువత తీవ్ర ఇబ్బందులు ఎదుర్కొంటోంది. వేతనం అనేది ఇక్కడ ముఖ్య భూమిక పోషిస్తోంది. యువతుల తల్లిదండ్రులు భారీ ప్యాకేజీ కావాలని, కేవలం IT ఉద్యోగులు మాత్రమే వరుడిగా రావాలని ఆశపడుతున్నారు. దీంతో ప్రభుత్వ ఉద్యోగాలు మినహా ఇతర రంగాల్లో పనిచేస్తున్న యువకులకు వధువుల కొరత ఏర్పడుతోంది.

మరికొందరు ఇంకో అడుగు ముందుకేసి తమ కుమార్తెకు లక్షల కొద్దీ ప్యాకేజీ ఉన్న వరుడే కావాలని ఖండితంగా మాట్లాడుతున్నారు. వృత్తిపరంగా ఇంజనీర్ అయిన తన స్నేహితుడిని జీతం చాలా తక్కువ అనే కారణంగా ఓ మహిళ వివాహం చేసుకునేందుకు తిరస్కరించిందని ఓ వ్యక్తి Xలో పోస్ట్ చేశాడు. అయితే అతడి సంపాదన సంవత్సరానికి 8 లక్షలు (LPA) కావడం గమనార్హం.

ఆ అమ్మాయి కూడా గత సంవత్సరం తన ఉద్యోగాన్ని విడిచిపెట్టినట్లు ఆ వ్యక్తి తన పోస్ట్‌లో పేర్కొన్నాడు. ఆమె జాబ్ చేసి అలసిపోవడంతో ఇప్పుడు ఏమీ చేయడం లేదని తెలిపాడు. ఈ అరేంజ్ మ్యారేజ్ కోసం కనీసం 25 లక్షల ప్యాకేజీ కలిగిన వరుడి కోసం వధువు తల్లిదండ్రులు వెదుకుతున్నట్లు వెల్లడించాడు. అందుకే తన స్నేహితుడిని తిరస్కరించినట్లు చెప్పాడు. ఇప్పుడు ఈ ట్వీట్ విపరీతంగా వైరల్ అవుతోంది.