Retail Inflation: శుభవార్త.. ఆగస్టులో తగ్గిన రిటైల్ ద్రవ్యోల్బణం.. ఎంతంటే..

Retail Inflation: కేవలం భారతదేశాన్ని మాత్రమే కాక ప్రపంచాన్ని పట్టి పీడిస్తున్న సమస్య ద్రవ్యోల్బణం. వస్తున్న సంపాదన కంటే ఖర్చులు పెరగటం, వస్తువుల ధరలు ఆకాశానికి చేరుకోవటంతో మధ్యతరగతి ప్రజలు అల్లాడిపోతున్నారు.

ఈ క్రమంలో తాజాగా ప్రభుత్వం విడుదల చేసిన గణాంకాలు మధ్యతరగతి వర్గానికి స్వల్ప ఊరటను కలిగిస్తోంది. జూలైతో పోల్చితే ఆగస్టులో రిటైల్ ద్రవ్యోల్బణం తగ్గింది. అవును జూలైలో 7.44 శాతంతో 15 నెలల గరిష్ఠాన్ని తాకినప్పటికీ.. ఆగస్టులో తగ్గి 6.83 శాతానికి చేరుకుంది. అయితే ఇది రిజర్వు బ్యాంక్ నిర్థిష్ట పరిమితుల కంటే ఎక్కువే.

గత నెలలో ప్రధానంగా టమాటా ధరలు ఆందోళనకర స్థాయిలకు చేరుకున్నప్పటీకీ ప్రస్తుతం పూర్తిగా అదుపులోకి వచ్చాయి. ఆగస్టులో ద్రవ్యోల్బణం తగ్గటానికి ఆహార ఉత్పత్తుల ధరలు తగ్గటం ప్రధాన కారణంగా నిలిచింది. జులైతో పోల్చితే ఆగస్టు నెలలో ఆహార పదార్థాల ద్రవ్యోల్బణం తగ్గుముఖం పట్టి 10 శాతం దిగువకు పడిపోయింది. జులైలో 11.51 శాతంగా ఉన్న ఆహార ద్రవ్యోల్బణం ఆగస్టులో 9.94 శాతానికి చేరుకుంది.

ఆసక్తికరమైన విషయం ఏమిటంటే పట్టణ ప్రాంతాల్లో రిటైల్ ద్రవ్యోల్బణం 6.59 శాతంగా ఉంది. ఇది అంతకు ముందు నెలలో 7.20 శాతం ఉంది. గ్రామీణ ప్రాంతాలను పరిశీలిస్తే జూలైలో 7.63 శాతం నుంచి 7.02 శాతానికి తగ్గింది. జూలైలో 37.34 శాతంగా ఉన్న కూరగాయల ద్రవ్యోల్బణం.. తగ్గి ఆగస్టులో 26.14 శాతానికి చేరుకుంది. అలాగే పాలు, ఇతర పాల ఉత్పత్తుల ద్రవ్యోల్బణం 8.34 శాతం నుంచి తగ్గి 7.73 శాతానికి చేరుకున్నాయి.