Byjus: బైజూస్ అకౌంట్స్ తనిఖీకి కేంద్రం ఆదేశం.. అబ్బే అదేమీ లేదంటున్న యూనికార్న్

Byjus: టాప్ యూనికార్న్ కంపెనీల్లో ఒకటిగా వెలుగొందిన బైజూస్ ప్రస్తుతం గడ్డు పరిస్థితిని ఎదుర్కొంటోంది. సంస్థకు చెందిన టాప్ ఎగ్జిక్యూటివ్స్ రిజైన్ చేయగా, ఆడిటింగ్ బాధ్యతల నుంచి డెలాయిట్ సైతం తప్పుకుంది. ఉద్యోగుల PF కూడా సమయానికి జమ చేయలేని ఆరోపణలు వినిపించాయి.

బైజూస్ లో వెలుగు చూసిన ఈ వైఫల్యాల ఆరోపణలపై తనిఖీ నిర్వహించాలని భారత కార్పొరేట్ వ్యవహారాల మంత్రిత్వ శాఖ ఆదేశించింది. ఈమేరకు బ్లూమ్ బెర్గ్ ఓ నివేదికను విడుదల చేసింది. 6 వారాల్లోగా ఈ వ్యవహారంపై నివేదిక సమర్పించాలని కోరినట్లు అందులో పేర్కొంది. అవసరమైతే దీనిని సీరియస్ ఫ్రాడ్ ఇన్వెస్టిగేషన్ ఆఫీస్‌(SFIO) కు బదిలీ చేయనున్నట్లు తెలిపింది.

మరో రెండు దేశీయ మీడియా సంస్థలు సైతం ఇదే విషయాన్ని నివేదించాయి. ఇప్పటికే SFIO విచారణ జరుగుతున్నట్లు పేర్కొన్నాయి. కానీ బైజూస్ మాత్రం ఈ వార్తలను ఖండించింది. ఈ తనిఖీల గురించి SFIO నుంచి తమకేమీ సమాచారం అందలేదని వెల్లడించింది. కార్పొరేట్ వ్యవహారాలను హ్యాండిల్ చేయడానికి బోర్డ్ అడ్వైడరీ కమిటీని నియమించాలని చూస్తున్నట్లు చెప్పింది.