IPO News: రెండు నెలల్లో ఐపీవో సంచలనాలు.. బంపర్ లాభాలతో ఇన్వెస్టర్ల పండగ..

IPO News: ఇటీవలి కాలంలో ఎన్నడూ చూడని రీతిలో ఐపీవోలు మార్కెట్లోకి వస్తున్నాయి. వీటికి అదే స్థాయిలో ఇన్వెస్టర్ల నుంచి ఆదరణ సైతం లభిస్తోంది. ఈ క్రమంలో కొన్ని నెలలు గడవక ముందరే ఇన్వెస్టర్లకు భారీ లాభాలను తెచ్చిపెడుతున్నాయి.

అవును మార్కెట్లోకి వచ్చి ఇంకా రెండు నెలల కూడా ఇంకా పూర్తి కాకుండానే బొండాడ ఇంజనీరింగ్ ఐపీవో తన ఇన్వెస్టర్లను ధనవంతులుగా మార్చేసింది. ఐపీవో సమయంలో కంపెనీ ఒక్కో షేరును రూ.75 చొప్పున విక్రయించింది. ప్రస్తుతం మార్కెట్లో బొండాడ ఇంజినీరింగ్ షేర్లు రూ.250ను దాటాయి. ఈ క్రమంలో 52 వారాల గరిష్ఠ ధరను గమనిస్తే రూ.268.30గా ఉండగా.. షేర్ల 52 వారాల కనిష్ట స్థాయి రూ.142.50గా ఉంది.

రిటైల్ ఇన్వెస్టర్లు రూ.1.20 లక్షలతో ఒక్క లాట్ షేర్లను కొనుగోలు చేశారు. ఐపీవో లిస్టింగ్ సమయంలో స్టాక్ ధర రూ.142.50 వద్ద అరంగేట్రం చేసింది. ఆ తర్వాత అక్టోబర్ 17, 2023న స్టాక్ తన జీవితకాల గరిష్ఠ స్థాయిని తాకింది. కంపెనీ ఐపీవోలో 1 లాట్ అంటే 1600 షేర్లు కొనుగోలు చేసిన ఇన్వెస్టర్లు దానిని కొనసాగించి ఉంటే ప్రస్తుతం దాని విలువ రూ.4.21 లక్షలుగా ఉండేది. అంటే దాదాపు రూ.3 లక్షల లాభం వచ్చి ఉండేది.

ఐపీవో సమయంలో రిటైల్ ఇన్వెస్టర్ల నుంచి అపురూపమైన స్పందన లభించింది. దీంతో 112 కంటే ఎక్కువ సార్లు ఐపీవో సబ్‌స్క్రయిబ్ చేయబడింది. ఆగస్టు 22తో ముగిసిన ఐపీవోలో రిటైల్ ఇన్వెస్టర్ల కోటా 100 రెట్ల కంటే ఎక్కువ సార్లు సబ్‌స్క్రైబ్ చేయబడింది. అలాగే ప్రమోటర్ల వాటాలను పరిశీలిస్తే ఐపీవోకి ముందు కంపెనీలో 86 శాతంగా ఉన్న వారి వాటా ప్రస్తుతం 63.33 శాతానికి పరిమితమైంది. 2012లో ప్రారంభమైన బొండాడ ఇంజనీరింగ్ సంస్థ టెలికాం, సోలార్ ఎనర్జీ రంగాల్లో కంపెనీలకు సేవలు అందించే వ్యాపారాన్ని కొనసాగిస్తోంది.