Haldirams: హల్దీరామ్స్ లో మెజారిటీ వాటా కొనుగోలు బ్లాక్ స్టోన్ చర్చలు..!

ప్రముఖ పెట్టుబడి సంస్థ బ్లాక్ స్టోన్ దేశంలోని అతిపెద్ద సావరీస్, స్నాక్స్ కంపెనీ హల్దీరామ్స్ లో వాటా కొనుగోలు చేసేందుకు చర్చలు జరుపుతున్నట్లు తెలుస్తోంది. రూ. 70,000 కోట్ల విలువతో ఉన్న వ్యాపారంలో నియంత్రణ వాటా కోసం చర్చలు జరుగుతోన్నాయని వార్తలు వస్తున్నాయి. బ్లాక్‌స్టోన్, కన్సార్టియం భాగస్వాములు అబుదాబి ఇన్వెస్ట్‌మెంట్ అథారిటీ, సింగపూర్‌కు చెందిన GIC - బ్లాక్‌స్టోన్ గ్లోబల్ ఫండ్స్ మద్దతుదారులు గత కొన్ని నెలలుగా హల్దీరామ్స్ యజమానులైన అగర్వాల్ కుటుంబానికి చెందిన ఢిల్లీ, నాగ్‌పూర్‌కు చెందిన సభ్యులతో చర్చలు జరుపుతున్నారు.

ఈ కొనుగోలుకు సంబంధించిన డీల్ ఖరారైతే, హల్దీరామ్ రూ.70,000 కోట్ల విలువను పొందవచ్చు. ఇంతకుముందు ఖరీదైన వాల్యుయేషన్ కారణంగా చర్చలు నిలిచిపోయాయి. అయితే గత కొన్ని వారాల్లో, డీల్‌కు సంబంధించి మళ్లీ చర్చలు ప్రారంభమయ్యాయి. బ్లాక్‌స్టోన్ కన్సార్టియం స్నాక్ మేకర్‌లో 76 శాతం వరకు వాటాను కొనుగోలు చేసేందుకు చర్చలు జరుపుతోందని ఎకనామిక్ టైమ్స్ మొదట మే 14న నివేదించింది.గత కొన్ని వారాలుగా హల్దీరామ్ ప్రమోటర్లు, బ్లాక్‌స్టోన్ మధ్య చర్చలు మరోసారి ఊపందుకున్నాయని వార్తలు వస్తున్నాయి.

ఒక ఒప్పందం కార్యరూపం దాల్చినట్లయితే, ఇది ఇప్పటి వరకు భారతదేశంలో అతిపెద్ద ప్రైవేట్ ఈక్విటీ కొనుగోలు అవుతుంది. హల్దీరామ్ ప్రమోటర్లు కూడా IPO ద్వారా వాటాలను విక్రయించే ఆలోచనలో ఉన్నందున బ్లాక్‌స్టోన్‌తో చర్చలు విచ్ఛిన్నం కావచ్చని తెలుస్తోంది. హల్దీరామ్ స్నాక్స్ ప్రైవేట్ లిమిటెడ్, హల్దీరామ్ ఫుడ్స్ ఇంటర్నేషనల్ ప్రైవేట్ లిమిటెడ్‌లను హల్దీరామ్ స్నాక్ ఫుడ్ ప్రైవేట్ లిమిటెడ్‌లో విలీనం చేస్తున్నారు.

కొత్త కంపెనీలో ఢిల్లీ బ్రాంచ్ 56 శాతం వాటాను కలిగి ఉండగా, నాగ్‌పూర్ బ్రాంచ్ 44 శాతం వాటాను కలిగి ఉంటుంది. ఈ విలీనానికి కాంపిటీషన్ కమిషన్ ఆఫ్ ఇండియా ఆమోదం తెలిపింది. ఈ ప్రక్రియ త్వరలో పూర్తవుతుంది. గత నెలలో అగర్వాల్ కుటుంబం కూడా తన వ్యాపారం ఐపీఓను తీసుకురావాలని ఆలోచిస్తున్నట్లు బ్లూమ్‌బెర్గ్‌ని ఉటంకిస్తూ ఒక నివేదిక ప్రచురితమైంది. బ్లాక్‌స్టోన్ ప్రతినిధి చర్చలపై వ్యాఖ్యానించడానికి నిరాకరించారు. హల్దీరామ్ సీఈఓ కేకే చుటానీ కూడా వ్యాఖ్యానించడానికి నిరాకరించారు. రేటింగ్ ఏజెన్సీ క్రిసిల్ నివేదికల ప్రకారం, ఢిల్లీకి చెందిన వ్యాపారం హల్దీరామ్ స్నాక్స్ ప్రైవేట్ లిమిటెడ్ FY23లో రూ. 6,377 కోట్ల ఆదాయాన్ని, రూ. 593 కోట్ల లాభాన్ని ఆర్జించింది.