మళ్లీ 1 ట్రిలియన్ డాలర్లకు చేరుకున్న బిట్ కాయిన్ మార్కెట్ క్యాప్

క్రిప్టోకరెన్సీ కింగ్ బిట్ కాయిన్ మార్కెట్ క్యాపిటలైజేషన్ మళ్ళీ 1 ట్రిలియన్ డాలర్లకు చేరుకుంది. గత నెలలో ఓ సమయంలో 58,000 డాలర్లు దాటి ఆల్ టైమ్ గరిష్టాన్ని తాకిన బిట్ కాయిన్ ఆ తర్వాత 45వేల డాలర్ల దిగువకు పడిపోయింది. కొద్ది రోజుల తర్వాత తిరిగి పుంజుకోవడం ప్రారంభించింది. దీంతో బిట్ కాయిన్ గత నాలుగు రోజులుగా ఎగిసిపడుతోంది. న్యూయార్క్ మార్కెట్లో బిట్ కాయిన్ 57,000 డాలర్లకు చేరుకొని, ఆల్ టైమ్ గరిష్టం దగ్గరకు వచ్చింది. ఓ సమయంలో 5.2 శాతం మేర లాభపడింది. ఫిబ్రవరి తర్వాత ఈ నెలలో మొదటిసారి బిట్‌కాయిన్ 1 ట్రిలియన్ డాలర్ల మార్కెట్ క్యాప్‌ను దాటింది.

ఫిబ్రవరి నెలలో అమెరికాలో కన్స్యూమర్ ధరలు అంచనాల కంటే తక్కువ పెరిగాయి. బిట్ కాయిన్ ప్రపంచవ్యాప్తంగా క్రిప్టో కరెన్సీలో మొదటి స్థానంలో ఉంది. ఆ తర్వాత ఎథెర్ రెండో స్థానంలో ఉంది. ఎథెర్ క్రిప్టో ఇటీవల 3 శాతం మేర పెరిగింది. బిట్ కాయిన్ (BTC), ఎథెరియమ్ (ETH)తో పాటు ఇతర క్రిప్టో కరెన్సీలు కార్డానో (ADA), పోల్కాడాట్ (DOT), XRP (XRP), యూనిస్వాప్ (UNI) కూడా సానుకూలంగా ఉన్నాయి.

టెస్లా ఇంక్‌తో పాటు ఏఆర్‌కే ఇన్నోవేషన్ ఈటీఎఫ్ వంటి సంస్థలు ఊతమివ్వడంతో బిట్ కాయిన్ తిరిగి పుంజుకుంటోంది. తాము 200 మిలియన్ డాలర్లను సమీకరించామని ఇటీవల బిట్ కాయిన్ సంబంధిత ఫైనాన్షియల్ సర్వీసెస్ NYDIG వెల్లడించింది. స్టోన్ రిడ్జ్ హోల్డింగ్స్ గ్రూప్, మోర్గాన్ స్టాన్లీ, న్యూ యార్క్ లైఫ్, మాస్ మ్యుచువల్, సోరోస్ ఫండ్ మేనేజ్‌మెంట్ వంటి వాటి నుండి ఈ నిధులను సమీకరించింది.