ఎలాన్ మస్క్ ట్విట్టర్ టేకోవర్‌పై బిల్ గేట్స్ ఏమన్నారంటే?

టెస్లా అధినేత ఎలాన్ మస్క్ ట్విట్టర్‌ను సొంతం చేసుకున్న విషయం తెలిసిందే. అయితే ఎలాన్ మస్క్ కారణంగా ఈ మైక్రోబ్లాగింగ్ సైట్ అధ్వాన్నంగా తయారు కావొచ్చునని బిల్ గేట్స్ అభిప్రాయం వ్యక్తం చేశారు. స్పేస్ ఎక్స్ అధిపతి ఎలాన్ మస్క్ తాజా కొనుగోలుపై బిల్ గేట్స్ ఆందోళన వ్యక్తం చేశారు. స్వేచ్ఛా ప్రసంగానికి మద్దతు ఇచ్చే ఎలాన్ మస్క్, ట్విట్టర్‌లో కరోనా టీకాల విషయంలో తప్పుడు సమాచారం వ్యాప్తి కాకుండా ఎలా చూస్తారని ప్రశ్నించారు.

ట్విట్టర్‌ను కొనుగోలు చేస్తున్న సమయంలో ఎలాన్ మస్క్‌‍కు మీరు ఏదైనా సలహా ఇవ్వాలనుకున్నారా అని ప్రశ్నించగా, కరోనా వ్యాక్సీన్ పైన తప్పుడు వార్తలు రాకుండా చూడటం కష్టమే అన్నారు. వాక్ స్వాతంత్రం గురించి మాట్లాడే ఆయన వ్యాక్సీన్ ప్రజలను చంపేస్తాయనో లేదంటే బిల్ గేట్స్ ప్రజలందరి జీవితాల్లోకి తొంగి చూస్తున్నారనో వ్యాఖ్యలు వస్తే మస్క్ ఏం చేస్తారని ప్రశ్నించారు. ఇది నాయకత్వ సమస్య అని, ట్విట్టర్ సమస్య అన్నారు.

వాతావరణ మార్పులకు సహకరిండంలో టెస్లా పాత్రను తాను ప్రశంసిస్తున్నానని బిల్ గేట్స్ అన్నారు. ట్విట్ట‌ర్ కోసం గొప్ప ఇంజినీర్ల‌ను నియ‌మించ‌గ‌ల‌రని, మ‌స్క్ వ‌ద్ద డబ్బు ఉందని, కానీ టెస్లా, స్పేస్ ఎక్స్ మాదిరి ట్విట్ట‌ర్‌లో విజయం సాధించగలమని అంచనా వేయవద్దని సూచించారు.