Blinkit: తోబుట్టువుల కోసం బ్లింకిట్ కొత్త ఫీచర్.. భారత్‌లో అక్కచెల్లెళ్లకు ఇలా గిఫ్ట్స్‌ పంపించండి..

Rakhi News: కస్టమర్లకు త్వరితగతిన సేవలందించేందుకు దూసుకుపోతున్న క్విక్ కామర్స్ రంగంలో కొత్తదనాన్ని పరిచయం చేయాలని ఆయా సంస్థలు ఉవ్విళ్లూరుతున్నాయి. మంచి గ్రోత్ అవకాశాలు ఉండటంతో ఇ-కామర్స్ సంస్థలు కూడా ఈ విభాగంలో సత్తా చాటేందుకు సర్వశక్తులూ ఒడ్డుతున్నాయి. ఫుడ్ డెలివరీ యాప్స్ గా ప్రస్థానం ప్రారంభించిన స్విగ్గీ, జొమాటోలు ఓ అడుగు ముందుగానే ఈ రంగంలోకి ప్రవేశించాయి. ఏవైనా పండుగలు, ప్రత్యేక రోజుల్లో కొత్త ఐడియాలతో యూజర్ల మనసు దోచుకుంటున్నాయి.

అన్నాచెల్లెళ్ల అనుబంధానికి ప్రతీకగా జరుపుకునే రాఖీ పండుగను పురస్కరించుకుని బ్లింకిట్ కీలక ప్రకటన చేసింది. పనిభారం సహా ఇతర కారణాలవల్ల విదేశాల్లో ఉండి నేరుగా తమ తోబుట్టువులతో కలిసి పండుగ సెలబ్రేట్ చేసుకోలేని వారికోసం కొత్త ఐడియాతో ముందుకొచ్చింది. 6 దేశాల్లోని వ్యక్తులు తమ సోదరసోదరీమణులకు రాఖీలు సహా గిఫ్ట్స్ ఆర్డర్ చేసి పంపించేందుకు వినూత్న ఫీచర్ తీసుకొచ్చింది. ఈ అవకాశం 17 నుంచి 19 వరకు మాత్రమే అందుబాటులో ఉంటుందని కంపెనీ CEO అల్బిందర్ ధిండ్సా X వేదికగా వెల్లడించారు.

US, కెనడా, జపాన్, జర్మనీ, ఫ్రాన్స్, నెదర్లాండ్స్ దేశాల్లోని వ్యక్తులు ఆర్డర్ చేసే ఉత్పత్తులను కేవలం 10 నిమిషాల్లోనే తమ తోబుట్టువులకు ఇండియాలో అందిస్తామని సంస్థ హామీ ఇచ్చింది. ఇక భారత్‌లో తయారు చేయబడిన రాఖీలను ఎటువంటి ఛార్జీలు లేకుండా ఉచితంగా డెలివరీ చేయనున్నట్లు ప్రకటించింది. దీంతో కంపెనీ తీసుకున్న చొరవను పలువురు నెటిజన్లు ప్రశంసిస్తున్నారు. ఇ-కామర్స్, క్విక్ కామర్స్ సంస్థలు గతంతో పోలిస్తే కస్టమర్ సెంట్రిక్ గా పనిచేస్తున్నాయని కితాబిస్తున్నారు.

ఇక దేశీయ క్విక్ కామర్స్ విభాగం మూడు పువ్వులు ఆరు కాయలుగా సాగిపోతుందని చెప్పడానికి బ్లింకిట్ ఉదాహరణగా చెప్పవచ్చు. జొమాటో యాజమాన్యంలోని ఈ కంపెనీ తన మాతృ సంస్థ లాభాల్లో కీలక పాత్ర పోషించినట్లు తెలుస్తోంది. గత ఆర్థిక సంవత్సరంలో నమోదైన 2,416 కోట్ల నిర్వహణ ఆదాయంతో పోలిస్తే Q1 2024లో 74.1 శాతం వృద్ధితో ఏకంగా 4,200 కోట్లకు చేరింది. ఇందులో బ్లింకిట్ వాటా ఎక్కువగానే ఉన్నట్లు చెబుతున్నారు.