రాత్రికి రాత్రే కోటీశ్వరులైన ఉద్యోగులు.. వారి తలరాతను మార్చిన కంపెనీ షేర్లు..

Billionaire Factories: ఆర్టిఫిషియల్ ఇంటెలిజెన్స్ దిగ్గజం ఆంత్రోపిక్ (Anthropic) ఇటీవలి పబ్లిక్ ఇష్యూ (IPO) తర్వాత.. ఆ సంస్థ వ్యవస్థాపకులు బిలియనీర్లుగా, ఉద్యోగులు రాత్రికి రాత్రే మిలియనీర్లుగా మారడం ప్రపంచ వ్యాపార వర్గాల్లో చర్చనీయాంశమైంది. 2021లో ఓపెన్‌ఏఐ (OpenAI) నుండి బయటకు వచ్చి ఆంత్రోపిక్‌ను స్థాపించిన ఏడుగురు సహ-వ్యవస్థాపకుల ఉమ్మడి సంపద ప్రస్తుతం దాదాపు రూ. 8.97 లక్షల కోట్లకు చేరుకుంది.

ఈ నేపథ్యంలో, ప్రపంచవ్యాప్తంగా అత్యధిక మంది బిలియనీర్లను సృష్టించిన కంపెనీలపై.. ప్రముఖ ట్రేడింగ్ సంస్థ అట్మోస్ (Atmos) నవంబర్ 2026లో నిర్వహించిన తాజా అధ్యయనం ఆసక్తికర విషయాలను వెల్లడించింది. దాదాపు 100 అగ్రశ్రేణి కంపెనీలను పరిశీలించిన ఈ నివేదికలో.. కేవలం కంపెనీని స్థాపించడం లేదా అందులో ఉద్యోగులుగా పనిచేయడం ద్వారా ఫోర్బ్స్ రియల్-టైమ్ బిలియనీర్ల జాబితాలో చోటు సంపాదించిన వారిని మాత్రమే లెక్కలోకి తీసుకున్నారు.

బిలియనీర్ల సంఖ్య పరంగా ఆంత్రోపిక్ (7 మంది) అగ్రస్థానంలో ఉన్నప్పటికీ.. మొత్తం సంపద విలువ విషయంలో గూగుల్ మాతృసంస్థ ఆల్ఫాబెట్ (Alphabet) ప్రపంచంలోనే నంబర్ వన్ స్థానంలో నిలిచింది. ఆల్ఫాబెట్‌తో అనుబంధం ఉన్న ఐదుగురు బిలియనీర్ల ఉమ్మడి నికర విలువ ఏకంగా రూ. 51.98 లక్షల కోట్లుగా నమోదైంది.

ఇందులో సహ-వ్యవస్థాపకులు లారీ పేజ్ (రూ. 25.14 లక్షల కోట్లు), సెర్గే బ్రిన్ (రూ. 23.13 లక్షల కోట్లు) ప్రధాన వాటాను కలిగి ఉండగా.. మాజీ సీఈఓ ఎరిక్ ష్మిత్, ప్రస్తుత సీఈఓ సుందర్ పిచాయ్, తొలి ఉద్యోగిని మరిస్సా మేయర్ ఈ జాబితాలో ఉన్నారు. ఆ తర్వాత ఫేస్‌బుక్ మాతృసంస్థ మెటా (Meta) ఆరుగురు బిలియనీర్లతో రెండో స్థానంలో నిలిచింది. సహ-వ్యవస్థాపకులు మార్క్ జుకర్‌బర్గ్, ఎడ్వర్డో సావెరిన్, డస్టిన్ మోస్కోవిట్జ్‌లతో పాటు సీనియర్ ఎగ్జిక్యూటివ్‌లుగా పనిచేసిన సీన్ పార్కర్, షెరిల్ శాండ్‌బర్గ్, జెఫ్ రోత్‌షీల్డ్‌ల ఉమ్మడి సంపద రూ. 24.71 లక్షల కోట్లుగా ఉంది.

Also Read

నాడు ఏఐని శాసించిన దిగ్గజం నేడు దీన స్థితిలో.. రూ. లక్షల కోట్ల నష్టాలతో భోరుమంటున్న ఇన్వెస్టర్లు..

మరోవైపు, రష్యన్ బ్యాంకింగ్ దిగ్గజం 'ఆల్ఫా గ్రూప్'లో ముగ్గురు వ్యవస్థాపకులు (మిఖాయిల్ ఫ్రిడ్‌మన్, జర్మన్ ఖాన్, అలెక్సీ కుజ్మిచెవ్), ముగ్గురు ఉన్నతోద్యోగులతో కలిపి ఆరుగురు బిలియనీర్లు రూ. 4.17 లక్షల కోట్ల సంపదను ఆర్జించారు. స్విస్ మైనింగ్ సంస్థ 'గ్లెన్‌కోర్' (Glencore) ఇందులో ఒక ప్రత్యేకమైన ఉదాహరణగా నిలిచింది. ఇందులో ఒక్కరు కూడా వ్యవస్థాపకులు కానప్పటికీ, మాజీ సీఈఓ ఇవాన్ గ్లాసెన్‌బర్గ్ సహా ఆరుగురు ఉన్నత కార్యనిర్వాహకులు ఏకంగా రూ. 2.73 లక్షల కోట్ల సంపదను కూడబెట్టారు.

ఆసియా నుండి చైనా కంపెనీలు సత్తా చాటగా.. బ్యాటరీ దిగ్గజం CATL (5 గురు బిలియనీర్లు - రూ. 5.92 లక్షల కోట్లు).. స్మార్ట్‌ఫోన్ సంస్థ షియోమి (5 గురు - రూ. 3.38 లక్షల కోట్లు), ఫోషాన్ హైటియన్ (5 గురు - రూ. 1.39 లక్షల కోట్లు) జాబితాలో చోటు దక్కించుకున్నాయి.

ఇక ఈ ప్రతిష్ఠాత్మక ప్రపంచ జాబితాలో చోటు సంపాదించిన ఏకైక భారతీయ కంపెనీగా ఐటీ దిగ్గజం 'ఇన్ఫోసిస్' (Infosys) నిలిచింది. ఇన్ఫోసిస్‌ను స్థాపించిన ఐదుగురు బిలియనీర్ వ్యవస్థాపకుల ఉమ్మడి సంపద సుమారు రూ. 1.25 లక్షల కోట్లుగా అట్మోస్ నివేదిక అంచనా వేసింది. సరైన సమయంలో ఒక వినూత్న సంస్థను ప్రారంభించడం లేదా ప్రారంభ దశలో ఉద్యోగులుగా చేరి కంపెనీ వృద్ధిలో భాగస్వాములు కావడం ద్వారా అపారమైన సంపదను సృష్టించవచ్చని ఈ అధ్యయనం స్పష్టం చేస్తోంది.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.