సీనియర్ సిటిజన్ల కోసం 7% పైగా వడ్డీ ఇస్తున్న టాప్ బ్యాంకుల ఎఫ్‌డీలు ఇవే!

రిస్క్ లేకుండా గ్యారంటీ రిటర్న్స్ వస్తాయన్న నమ్మకంతో చాలా మంది వృద్ధులు అంటే సీనియర్ సిటిజన్లు తమ పొదుపులను ఫిక్స్‌డ్ డిపాజిట్ (FD)లో పెట్టడానికే ఇష్టపడతారు. పైగా సాధారణ కస్టమర్ల కంటే వీరికి కొంచెం ఎక్కువ వడ్డీ రేట్లు కూడా బ్యాంకులు ఇస్తాయి. కాబట్టి మీరు కూడా మీ FD మీద మంచి రాబడులు కావాలనుకుంటే, ఎవరెవరు ఎక్కువ వడ్డీ ఇస్తున్నారో ముందుగా చూసుకోవడం చాలా ముఖ్యం. బ్యాంక్ బజార్ ఇచ్చిన సెప్టెంబర్ 15 నాటి డేటా ప్రకారం, సీనియర్ సిటిజన్లకు ప్రస్తుతం ఎక్కువ వడ్డీ ఇస్తున్న టాప్ బ్యాంకులు ఇవే.

ఇప్పుడు ఎఫ్‌డీల్లో పెట్టుబడి పెట్టాలని అనుకునేవారికి మంచి వార్తే ఉంది కొన్ని బ్యాంకులు బాగా ఆకర్షణీయమైన వడ్డీరేట్లు ఇస్తున్నాయి. కొంచెం కష్టపడి చూస్తే, 7% కంటే ఎక్కువ వడ్డీ కూడా దొరుకుతుంది.

ఉదాహరణకు, ప్రైవేట్ బ్యాంకుల్లో ఇండస్ఇండ్ బ్యాంక్ దూసుకుపోతోంది. 2 ఏళ్ల ఎఫ్‌డీ పై 7.5% వడ్డీ ఇస్తోంది. ఇదే ప్రైవేట్ బ్యాంకుల్లో అత్యధికం. అదే యాక్సిస్ బ్యాంక్ 5 నుంచి 10 ఏళ్ల పాటు పెట్టే ఎఫ్‌డీలకు 7.35% ఇస్తోంది. కొంచెం షార్ట్‌టెర్మ్ ఎఫ్‌డీ కావాలంటే, కోటాక్ మహీంద్రా బ్యాంక్ లో 391 రోజులు నుంచి 23 నెలల లోపు పెట్టుబడికి 7.1% వడ్డీ లభిస్తుంది.

ఐసిఐసిఐ బ్యాంకు కూడా 2 సంవత్సరాలు 1 రోజు నుంచి 10 ఏళ్ల మధ్య ఎఫ్‌డీలకు 7.1% ఇస్తోంది. అలాగే HDFC బ్యాంకు 18 నుంచి 21 నెలల ఎఫ్‌డీలకు 7.1% ఆఫర్ చేస్తోంది. ప్రభుత్వ రంగ బ్యాంకుల్లో కూడా కొన్ని మంచి ఆఫర్లు ఉన్నాయి. బ్యాంక్ ఆఫ్ బరోడా 444 రోజుల ఎఫ్‌డీకి 7.1%, యూనియన్ బ్యాంక్ ఆఫ్ ఇండియా 456 రోజుల ఎఫ్‌డీకి 7.1%, పంజాబ్ నేషనల్ బ్యాంక్ 390 రోజుల ఎఫ్‌డీకి 7.1% ఇస్తున్నాయి.

ఇక, స్టేట్ బ్యాంక్ ఆఫ్ ఇండియా (SBI) 5 నుంచి 10 ఏళ్ల ఎఫ్‌డీలకు 7.05% వడ్డీ ఇస్తోంది. కెనరా బ్యాంక్ కూడా 444 రోజుల ఎఫ్‌డీకి 7% ఇస్తోంది. అంటే, కొంతకాలం డబ్బును పెట్టుబడి పెట్టాలని ప్లాన్ చేస్తే 7% పైగా వడ్డీ వచ్చే ఈ బ్యాంకులు బాగానే ఉపయోగపడతాయి.

RBI నియమాల ప్రకారం అన్ని బ్యాంకులు తమ కార్యకలాపాలకు కావాల్సిన నిధులు కస్టమర్ల నుంచి డిపాజిట్ల రూపంలో సేకరించాలి. స్టేట్ బ్యాంక్ ఆఫ్ ఇండియా (SBI), బ్యాంక్ ఆఫ్ బరోడా, కెనరా బ్యాంక్, పంజాబ్ నేషనల్ బ్యాంకు లాంటి ప్రభుత్వ రంగ బ్యాంకులకు ఇప్పటికే లక్షల కోట్ల డిపాజిట్లు ఉన్నాయి. కాబట్టి వీటికి మరీ ఎక్కువ వడ్డీ ఇచ్చి కొత్త డిపాజిట్లు ఆకర్షించాల్సిన అవసరం లేదు. కానీ ఇండస్ఇండ్ బ్యాంక్, యాక్సిస్ బ్యాంక్, కోటక్ మహీంద్రా బ్యాంక్, ICICI బ్యాంక్, HDFC బ్యాంకు వంటి ప్రైవేట్ బ్యాంకులు ఎక్కువ డిపాజిట్లు రాబట్టుకోవాలంటే కస్టమర్లను ఆకట్టుకోవాలి. అందుకే ఇవి FDలపై ఎక్కువ వడ్డీ ఇస్తుంటాయి.

ప్రైవేట్ బ్యాంకులు సాధారణంగా రిస్క్ తీసుకోవడంలో ముందుంటాయి. వీటి వ్యాపార మోడల్‌ కూడా కొంత అగ్రెసివ్‌గా ఉంటుంది. ఎక్కువ వడ్డీ ఇచ్చినా, ఆ డబ్బును తిరిగి అధిక రాబడులు వచ్చే రుణాలుగా ఇవ్వడం ద్వారా లాభం పొందగలమనే లెక్కలతో పనిచేస్తాయి. అంటే, ఎక్కువ రిస్క్ తీసుకుంటేనే ఎక్కువ ప్రాఫిట్ వస్తుందని వీటి నమ్మకం.

అదే సమయంలో, స్టేట్ బ్యాంక్ ఆఫ్ ఇండియా, బ్యాంక్ ఆఫ్ బరోడా, కెనరా బ్యాంక్ వంటి ప్రభుత్వ రంగ బ్యాంకులు మాత్రం సేఫ్ ప్లే చేయడానికే ప్రాధాన్యం ఇస్తాయి. వీటి వ్యూహం రిస్క్ తక్కువగా తీసుకోవడం, నష్టాలు రాకుండా చూసుకోవడం. అందుకే ఈ బ్యాంకులు సాధారణంగా తక్కువ వడ్డీ రేట్లను మాత్రమే ఆఫర్ చేస్తాయి.

మీ పెట్టుబడులు సేఫ్‌నా?

FDలో డబ్బు పెట్టడం సేఫ్‌నా అనే సందేహం చాలామందికి ఉంటుంది. దీనికి సమాధానం అవును డిపాజిట్ ఇన్సూరెన్స్ మరియు క్రెడిట్ గ్యారంటీ కార్పొరేషన్ (RBIకి చెందిన సంస్థ) FDలలో పెట్టిన రూ. 5 లక్షల వరకు డిపాజిట్లకు గ్యారంటీగా భద్రత కల్పిస్తుంది. అంటే ఎలాంటి సమస్య వచ్చినా, ఆ మొత్తం వరకూ మీ డబ్బు రక్షించబడుతుంది.