Click it and Unblock the Notifications
డిపాజిట్ తిరిగివ్వని బెంగళూరు ఓనర్‌కు కోర్టు షాక్.. 80 వేల డిపాజిట్‌ను 9% వడ్డీతో సహా చెల్లించాలని ఆదేశాలు..
అద్దెకు ఉన్న అపార్ట్‌మెంట్‌ను ఖాళీ చేసిన తర్వాత సెక్యూరిటీ డిపాజిట్‌ను తిరిగి ఇవ్వడానికి నిరాకరించిన ఒక ఇంటి యజమానికి Bengaluru వినియోగదారుల కోర్టు తగిన బుద్ధి చెప్పింది. ఆస్తికి జరిగిన నష్టానికి సంబంధించి ఆధారాలు చూపకుండా లేదా బకాయిలు ఉన్నాయని నిరూపించకుండా ఇంటి యజమాని అద్దెదారు యొక్క సెక్యూరిటీ డిపాజిట్‌ను నిలిపివేయడం అన్యాయమని స్పష్టం చేస్తూ.. మూడవ బెంగళూరు అర్బన్ జిల్లా వినియోగదారుల వివాదాల పరిష్కార కమిషన్ సెప్టెంబర్ 26న కీలక తీర్పునిచ్చింది. మొత్తం సెక్యూరిటీ డిపాజిట్‌ను 9 శాతం వార్షిక వడ్డీతో పాటు వెనక్కి ఇవ్వాలని, వ్యాజ్యపు ఖర్చుల కోసం అదనంగా రూ. 10 వేలు చెల్లించాలని యజమానిని ఆదేశించింది.
బెంగళూరులోని నాగవారలో అద్దెకు ఉంటున్న వీరేశ్వర్ మహంత అనే అద్దెదారు ఆఫీసు.. నాగవార నుండి వైట్‌ఫీల్డ్‌కు మారడంతో ఆయన ఆ ఫ్లాట్‌ను ఖాళీ చేయాలని నిర్ణయించుకున్నారు. ప్రతి నెలా రూ. 25,000 అద్దె చెల్లిస్తూ, రూ. 80,000 వాపసు లభించే సెక్యూరిటీ డిపాజిట్‌ను యజమాని బసిరెడ్డి కొండారెడ్డికి జమ చేశారు.
మార్చి 16, 2026న ఫ్లాట్ ఖాళీ చేస్తున్నట్లు యజమానికి తెలియజేసి.. మార్చి 30న తాళాలు, స్వాధీనాన్ని అప్పగించారు. అయితే పదేపదే అభ్యర్థించినప్పటికీ యజమాని డిపాజిట్ సొమ్మును తిరిగి ఇవ్వలేదు. పైగా ఏప్రిల్ 16న జరిగిన వాట్సాప్ కాల్‌లో కొత్త అద్దెదారు వచ్చిన తర్వాతే డబ్బులు ఇస్తానని చెప్పాడు. అగ్రిమెంట్‌లో అటువంటి నిబంధన ఏదీ లేకపోవడంతో.. ఏప్రిల్ 30న లీగల్ నోటీసు పంపి, ఆపై మహంత వినియోగదారుల కమిషన్‌ను ఆశ్రయించారు.
తన వాదనలో కొండారెడ్డి, అగ్రిమెంట్‌లోని నిబంధన ప్రకారం 3 నెలల ముందస్తు నోటీసు ఇవ్వలేదని ఆరోపించారు. అంతేకాకుండా విద్యుత్ బిల్లులు, మెయింటెనెన్స్ ఛార్జీలు, ఫ్లాట్ నష్టానికి సంబంధించిన మరమ్మతుల ఖర్చుల కింద డిపాజిట్‌ను మినహాయించుకునే హక్కు తనకు ఉందని సమర్థించుకున్నారు. దీనికి ప్రతిగా అద్దెదారు మహంత 12% వడ్డీతో రూ. 80,000 డిపాజిట్ వాపసు, మానసిక వేదనకు రూ. 1 లక్ష, కోర్టు ఖర్చులకు రూ. 25,000 డిమాండ్ చేశారు.
అద్దె ఒప్పందం, పేమెంట్ రికార్డులు, వాట్సాప్ చాట్లు, ఫోటోలు, వీడియో ఫుటేజ్‌లను పరిశీలించిన కమిషన్, అద్దెదారు ఎలాంటి బాకీలు లేకుండా 4 నెలల అద్దెను సక్రమంగా చెల్లించారని గుర్తించింది. యజమాని డిపాజిట్ మొత్తాన్ని స్వీకరించినట్లు ఒప్పుకున్నప్పటికీ.. ఫ్లాట్‌కు నష్టం జరిగిందని లేదా బిల్లుల బకాయిలు ఉన్నాయని నిరూపించడంలో పూర్తిగా విఫలమయ్యారని స్పష్టం చేసింది. ఎటువంటి ఆధారాలు లేకుండా అద్దెదారు డిపాజిట్‌ను నిరవధికంగా నిలిపివేయడం సేవలో లోపం (Deficiency of Service), అన్యాయమైన వాణిజ్య పద్ధతి కిందకు వస్తుందని కమిషన్ తేల్చిచెప్పింది.
అద్దెదారు స్వాధీనం అప్పగించిన మార్చి 30, 2026 నుండి లెక్కించి.. మొత్తం సొమ్ము వసూలయ్యే వరకు 9% వార్షిక వడ్డీతో రూ. 80 వేల డిపాజిట్‌ను రీఫండ్ చేయాలని కమిషన్ కొండారెడ్డిని ఆదేశించింది. దీనికి తోడు వ్యాజ్య ఖర్చుల కింద రూ. 10,000 (మొత్తం అసలు రూ. 90,000 + వడ్డీ) చెల్లించాలని స్పష్టం చేసింది. ఈ ఉత్తర్వులను అమలు చేయడానికి యజమానికి 45 రోజుల గడువు ఇవ్వబడింది. ఒకవేళ నిర్ణీత గడువులోగా చెల్లింపు పూర్తి చేయకపోతే.. సెప్టెంబర్ 29, 2026 నుండి పరిహార సొమ్ముపై కూడా 9% వడ్డీ వర్తిస్తుందని కమిషన్ హెచ్చరించింది.
Sign in with Google