Akasa Air: జంతు ప్రియులకు ఆకాశ గుడ్ న్యూస్.. నవంబర్ 1st నుంచి అందుబాటులోకి..

Akasa Air: చాలా మంది ఈ రోజుల్లో ఏదో ఒక పెంపుడు జంతువును పెంచుకోవటం సర్వసాధారణం అయిపోయింది. అయితే ఎక్కడికైనా దూర ప్రయాణం చేసేందుకు పెట్స్ ని వదిలి వెల్లటం ఇష్టం ఉండదు. వాటిని సైతం తమతోనే తీసుకెళ్లాలని భావిస్తుంటారు. అలాంటి వారికి బిగ్ బుల్ ఎయిర్‌లైన్స్ కంపెనీ గుడ్ న్యూస్ చెప్పింది.

పెట్ రూల్స్ ఇవే..

విమాన ప్రయాణంలో తమతో పాటు పెంపుడు జంతువులను విమానంలోకి అనుంతించాలని ఆకాశ ఎయిర్ నిర్ణయించింది. ఈ క్యారియర్ ఒక వ్యక్తికి ఒక పెంపుడు జంతువును అనుమతిస్తామని వెల్లడించింది. అయితే దాని బరువు 7 కేజీలలోపు ఉండాలని తెలిపింది. అయితే వీటికి సంబంధించిన వ్యాక్సినేషన్ వివరాలను ముందుగా అందించాల్సి ఉంటుందని తెలుస్తోంది.

బరువు ఎక్కువగా ఉంటే..

7- 32 కిలోల మధ్య బరువున్న పెంపుడు జంతువులను విమానాశ్రయాల్లో తనిఖీ చేయాల్సి ఉంటుందని కంపెనీ వెల్లడించింది. 32-100 కిలోల మధ్య బరువు ఉండే వాటిని పెద్ద డబ్బాల్లో తరలించాలి కాబట్టి కార్గో టెర్మినల్‌లో చెక్ ఇన్ చేయాల్సి ఉంటుందని ఆకాశ ప్రతినిధి వెల్లడించారు.

అక్టోబర్ నుంచి..

ప్రయాణికులు తమతో పాటు వారి పెంపుడు జంతువులను నవంబర్ 1 నుంచి విమానాల్లోకి అనుమతిస్తారు. ఇందుకోసం అక్టోబర్ 15 నుంచి బుకింగ్స్ ప్రారంభమవుతాయి. మెుదటి దశలో పెంపుడు కుక్కలు, పిల్లులను అనుమతిస్తున్నట్లు కంపెనీ వెల్లడించింది. ఈ విధానాన్ని రానున్న కాలంలో క్రమంగా పెంచుతామని ఎయిర్‌లైన్ విలేకరుల సమావేశంలో తెలిపింది.

ఇతర కంపెనీలు..

మన దేశంలో ఎయిర్ ఇండియా, జెట్ ఎయిర్‌వేస్, స్పైస్‌జెట్, విస్తారా కూడా ప్రయాణికుల పెంపుడు జంతువులను ఆన్‌బోర్డ్‌లో అనుమతిస్తాయి. అయితే ఇండిగో, ఎయిర్ ఏషియా కేవలం సర్వీస్ యానిమల్స్ ను మాత్రమే అనుమతిస్తాయని తెలుస్తోంది. దివంగత ఇన్వెస్టర్ రాకేష్ జున్‌జున్‌వాలా ఆకాశ ఎయిర్ సంస్థను ఆగస్ట్ 7న ప్రారంభించారు. అక్టోబర్ 10 నాటికి వారానికి 250 విమానాలను నడపాలని యోచిస్తోంది.