మహిళల కోసం సరికొత్త ఆలోచన: ఫుడ్ స్టార్టప్‌లో బాలీవుడ్ స్టార్ పెట్టుబడి

బాలీవుడ్ స్టార్ అర్జున్ కపూర్ కొత్త వ్యాపారంలోకి అడుగు పెట్టారు. ఓ ఫుడ్ డెలివరీ స్టార్టప్‌లో ఆయన పెట్టుబడులు పెట్టారు. foodcloud.in అనే స్టార్టప్‌లో ఆయన ఇన్వెస్ట్ చేశారు. ఈ ఫుడ్ స్టార్టప్ భిన్నమైనది.త ఇది మహిళలు తమ ఇళ్లలో వండే వంటకాలను విక్రయిస్తుంది. మహిళలను వ్యాపారవేత్తలుగా మలిచే లక్ష్యంతో తాము పని చేస్తున్నట్లు foodcloud.in పేర్కొంది.

మహిళల కోసం.. సూపర్ ఆలోచన

సమాజంలోని లింగ వివక్షను తగ్గించి మార్పు తీసుకురావడమే ఈ సంస్థ లక్ష్యమని, ఈ సంస్థ ఆలోచనలు తనకు ఎంతగానో నచ్చాయని, గత కొన్ని నెలలుగా ఈ ప్లాట్ ఫామ్ పైన అవగాహన పెంచుకునేందుకు తన వంతు ప్రయత్నం చేస్తున్నానని అర్జున్ కపూర్ చెప్పారు.

అందుకే అర్జున్ కపూర్ పెట్టుబడి

గృహిణులు సొంతగా ఆదాయాన్ని ఆర్జించడం ద్వారా సాధికారత సాధించగలరని అర్జున్ కపూర్ అన్నారు. ఢిల్లీ, ముంబై, కోల్‌కతాకు చెందిన 4000 మందికి పైగా మహిళలు ఈ ప్లాట్‌ఫాంలో పేర్లు నమోదు చేసుకొని సొంత వ్యాపారాలు ప్రారంభించారు.

ఉత్తమ హోమ్ చెఫ్స్

ఉత్తమమైన హోమ్ చెఫ్స్‌ను ఓ వేదిక పైకి తీసుకు వచ్చేందుకు తాను కూడా ప్రయత్నిస్తున్నానని, ఇందుకు ఆనందంగా ఉందని, వివిధ నగరాల నుంచి ఒకే ప్లాట్ ఫాంపైకి తీసుకు వచ్చేందుకు ప్రయత్నాలు చేస్తున్నామని, దేశంలోని వివిధ నగరాలు, ప్రాంతాల నుంచి ఉత్తమ పాక శాస్త్ర నిపుణులను గుర్తించేందుకు చూస్తున్నామని అర్జున్ కపూర్ అన్నారు.