బ్యూటీ ట్రీట్‌మెంట్, విదేశీ ట్రిప్పులకు ఖర్చులు! కంపెనీ నుండి వ్యవస్థాపకుడి భార్య తొలగింపు

ఫిన్‌టెక్ సంస్థ భారత్‌పే కంపెనీ నిధుల దుర్వినియోగానికి సంబంధించి ఏకంగా కంపెనీ సహ వ్యవస్థాపకుడి సతీమణిని తొలగించింది. ప్రస్తుతం భారత్‌పే మేనేజింగ్ డైరెక్టర్‌గా అశ్‌నీర్ గ్రోవర్ ఉన్నారు. ఆయన సతీమణి మాధురీ జైన్ గ్రోవర్. వ్యక్తిగత సౌందర్య చికిత్సలు, ఎలక్ట్రానిక్ ఉత్పత్తుల కొనుగోలు, అమెరికా, దుబాయ్‌లకు కుటుంబ సభ్యులతో పర్యనటల కోసం, నకిలీ ఇన్వాయిస్‌లతో కంపెనీ నిధులను వెచ్చించినట్లుగా ఆమెపై ఆరోపణలు వచ్చాయి. మాధురి కంట్రోల్స్ హెడ్‌గా వ్యవహరిస్తున్నారు.

ఈ ఆరోపణల నేపథ్యంలో ఆమెను కంపెనీ నుండి తొలగించారు. అంతేకాదు, ఆమె పేరిట ఉన్న స్టాక్ ఆప్షన్స్‌ను రద్దు చేశారు. ఆమె తన వ్యక్తిగత సిబ్బందికి కంపెనీ ఖాతాల నుండి డబ్బులు చెల్లించిందని, ఆయా పార్టీల నుండి నకిలీ ఇన్వాయిస్‌లను తయారు చేసిందనే ఆరోపణలు కూడా ఉన్నాయి. గతంలో కొటక్ మహీంద్రా బ్యాంకు సిబ్బందిని దూషించారనే ఆరోపణలతో కొద్ది రోజుల క్రితం అశ్‌నీర్ గ్రోవర్‌ను కంపెనీ బోర్డు మూడు నెలల సెలవులపై పంపించింది. ఆ తర్వాత మాధురి కూడా సెలవులపై వెళ్లారు.

కంపెనీకి సంబంధించి వివిధ కొనుగోళ్లు, ఖర్చులకు సృష్టించిన నకిలీ బిల్లులను కంపెనీ ఫైనాన్షియల్ ఇన్-ఛార్జీగా ఉన్న మాధురి ఆమోదించేవారని, ఆరోపణల నేపథ్యంలో ఎంప్లాయిమెంట్ అగ్రిమెంట్ ప్రకారం మాధురిని ఫిబ్రవరి 22వ తేదీ నుండి సర్వీసుల నుండి టెర్మినేట్ చేసినట్లు కంపెనీ ప్రతినిధులు తెలిపారు. భారత్‌పే ప్రమోటర్ల మధ్య గత కొద్ది రోజులుగా విభేదాలు ప్రారంభమయ్యాయి. ఈ నేపథ్యంలో ప్రస్తుత పరిణామాలు చోటు చేసుకున్నాయి.