Mutual fund: మ్యూచువల్ ఫండ్స్ హిస్టరీలోనే అతిపెద్ద మార్పు.. ఏఐ సాయంతో అదిరిపోయే రిటర్న్స్ వచ్చేలా ప్లాన్!

మ్యూచువల్ ఫండ్లలో పెట్టుబడి పెట్టేవారికి ఒక ఇంట్రెస్టింగ్ న్యూస్. అదేంటంటే.. ఇకపై మ్యూచువల్ ఫండ్స్ లో ఫండ్ మేనేజర్ల అవసరం తగ్గిపోబోతోంది. రాబోయే రోజుల్లో ఫండ్ మేనేజ్ మెంట్ ఏఐ చూసుకోబోతోంది. ఆ దిశగా ఇప్పుడిప్పుడే అడుగులు పడుతున్నాయి.

గత 16 ఏళ్లుగా గ్లోబల్ మార్కెట్లలో అల్గోరిథమిక్ ట్రేడింగ్‌లో రారాజుగా వెలుగొందుతున్న 'ఆల్ఫాగ్రెప్' (AlphaGrep) ఇప్పుడు భారతీయ రిటైల్ ఇన్వెస్టర్ల ముందుకు వస్తోంది. కంపెనీ సీఈఓ భౌతిక్ అంబానీ నేతృత్వంలో సరికొత్త మ్యూచువల్ ఫండ్ (Mutual Fund) హౌస్‌ను ప్రారంభించబోతున్నారు. ఇప్పటి వరకు కేవలం పెద్ద పెద్ద సంస్థలకే పరిమితమైన అధునాతన 'క్వాంట్' (Quant) స్ట్రాటజీలను సామాన్యులకు అందుబాటులోకి తీసుకురావడమే వీరి ప్రధాన లక్ష్యం.

ఏమిటీ ఈ క్వాంట్ పవర్?

సాధారణంగా మనం మ్యూచువల్ ఫండ్లలో పెట్టుబడి పెట్టినప్పుడు, ఆ ఫండ్ మేనేజర్ తన అనుభవం లేదా నమ్మకంతో షేర్లను ఎంచుకుంటారు (Discretionary). కానీ, ఆల్ఫాగ్రెప్ తీసుకొస్తున్న విధానంలో మనుషుల అభిప్రాయాల కంటే.. డేటా, అల్గోరిథంలు , AI (ఆర్టిఫిషియల్ ఇంటెలిజెన్స్) కీలక పాత్ర పోషిస్తాయి. దీనివల్ల భయం, అత్యాశ వంటి మానవ సహజమైన తప్పులకు తావుండదు. కచ్చితమైన గణాంకాల ఆధారంగానే పెట్టుబడుల నిర్ణయాలు జరుగుతాయి.

ఏ ఫండ్ ముందుగా రాబోతోంది?

రెగ్యులేటరీ అనుమతులు వచ్చిన తర్వాత, వీరు మొదటగా 'డైనమిక్ మల్టీ-అస్సెట్ అలొకేషన్' (Dynamic Multi-Asset Allocation) ఫండ్‌ను లాంచ్ చేయాలని ప్లాన్ చేస్తున్నారు. ఇది కేవలం ఈక్విటీలోనే కాకుండా.. అప్పు (Debt) , కమోడిటీలలో కూడా పెట్టుబడి పెడుతుంది. మార్కెట్ ఒడిదుడుకులను బట్టి ఏ సమయంలో ఎందులో ఎంత పెట్టుబడి పెట్టాలో సాఫ్ట్‌వేర్ మోడల్స్ నిర్ణయిస్తాయి.

పెద్ద సంస్థలతో పోటీ ఎలా?

ఇప్పటికే మార్కెట్లో బ్లాక్‌రాక్ వంటి అంతర్జాతీయ సంస్థలు, బ్యాంక్ ఆధారిత ఫండ్ హౌస్‌లు ఉన్నాయి. వీటితో పోటీ గురించి భౌతిక్ అంబానీ మాట్లాడుతూ.. "మా లక్ష్యం కేవలం డిస్ట్రిబ్యూషన్ పెంచుకోవడం కాదు, మెరుగైన ఫలితాలను అందించడం. ఒక క్రమబద్ధమైన ప్రక్రియ (Process) ఉంటే ఇన్వెస్టర్ల నమ్మకం దానంతట అదే పెరుగుతుంది" అని ధీమా వ్యక్తం చేశారు. ప్రస్తుతం భారత మార్కెట్లలో లిక్విడిటీ బాగున్నప్పటికీ, ఫండమెంటల్స్ విషయంలో జాగ్రత్తగా ఉండాలని వారి మోడల్స్ సూచిస్తున్నాయి. అందుకే ప్రస్తుతానికి వీరి ఈక్విటీ ఎక్స్‌పోజర్ సుమారు 50 శాతానికి పరిమితం చేశారు.

ఇన్వెస్టర్లకు లాభం ఏంటి?

సాధారణ స్టాక్ పికింగ్ పద్ధతుల్లో బెంచ్‌మార్క్ కంటే ఎక్కువ రిటర్న్స్ (Alpha) సాధించడం రోజురోజుకీ కష్టమవుతోంది. ఇలాంటి సమయంలో భారీ డేటాను విశ్లేషించే అల్గోరిథంలు చిన్న చిన్న లాభాలను కూడా వదలకుండా క్యాష్ చేసుకుంటాయి. రాబోయే 3-5 ఏళ్లలో ఇండియాలో మోడల్ ఆధారిత పెట్టుబడులకు ఒక క్రెడిబిలిటీ తీసుకురావడమే తమ సక్సెస్ అని భౌతిక్ అంబానీ పేర్కొన్నారు. మీరు కూడా మీ పోర్ట్‌ఫోలియోలో కొత్తదనం కోరుకుంటే, ఈ AI ఆధారిత మ్యూచువల్ ఫండ్ పై ఒక కన్నేసి ఉంచండి!