మళ్లీ పుంజుకున్న బిట్ కాయిన్ వ్యాల్యూ

క్రిప్టోకరెన్సీ బిట్ కాయిన్ నేడు రెండు వారాల గరిష్టాన్ని తాకింది. ఈ డిజిటల్ కరెన్సీ 54,000 డాలర్ల మార్కును దాటింది. ఇటీవల బిట్ కాయిన్ వ్యాల్యూ భారీగా క్షీణించిన విషయం తెలిసిందే. అయితే మళ్లీ పరుగు పెడుతోంది. యూఎస్ ట్రేడింగ్ ప్రారంభంలో బిట్ కాయిన్ వ్యాల్యూ 4.6 శాతం ఎగిసింది. టెస్లా ఇంక్‌తో పాటు ఏఆర్‌కే ఇన్నోవేషన్ ఈటీఎఫ్ వంటి సంస్థలు ఊతమివ్వడంతో బిట్ కాయిన్ క్రమంగా పుంజుకుంటోంది.

తాము 200 మిలియన్ డాలర్లను సమీకరించామని ఇటీవల బిట్ కాయిన్ సంబంధిత ఫైనాన్షియల్ సర్వీసెస్ NYDIG తెలిపింది. స్టోన్ రిడ్జ్ హోల్డింగ్స్ గ్రూప్, మోర్గాన్ స్టాన్లీ, న్యూ యార్క్ లైఫ్, మాస్ మ్యుచువల్, సోరోస్ ఫండ్ మేనేజ్‌మెంట్ వంటి వాటి నుండి ఈ నిధులను సమీకరించింది.

బిట్ కాయిన్‌తో పాటు మరో క్రిప్టోకరెన్సీ ఎథేరియమ్ బుల్లిష్‌గా ఉన్నాయి. క్రితం వారం వరకు కాస్త క్షీణించిన ఈ క్రిప్టోకరెన్సీ తిరిగి పుంజుకుంటోందని మార్కెట్ నిపుణులు చెబుతున్నారు. క్రిప్టో మరింత బలంగా కనిపిస్తోందని ఓండా సీనియర్ మార్కెట్ అనలిస్ట్ ఎడ్వార్డ్ మోయా అన్నారు. బిట్ కాయిన్ వ్యాల్యూ త్వరలో 75,000 డాలర్లకు చేరుకోవచ్చునని క్రిప్టో మార్కెట్ నిపుణులు అంచనా వేస్తున్నారు.